Bokisi Ra Swivutiso

◼ Hikwalaho ka yini hi fanele hi vika ntirho wa hina wa nsimu hi ku hatlisa n’hweti yin’wana ni yin’wana?

Hinkwerhu ha tsaka loko hi twa swilo leswinene leswi endliwaka eku chumayeleni ka rungula ra Mfumo. (Vona Swivuriso 25:25.) Mintirho 2:41 yi vika leswaku endzhaku ka nkulumo ya Petro leyi nyanyulaka hi siku ra Pentekosta, “ku engeteriwe mimoya-xiviri ya kwalomu ka magidi manharhu.” Endzhakunyana, nhlayo yoleyo yi fike eka “ntlhanu wa magidi.” (Mint. 4:4, NW) Vona ndlela leyi swiviko sweswo swi faneleke swi tsakise ha yona eka Vakreste va lembe-xidzana ro sungula! Namuntlha hi titwa hi ndlela yoleyo loko hi twa swiviko leswi tsakisaka. Ha tsaka loko hi twa hi ta ku humelela ka vamakwerhu eku chumayeleni ka mahungu lamanene emisaveni hinkwayo.

Tanihi leswi ku tirhisiwaka nkarhi wo tala ni matshalatshala eku hlengeletiweni ka swiviko swo tano, ntirhisano wa muhuweleri un’wana ni un’wana wa Mfumo i wa nkoka. Xana u tikarhatela ku yisa xiviko xa wena hi ku hatlisa n’hweti na n’hweti?

Swiviko swa ku andza swi hi tisela ntsako lowukulu. Ku engetela kwalaho, swiviko swi pfuna Sosayiti leswaku yi xiya nhluvuko wa ntirho wa misava hinkwayo. Ku fanele ku endliwa swiboho swa leswaku hi kwihi ku lavekaka mpfuno lowu engetelekeke ni muxaka wa tibuku leti faneleke ti humesiwa ni nhlayo ya tona. Vakulu va vandlha rin’wana ni rin’wana va tirhisa swiviko swa ntirho wa nsimu leswaku va vona laha ku nga antswisiwaka kona. Swiviko leswinene swa aka, swi khutaza hinkwerhu ka hina leswaku hi kambisisa vutirheli bya hina vini leswaku hi vona lomu hi nga antswisaka kona.

Vahuweleri hinkwavo va fanele va xiya vutihlamuleri bya vona vini leswaku va yisa xiviko xa ntirho wa nsimu hi ku hatlisa n’hweti yin’wana ni yin’wana. Vafambisi va Dyondzo ya Buku ya Vandlha va nga tsundzuxa vahuweleri mayelana ni vutihlamuleri lebyi, tanihi leswi na vona va kotaka ku nyikela mpfuno wa munhu hi xiyexe eka lava va nonon’hweriwaka eku hlanganyeleni entirhweni wa nsimu nkarhi na nkarhi n’hweti yin’wana ni yin’wana. Xitsundzuxo lexi xi nga nyikeriwa eka dyondzo ya buku yo hetelela n’hweti yin’wana ni yin’wana kumbe nkarhi wun’wana lowu faneleke. Loko ku nga ri na nkarhi wo yisa swiviko swa ntirho wa nsimu eHolweni ya Mfumo, mufambisi wa Dyondzo ya Buku ya Vandlha a nga swi hlengeleta ivi a tiyiseka leswaku swi nyikiwa matsalana hi nkarhi leswaku swi ta nghenisiwa ni xiviko xa vandlha xa n’hweti na n’hweti lexi yaka eka Sosayiti.

Ku tikarhatela ka hina ku vika ntirho wa hina wa nsimu hi ku tshembeka naswona hi ku hatlisa swi endla ntirho wa lava nga ni vutihlamuleri bya vuhlayiseki bya hina bya moya wu olova.