Ku Vuyela Hi Xikongomelo Xo Sungula Dyondzo Ya Bibele

¹ Endzhaku ko kuma munhu la tsakelaka ro sungula, hi fanele hi va ni vukheta leswaku hi endla ku tsakela loku ku tshama ku ri kona. Ku endla maendzo yo vuyela swi nga yisa hi ku kongoma eka mabulo ya Bibele ni tidyondzo ta Bibele leti ponisaka vutomi. Xiya swiringanyeto leswi swa ku endla maendzo yo vuyela lama humelelaka.

Emakumu ya riendzo ro sungula, u nga ha veka masungulo ya riendzo ro vuyela hi ku vutisa u ku:

◼ “Xana u tshama u tivutisa leswaku ha yini ku ri ni vukhongeri byo tala swonghasi?” Loko u vuyela u nga ha ku: “Nkarhi lowu hundzeke loko ndzi ri laha, ku vutisiwe xivutiso xa leswaku ha yini ku ri ni vukhongeri byo tala swonghasi. Ku ni swivangelo swo tala swa leswi. Ndzi tsakela ku ku hlayela xin’wana lexi tsakisaka lexi ndzi xi kumeke loko ndzi kambisisa xivutiso lexi.” Pfula tluka 322 ra buku leyi nge Reasoning ivi u hlaya xiyenge lexi nga ehansi ka xihlokwana lexi nge “Ha yini ku ri ni vukhongeri byo tala swonghasi?”

² Xana Xikwembu xi nga kumiwa eka vukhongeri hinkwabyo? Leswaku Xikwembu xi va kona eka vukhongeri byo karhi, byi fanele byi humesa mihandzu leyinene.

Leswaku u sungula riendzo ro vuyela, u nga ha ku:

◼ “Vukhongeri byi fanele byi khumba mahanyelo ya munhu hi ndlela yihi? Leswi Yesu Kriste a swi vuleke eka Matewu 7:17-20 swi hi nyika swikongomiso leswi vukhongeri bya ntiyiso byi faneleke ku swi landzela.” Hlaya tsalwa emakumu ka ndzimana 19 eka tluka 12 ra buku leyi nge Ku Lavisisa Ka Vanhu Xikwembu. Kutani u vutisa n’wini wa muti leswaku u vona yini eka xifaniso lexi nga eka tluka 13. “Hambi leswi timiliyoni ti vulaka leswaku ti pfumela eka Xikwembu, vo tala va xi ala hi mintirho ya vona.” Endzhaku ka sweswo, hlaya swivulwa swimbirhi swo sungula eka ndzimana 20. “Swiendlo leswi swa vukarhi swi fungha vukhongeri lebyi nga wu landzeliki nkongomiso lowu nyikeriweke hi Kriste wa ku rhandzana, hambi ku ri ku rhandza valala va hina. Eka riendzo ra mina leri landzelaka, kumbexana hi nga bula hi leswi vukhongeri byi faneleke ku swi endla, loko byi ta va byi humesa mihandzu leyinene.”

³ Vumundzuku byi va khomele yini lava lavaka Xikwembu xa ntiyiso? Bulo ra xivutiso lexi ebukwini leyi nge Ku Lavisisa Ka Vanhu Xikwembu ri nga ha yisa eka dyondzo ya Bibele.

Leswaku u sungula bulo, u nga ha ku:

◼ “Leswi swiyimo swa ikhonomi swi yimeke hi ndlela leyi sweswi, vanhu vo tala va tivutisa loko va nga swi kota ku va ni langutelo lerinene hi vumundzuku. Ndzi kume Bibele yi khutaza swinene loko yi vulavula hi vumundzuku. Ndzi lava ku ku avela xitshembiso xa Xikwembu lexi nga eka Esaya 65:21, 22, 25. [Hlaya ivi u hlamusela tsalwa rero hi ku komisa.] Buku leyi nge Ku Lavisisa Ka Vanhu Xikwembu yi hlamula swivutiso swin’wana leswi tsakisaka emhakeni leyi, ku sukela eka ndzimana 17 eka tluka 372.” Kutani kombisa lunghiselelo ra dyondzo ya Bibele u tirhisa ndzimana 17-20. “Vhiki leri taka ndzi tsakela ku kambisisa xivutiso lexi nge, Hi wahi masungulo ya misava leyintshwa leyi tshembisiweke eBibeleni?”

⁴ Tirhisa nkarhi lowu saleke hi vutlharhi leswaku u hlanganyela eku nyikeleni ka vumbhoni lebyi hetisekeke lebyi sweswi byi nyikeriwaka ematikweni hinkwawo ya misava. (Ringanisa Mintirho 20:21.) Ku endla maendzo yo vuyela hi xikongomelo xo sungula dyondzo ya Bibele swi nga va nyika vutomi lebyi nga heriki lava hi va chumayelaka.