Ku Fambisa Buku Leyi Nge Ku Lavisisa Ka Vanhu Xikwembu
1 Vanhu vo tala namuntlha va anakanya onge ku tihlawulela ka vona vukhongeri i mhaka ya xihundla swinene. Xisweswo, swi nga ha tika ku vulavurisana ni vaakelani va hina hi nhloko-mhaka leyi. Kambe sweswi hi ni buku leyi nge Ku Lavisisa Ka Vanhu Xikwembu, leyi tikombeke yi ri mpfuno wa nkoka loko hi chumayela vanhu va swisekelo swo hambana-hambana swa vukhongeri.
2 I yini lexi u nga ta xi vula leswaku u pfuxa ku tsakela ka n’wini wa muti leswaku a hlaya buku leyi? I tinhla kumbe swivumbeko swihi leswi u nga swi kandziyisaka leswi nga ta tsakisa lava tivulaka Vakriste? eka lava nga ni tidyondzo leti nga riki ta Vukriste? kumbe eka lava nga riki na ripfumelo? Swiringanyeto leswi landzelaka swi ta hi pfuna hi lunghekela ku komba vaakelani va hina xilaveko xa ‘ku lavisisa Yehova’ ni ku n’wi lava loko a ha ri ekusuhi.’ (Esa. 55:6) Swiringanyeto leswi swi nga cinciwa swi fanela swiyimo swa ka n’wina.
3 Ha Yini Hi Kambisisa Leswi Hi Nga Ta Swi Vula?: Tanihi leswi vo tala va vulaka leswaku va eneriseka hi vukhongeri bya vona naswona a va tsakeli ku cinca, hi nga ha boheka ku cinca xingheniso xa hina leswaku hi pfuna n’wini wa muti a kambisisa leswi hi nga ta swi vula, hi mianakanyo leyi pfulekeke.
4 Endzhaku ko pfuxela hi laha ku faneleke, u nga ha ku:
◼ “Loko hi vulavurisana ni vaakelani va hina hi kuma leswaku vanhu vo tala va eneriseka hi vukhongeri bya vona naswona a va lavi ku cinca. Kambe loko vanhu va tinyika nkarhi wo kambisisa tidyondzo ta van’wana, xana u anakanya leswaku leswi swi nga yisa eku twisiseni ko antswa ni ku hunguta rivengo emisaveni? [Yimela n’wini wa muti a hlamula.] Xiya leswi Bibele yi swi vulaka hi lava rhandzaka Xikwembu ni ndlela leyi va faneleke ku titwa ha yona hi van’wana.” Endzhaku ko hlaya Mintirho 17:26, 27, yisa nyingiso eka ndzimana 15 na 16 eka tluka 10 ra buku leyi nge Ku Lavisisa Ka Vanhu Xikwembu.
5 Vo tala va kume leswaku ku pfula ndzima leyi vulavulaka hi vukhongeri bya n’wini wa muti ebukwini swi nga koka nyingiso wa yena. Xiya leswaku leswi swi nga endlisiwa ku yini.
6 Endzhaku ko titivisa, u nga ha ku:
◼ “Leswi ku nga ni vukhongeri byo tala ngopfu namuntlha, xana u tshame u tivutisa leswaku hi nga swi vona njhani loko vukhongeri bya hina byi amukeriwa hi Xikwembu?” Endzhaku ka nhlamulo ya n’wini wa muti, yisa nyingiso wakwe eka bokisi leri nga eka tluka 377 ra buku leyi nge Ku Lavisisa Ka Vanhu Xikwembu, leri kombisaka tindlela ta khume ta ku vona vukhongeri bya ntiyiso, u xiya ngopfu-ngopfu yinhla ya vu-7. Vutisa n’wini wa muti loko a pfumela leswaku loyi a tirhisaka vukhongeri bya ntiyiso u fanele ku titwa hi ndlela yoleyo hi tinxaka ni matiko man’wana. Loko nkarhi wu pfumela, pfula matsalwa manharhu lama kombisiweke kwalaho. Kutani u gimeta hi ku vula leswaku swivangelo leswin’wana swa kaye leswi nyikeriweke swi seketeriwe eMatsalweni.
7 Swivumbeko Swin’wana Leswi Pfunaka: Xikombo xa tinhloko-mhaka lexo leha endzhaku ka buku na xona xi nga tirhisiwa. Hi xikombiso, ku vuriwa yini loko vanhu vo tala ensin’wini va ehleketa leswaku vukhongeri hinkwabyo ko va tindlela to hambana leti yaka eka Xikwembu? Kutani languta ehansi ka xihloko lexi nge “Vukhongeri” laha ku nga ni xihlokwana lexi nge “‘vukhongeri hinkwabyo bya ringana’: 12.” Leswi swi komba ndlela leyi xikombo xi nga hi pfunaka ha yona hi kuma tinhla to vulavula ha tona. Loko hi vulavula ni lava nga pfumeriki eka Xikwembu, hi nga ha va kombisa tindzimana 1 na 2 eka tluka 329, leti hlamulaka xivutiso xa ku pfumala ripfumelo ka manguva lawa. Ntlhanu wa “Swivutiso Leswi Lavaka Nhlamulo” eka matluka 17-18 swi nga tsakisa, ngopfu-ngopfu eka lava kanakanaka, loko Bibele yi dyondzisa leswi vukhongeri byo tala byi swi dyondzisaka.
8 Hi ku tirhisa tindlela leti humelelaka leswaku hi fambisa buku leyi nge Ku Lavisisa Ka Vanhu Xikwembu, hi nga ha swi kota ku pfuna vanhu lava hi vulavurisanaka na vona leswaku va lavisisa Xikwembu xin’we xa ntiyiso, Yehova.