Marungula Lama Pfuxaka Ku Tsakela
1 Nkarhi hinkwawo hi fanele hi kombisa ku tsakela loku kufumelaka, ka hina vini, evanhwini lava hi va kumaka evutirhelini bya nsimu. Ku kombela ku twa mavonelo ya vona etimhakeni to karhi swi kombisa ku xixima mavonelo ya vona. Mhaka leyi hi vulavulaka ha yona ni swivutiso leswi hi swi tlakusaka swi nga ha tlhontlha mianakanyo ya vona, swi va endla va lava ku dyondza leswi engetelekeke hi Xikwembu ni xikongomelo xa xona hi vanhu.
2 Hi September hi ta va hi yisa nyingiso eka ntiyiso mayelana ni Muvumbi wa hina ni xikongomelo xakwe xa ku hundzula misava leyi yi va paradeyisi loko hi fambisa buku leyi nge U Nga Hanya Hi Masiku aParadeyisini eMisaveni. Vo tala va hina hi yi toloverile buku leyi. Hambi swi ri tano, tinyike nkarhi wo pfuxeta buku leyi hi wexe, ivi u hlawula tinhla to karhi, leti u nga ta ti kandziyisa. Loko u bula hi rungula leri nga ebukwini leyi nge Hanya Hi Masiku, yi pfule u yi tamerisa n’wini wa muti. Kombetela eka tinhloko-mhaka ni swifaniso swo karhi. Hiseka loko u kombisa ntikelo wa buku leyi.
3 Endzhaku ko titivisa kahle, u nga ha ku:
◼ “Xana u vona onge ku laveka yini leswaku vanhu va kuma ku rhula ni ntsako wa ntiyiso eka misava leyi? [Yimela nhlamulo.] Bibele yi vula leswaku hi fanele hi chava Xikwembu ni ku pfumela leswaku hi xona Muvumbi wa matilo ni misava.” Hlaya Nhlavutelo 14:7, kutani u pfula buku leyi nge Hanya Hi Masiku eka tluka 8, u hlaya ndzimana 6, u kandziyisa mhaka ya leswaku misava leyi a yi akiwanga hi ndlela leyi Muvumbi wa yona a yi lavise xiswona. Hi ku ya hi ku tsakela ka n’wini wa muti u nga tlhela u hlaya ndzimana 10 eka tluka 10 ivi u hlamusela swifaniso leswi nga eka matluka 11-13. Hlamusela munhu leswaku paradeyisi ya la misaveni yi ta va kona ku nga ri khale. Fambisa buku, u endla ni malunghiselelo ya ku tlhela u vuya laha ku tsakela ku kombisiweke kona.
4 Kumbexana u nga ha ku:
◼ “Xana u tshame u tivutisa leswaku ha yini hi dyuhala ni ku fa? Mirhi yin’wana yi hanya magidi ya malembe. Kambe vanhu va hanya malembe ya 70 kumbe 80 ntsena kutani va fa. Xana u tshame u tivutisa leswaku swi vangiwa hi yini? [Yimela nhlamulo.] Laha eka Varhoma 5:12 Bibele yi hi nyika nhlamulo. [Hlaya.] Xana xiyimo lexi xi ta hundzuka? Nhlamulo i ‘Ina’ hi laha yi rhekhodiweke ha kona eka Nhlavutelo 21:3, 4. [Hlaya.]” Humesa buku leyi nge Hanya Hi Masiku, u kombisa nhloko-mhaka ya yona kutani u pfula eka swifaniso leswi nga eka tluka 162. Endzhaku ko hlamusela swifaniso leswi u nga ha hlaya tindzimana 19 na 20 eka tluka 165. Komba n’wini wa muti leswaku buku leyi yi nga n’wi pfuna njhani yena ni ndyangu wakwe leswaku va hanya enkarhini lowu ku nga ta ka ku nga ha vi na rifu ni loko misava hinkwayo yi ta va yi endliwe paradeyisi. Fambisa buku ivi u endla malunghiselelo lama tiyeke ya ku vuya.
5 Loko n’wini wa muti a vonaka a byi kanakana vukona bya Muvumbi, u nga ha ku:
◼ “Vanhu lavanyingi va ehleketa hi ndlela yoleyo, ngopfu-ngopfu hikwalaho ka maxangu hinkwawo ya misava. Loko Xikwembu xi ri kona, hikwalaho ka yini xi pfumelela ku xaniseka? Xana ku ni nhlamuselo yo karhi leyi twisisekaka, leyi u yi anakanyaka?” Hi ku ya hi nhlamulo yakwe, u nga ha swi kota ku ya emahlweni hi ku tirhisa ndzima 11 ya buku leyi nge Hanya Hi Masiku leswaku u yisa bulo emahlweni. Tinhlamulo leti engetelekeke to pfuna eka xivutiso lexi ti nga kumeka ebukwini leyi nge Reasoning, matluka 399-400.
6 Xikongomelo xa hina a hi ku pfuxa ku tsakela rungula ra Mfumo ntsena kambe ni ku sungula tidyondzo ta Bibele. Vona ndlela leyi hi tsakaka ha yona ku va ni buku leyi yi tsariweke kahle leyi hlamuselaka ntiyiso mayelana ni Muvumbi wa hina Lonkulu ni xikongomelo xakwe xa ku hundzula misava yi va paradeyisi! Onge hi nga yi tirhisa kahle eku pfuxeni ka ku tsakela ka vanhu lavanene lava hi hlanganaka na vona hi September.