Xana Ku Tsakela Ku Nga Pfuxetiwa?

¹ “Ku katekile lava va khathalelaka xilaveko xa vona xa moya.” (Mt. 5:3, NW) Marito wolawo ya Yesu eka Dyondzo ya le Ntshaveni i ya nkoka. A va talanga vanhu lava lemukaka leswaku i swilo swa moya leswi lavekaka leswaku vutomi bya vona byi tsakisa, byi va ni xikongomelo. Ku na van’wana lava tshameke va khathalela swilaveko swa moya kambe va tlheleke va tshika ku swi khathalela. Nchumu wun’wana wu va endle va tsana etimhakeni ta moya. Va fularhele lexi xi nga va pfunaka hakunene. Xivutiso hi lexi, Xana ku tsakela ka vanhu volavo ku nga pfuxetiwa? Lexi tsakisaka eka van’wana ku nga pfuxetiwa.

² Swi nga ha endleka u tiva un’wana loyi a dyondzeke Bibele ni Timbhoni ta Yehovha malembe lama hundzeke, kumbexana loko a ha ri ntsongo, kambe a nga hambetanga a hlanganyela ni vanhu va Xikwembu. Hambi swi ri tano, tidyondzo tin’wana ta Bibele ni misinya ya milawu yo lulama, yi nga ha va yi nghenile emianakanyweni ya yena naswona wa ha yi tsundzuka. Tanihi leswi swiyimo swa misava swi yaka swi biha ni tindlela ta vutomi ti hundzukaka, swilo leswi dyondziweke eku sunguleni swa tsundzukeka naswona munhu a nga ha ya eka Xikwembu ivi a lunghekela ku va ni vutivi byin’wana bya Bibele. Ku endzela vanhu vo tano hi xikongomelo xo pfuxeta dyondzo ya Bibele swi nga ha vuyerisa swinene.

³ Entiyisweni matshalatshala ma fanele ma endliwa nkarhi na nkarhi leswaku hi endzela lava veke kona eXitsundzuxweni. Va kombe leswaku u khumbeka ngopfu hi vuhlayiseki bya vona bya moya ivi u kombela ku dyondza Bibele na vona. Ku fanele ku endliwa matshalatshala yo hlawuleka yo pfuna lava a va ri kona entsombanweni wa muganga kumbe nhlengeletano ya xifundzha. Minkarhi yin’wana swi nga ha pfuna leswaku muhuweleri a endzela munhu loyi dyondzo yakwe yi yimisiweke hi ku va a nga endli nhluvuko.

⁴ Kavula, vanhu lava hi dyondzaka na vona va languteriwa leswaku va teka vugandzeri bya Yehovha byi ri bya nkoka naswona va kombisa ku hiseka eka dyondzo ya vona ya Bibele. Kambe hina, hi fanele hi tiyiseka leswaku hi endle matshalatshala lama eneleke yo pfuna, ni leswaku hi nga vula eka van’wana hi laha muapostola Pawulo a vuleke ha kona loko a te, “A ndzi na nandzu engatini ya vanhu hinkwavo.”—Mint. 20:26, NW.