Ku Phayona—I Xikombiso Xa Rirhandzu
1 Ku rhandza Yehova ni vanhu-kulorhi hi swona leswi hi susumetelaka ku hlanganyela hi xitalo entirhweni wo chumayela. Tanihi leswi ku rhandza ka hina Yehova ni vanhu ku kulaka, hi khutaziwa ku kunguhata ku hlanganyela hi xitalo evutirhelini. Rirhandzu ra hina ra kula loko hi kula ‘hi vutivi lebyi kongomeke’ bya Rito ra Xikwembu. (Vafil. 1:9, 10) Loko hi ya hi dyondza swinene hi ku rhandza ka Yehova, hi ya hi xi twisisa swinene xihatla xa minkarhi leyi hi hanyaka eka yona. Leswi swi tiyisa nkhathalelo wa hina eka van’wana. Vo tala va kombisa nkhathalelo wa vona wa rirhandzu hi ku nghenela ntirho wa vuphayona.
2 Xana u nga endla mindzulamiso leyi lavekaka leswaku u va phayona ra nkarhinyana kumbe ra nkarhi hinkwawo? Entiyisweni, a hi hinkwerhu lava hi swi kotaka ku phayona. Kambe un’wana ni un’wana wa hina u fanele ku kambisisa swiyimo swakwe hi ku khongela.
3 Vakriste va nga ri vangani va kuma leswaku va ni nkarhi wo tala wa ku phayona; hikwalaho, swa fanela leswaku hi ‘xava nkarhi lowu nga kona’ eka swilo leswi nga bohiki leswi swi lavaka nkarhi wa hina sweswi. (Vaef. 5:15-17) Ku rhandza ka hina Xikwembu ni vanhu ku fanele ku hi endla hi rhandza ku tshika ku navela kun’wana ka hina ni ku titsakisa leswaku hi kombisa rirhandzu ra hina hi xitalo. (Marka 12:33) Swo tala swa swilo leswi hi swi kumaka kumbexana leswi hi ehleketaka leswaku i swinene, swi nga ha langutiwa swi ri swa manyunyu eswiphen’wini swin’wana swa misava.
4 Vatswari va nga endla yini leswaku va pfuna vana va vona va ehleketa hi ndlela leyi ya Xikwembu? Vatswari va fanele va veka tipakani ta moya emahlweni ka vana va vona va ha ri vatsongo. Xana lava endlaka ntangha-khume va ehleketa hi tipakani ta ku tihanyisa kumbe hi ta moya? Xana a va nge swi endli pakani ya vona ku sungula hi ntirho wa vuphayona bya nkarhi hinkwawo loko va heta xikolo? Hi fanele ku pfuna vantshwa va hina va vona mimpfuno leyi khomelelaka leyi tisiwaka hi ku nghenela ntirho wa vuphayona ku sukela evutsongwanini. Leswi i ku hlayisa rifuwo etilweni. (Mat. 6:19-21) Swi tsakisa Xikwembu ni ku kombisa vutshembeki ni ku tinyiketela ka hina eka xona. Naswona swi ponisa vutomi bya van’wana.
5 I ku rhandza ka Xikwembu leswaku ‘vanhu va tinxaka hinkwato va ponisiwa.’ (1 Tim. 2:4) Xana hi nga kombisa leswaku na hina ha swi rhandza sweswo? Hi nga swi kombisa loko hi swi tsakela ku rhangisa swilaveko swa Mfumo. Naswona hi nga endla leswi hi ku va ni ntshembo wa leswaku Yehova u ta hi nyika swilaveko swa vutomi. (Mat. 6:31-33) Swiyimo swa ikhonomi swi nga ha ya swi nyanya, kambe xitshembiso xa Yehova xa ku hi khathalela a xi cinci.—Ps. 37:25.
6 Ku tinyiketela ka hina leswaku hi hlanganyela evutirhelini bya nsimu hi laha swiyimo swa hina swi hi pfumelelaka ha kona i xikombiso xa rirhandzu. Eka van’wana leswi swi ta vula ku va phayona ra nkarhi hinkwawo. Ha yini u nga endli leswi u nga swi kotaka leswaku u sungula hi September 1, 1992?