Twarisa Xirhambo Lexi Nge “Tana!” Hi Xivindzi

1 Swiendlakalo leswi hatlisaka emisaveni hinkwayo swi fungha minkarhi leyi tanihi ‘masiku ya makumu.’ (2 Tim. 3:1-5) Ku tlakuka ka vugevenga, ku tsekatseka ka ikhonomi ni mavabyi lama xungetaka vutomi swi engetele ntshikilelo wa swona. Kambe lexi tsakisaka, ku nga khathariseki makhombo yo tano, vanhu va karhi va nyikiwa xirhambo lexi xi nga va khumbaka hi laha ku nga heriki. Moya ni mutekiwa va ya emahlweni va ku: “Tana!” Naswona sweswi “ntshungu lowukulu” wu hlanganyela na vona eku twariseni ka xirhambo lexi pfulekeke eka vanhu hinkwako leswaku va ta nwa mati ya vutomi mahala.—Nhlav. 7:9; 22:17.

2 Namuntlha, lava va nga ni torha ra vululami va hlamula xirhambo lexi hi nhlayo leyikulu. Lembe leri nga hundza timiliyoni ti ve kona eka mintsombano ya muganga leyi khomiweke emisaveni hinkwayo, naswona kwalomu ka khume ra timiliyoni va ve kona eXitsundzuxweni. Timiliyoni tin’wana ti kombisa ku tlangela lunghiselelo ra Yehova hi ku yingisa rungula ra Mfumo. Kutani ke, i swa nkoka swonghasi leswaku hi tirhisa nkarhi wa hina hi vutlhari eku twariseni ka xirhambo lexi erivaleni na hi yindlu na yindlu!—Mintirho 5:42; Vaef. 5:15, 16.

HLANGANYELA HI XIVINDZI

3 Vakriste vo sungula a va xanisiwa hikwalaho ka ku chumayela ka vona hi ku chivirika. (Mintirho 16:19-21; 17:2-8) Hambi swi ri tano, a va karhalanga eka matshalatshala ya vona yo huwelela mahungu lamanene. Hi ku fanana na hina hi fanele ku va ni xivindzi naswona hi tiyimisela eka matshalatshala ya hina yo endla leswaku mahungu lamanene ma chumayeriwa.

4 Hambi ku ri ematikweni lawa ntirho wu yirisiweke eka wona, vamakwerhu va hlanganyela hi mbilu hinkwayo entirhweni wo chumayela ku nga khathariseki ku xanisiwa lokukulu, ku katsa ni ku lahlekeriwa loku nga kona ka mintirho, makaya hambi ku ri ntshunxeko wa vona. Xikombiso xa vona lexinene xa hi khutaza ku ya emahlweni hi rhamba van’wana leswaku ‘Va ta!’—2 Vates. 3:9.

5 Ku tlula malembe ya 35 endzhaku ko dyondza ntiyiso, makwerhu un’wana wa xisati u hlayise ku tsakela ka mbilu ka ku phayona. Swiyimo swa yena swa munhu hi xiyexe swi cincile loko a ri na malembe ya 70 hi vukhale, naswona u ve phayona ra nkarhi hinkwawo. Hambi leswi va nga riki vangani vanhu lava emalembeni wolawo a va ta nghenela ntirho-vutomi lowuntshwa, u endle tano. Leswi sweswi a tsakeleke vutirheli bya nkarhi hinkwawo hi malembe yo hlayanyana, u ri, “Swi ya swi antswa siku rin’wana ni rin’wana.” U tise ku phyuphya ka moya eka van’wana hikwalaho ko amukela xirhambo xa Yehova xo faneleka ni ku hlanganyela hi xitalo entirhweni wa Mfumo handle ko chava.

6 Tanihi le ka lembe xidzana ro sungula, vanhu namuntlha va amukela xirhambo lexi, va hundzula miehleketo ya vona, va lulamisa mianakanyo ya vona ivi va tshika swiendlo swa ku nga chavi Xikwembu. Va va xiphemu xa vumakwerhu bya Timbhoni leti tinyiketeleke ta misava hinkwayo naswona va hlanganyela kun’we ni moya ni mutekiwa eku vuleni va ku “Tana!” eka vanhu van’wana va timbilu letinene.

7 Ku engeteleka lokukulu entirhweni wa Mfumo ni ku kurisiwa ka tihofisi ta marhavi ematikweni yo hambana-hambana ku nyikela vumbhoni bya mikateko ya Yehova. Kambe nkarhi wa hela eka mafambiselo lawa ya khale. Sweswi i nkarhi lowunene wo kombisa xivindzi ni ku chivirika eku twariseni ka xirhambo lexi nge “Tana!” leswaku van’wana va hlamula hi xihatla ivi va endla hi ku ya hi leswi va swi tweke.—Mintirho 20:26, 27; Varhoma 12:11.