Bokisi Ra Swivutiso

◼ Xana hi rihi endlelo leri faneleke ri landzeleriwa loko ku tivisiwa swiboho evandlheni?

 Xiboho xa laveka loko ku fanele ku kunguhatiwa timhaka ta nkoka to fana ni ku xava nhundzu, ku pfuxetiwa ka Holo ya Mfumo kumbe ku aka leyintshwa, ku rhumeriwa ka minyikelo yo hlawuleka eka Sosayiti, kumbe ku khathaleriwa ka mali ya mulanguteri wa xifundzha. Hakanyingi i swinene ku tivisa xiboho xo tano ku vona loko xi amukeriwa kumbe xi nga amukeriwi nkarhi na nkarhi loko ku tirhisiwa timali ta vandlha.

 Loko swi koteka, vandlha ri nga ha boha ku hlenga mali yo karhi n’hweti na n’hweti yi ya eka Sosayiti ehenhla ka leyi munhu ha un’we a yi humesaka leswaku yi va ya ntirho wo chumayela wa misava hinkwayo. Nakambe, hi ntolovelo mali leyi tirhisiwaka eHolweni ya Mfumo, ku fana ni ku lunghisiwa ka swilo leswi tirhisiwaka ni swilo swo basisa a yi lavi leswaku ku endliwa xiboho.

 Loko xilaveko xi va kona, huvo ya vakulu yi fanele yi tlhuvutsa mhaka leyi. Loko vo tala va pfumela leswaku ku fanele ku endliwa xo karhi, un’wana wa vakulu, kumbexana xirho xa Komiti ya Ntirho ya Vandlha, xi fanele xi lunghiselela xiboho lexi tsariweke leswaku xi tivisiwa eNhlanganweni wa Ntirho.

 Nkulu loyi a nga ta va a ri mutshama-xitulu u fanele a xi hlamusela hi ku komisa, a hlamusela hi ndlela leyi twalaka xilaveko lexi nga kona ni leswi huvo ya vakulu yi swi bumabumeleke leswaku ku khathaleriwa xilaveko lexi. Kutani vandlha ri nyikiwa nkarhi wa ku vutisa swivutiso leswi yelanaka ni mhaka leyi. Loko mhaka ya kona yi tika, swi nga ha va swinene leswaku nhlawulo wu vekeriwa Nhlangano lowu landzelaka wa Ntirho leswaku un’wana ni un’wana a kuma nkarhi wa ku ehleketisisa hi swona. Ku hlawula ka xiviri ku endliwa hi ku tlakusa mavoko.

 Loko ku endliwa xiboho, ku hlawula ku endliwa hi swirho swa vandlha leswi tinyiketeleke, leswi khuvuriweke, handle ka loko xilaveko xa nawu wa tiko xi swi kongomisa hi ndlela yo karhi, tanihi laha swi nga ha vaka ha kona loko ku tiwa etimhakeni ta nhlangano wo karhi kumbe leti khumbaka mali leyi lombiweke ya Holo ya Mfumo. Swi ta va swi nga fanelanga leswaku vaendzi lava humaka eka mavandlha man’wana va hlanganyela.

 Endzhaku ka loko xiboho xi amukeriwile, xi fanele xi tsariwa siku, xi sayiniwa ivi xi vekiwa etifayilini ta vandlha.