Xana Wa Ti Nyikela Tidyondzo Ta Bibele?
1 Vo tala va humelela kahle eku sunguleni ka tidyondzo ta Bibele hi ku tirhisa ku tshinelela loku kongomeke, va nyika vanhu lunghelo ro dyondza Bibele. Munhu un’wana loyi a aleke buku minkarhi yo talanyana u hlamule hi ku hatlisa loko ku nyikeriwa dyondzo ya Bibele. U te: “I khale ndzi lava ku dyondza Bibele.” Dyondzo ya Bibele yi sunguriwile, kutani ndyangu hinkwawo wu endle nhluvuko hi ku hatlisa.
2 Hinkwerhu hi fanele hi tlharihela ku sungula tidyondzo. Leswaku vanhu va endla nhluvuko wa ku va vadyondzisiwa va Kriste, va fanele va dyondzisiwa. (Mat. 28:19, 20) Leswaku va dyondzisiwa, va fanele va fambiseriwa dyondzo ya Bibele. Hakanyingi tidyondzo ti nga sunguriwa hi ku rhandza ku kombisa ndlela leyi n’wini wa muti a nga dyondzaka swo tala ha yona hi Bibele ni hi switshembiso swa Xikwembu. Makwerhu un’wana u kote ku sungula tidyondzo ta ntlhanu hi xiphephana lexi nge Vutomi eMisaveni Leyintshwa Ya Ku Rhula. Tanihi leswi a a nga swi koti ku fambisa tidyondzo teto to tala nkarhi na nkarhi, u sungule ku nyika vahuweleri van’wana tidyondzo ta Bibele.
3 Loko swi hi olovela ku sungula tidyondzo, hi nga famba ni vahuweleri van’wana hi va pfuna va kuma tidyondzo na vona. Kumbe hi nga ha nyika van’wana va le bandlheni tidyondzo leti hi ti sungulaka. Loko u lava ku fambisa dyondzo ya Bibele, ha yini u nga ringeti ku endla nyiko ya dyondzo ya Bibele eka van’wana lava u hlanganaka na vona evutirhelini bya yindlu ni yindlu? Emhakeni yin’wana muhuweleri u endle riendzo ro vuyela eka wanhwana wa kondlo-a-ndzi-dyi loyi a a nga tsakeli ngopfu. Hambi swi ri tano, muhuweleri u endle nyiko ya dyondzo ya Bibele ivi a yi amukela. Sweswi u khuvuriwile, naswona sesi wa yena ni nuna wa sesi wa yena na vona va va kona eminhlanganweni.—Vagal. 6:6.
4 A hi hinkwavo lava hi sungulaka dyondzo na vona lava nga ta ya emahlweni va dyondza. A hi hinkwavo lava dyondzaka lava nga ta ta entiyisweni. Kambe van’wana va ta ta. Loko hi sungula tidyondzo to tala, swi nga ha koteka swinene ku pfuna van’wana va va vadzunisi va Yehova.