Ku Laveka—Maphayona Ya Nkarhinyana Yo Ringana 10 000 Xana U Nga Phayona Nkarhinyana Hi March? Hi April? Hi May?
1 “Ku Laveka Vachumayeri Vo Ringana 1000,” leyi a ku ri nhloko-mhaka ya nkandziyiso wa Watch Tower ya April 1881. A yi kombela vavanuna ni vavasati hinkwavo lava tinyiketeleke, “lava Hosi yi va byarhiseke vutivi bya ntiyiso wa Yona,” leswaku va tirhisa nkarhi wihi na wihi lowu va nga na wona ku hangalasa ntiyiso wa Bibele. Lava nga kotaka ku nyikela hafu kumbe ku tlula ya nkarhi wa vona hi ku hlawuleka entirhweni wa Hosi a va khutaziwa ku tinyiketela ku va vaevhangeli va makhalipotiya—varhangeri va maphayona ya namuntlha.
2 Hambileswi minkarhi yi nga cinca ku sukela hi va-1800, ku na mhaka yin’we leyi nga cinciki—malandza ya Xikwembu lama tinyiketeleke ma lava ku ya emahlweni ma tirhisa nkarhi wo tala hilaha ma nga kotaka hakona eku hangalaseni ka mahungu lamanene. Ku tirha tanihi maphayona ya nkarhinyana swi endla vahuweleri va vandlha leswaku va antswisa vuswikoti bya vona loko va engetela nkarhi evutirhelini bya Mfumo.—Kol. 4:17; 2 Tim. 4:5.
3 Ku sukela eku sunguriweni ka byona, vuphayona bya nkarhinyana byi tsakeriwe hi madzana ya magidi ya vamakwerhu va xinuna ni va xisati. Ku hisekela xiyenge lexi xa vutirheli bya vuphayona ku andzile ku fikela laha hi April 1990 ku fikeleriweke nhlohlorhi yo tlula 10000 wa maphayona ya nkarhinyana eAfrika Dzongai! Ku sukela enkarhini wolowo ku ve ni ku andza ka vahuweleri ematikweni hinkwawo lama nga ehansi ka rhavi ra hina naswona sweswo swi ta endla leswaku nhlayo leyi yi fikeleriwa hi ku olova. Kunene hi nga swi kota ku tlhela hi endla matshalatshala lawa lamanene hi nguva ya ntirho wo hlawuleka hi 1997.
4 Hi mi khutaza leswaku mi va ni pakani ya vuphayona bya nkarhinyana eka yin’wana ya tin’hweti leti ta March, April na May kumbe hinkwato ka tona. Ha yini ku katsiwa March? Hikuva nan’waka Xitsundzuxo xa rifu ra Kreste xi ta va hi Sonto, March 23. Ku hava ndlela yin’wana yo antswa yo tirhisa mavhiki ya le mahlweni ka Xitsundzuxo ku tlula ku hlanganyela hi ku hiseka entirhweni wo chumayela hi Mfumo lowu sunguriweke hi Hosi tlhelo Muponisi wa hina, Yesu Kreste. Loko hi ri karhi hi nyikela vumbhoni hi mpimo lowukulu hi March, hi nga rhamba vanhu vo tala lava tsakelaka leswaku va hlanganyela na hina eku tsundzukeni ka rifu ra Kreste. Nakambe n’hweti ya March yi ta va yi hlawulekile hikuva hi ta va hi sungula ku fambisa buku leyintshwa, leyi nge Xihundla Xa Ntsako eNdyangwini. Ku engetela kwalaho, n’hweti ya March yi ni Migqivela ya ntlhanu ni Tisonto ta ntlhanu, leswi nga ta endla leswaku ku va ni mahelo-vhiki yo tala ya ntirho wa nsimu. Kavula, hi April na May, loko hi hambeta hi hlanganyela hi ku hiseka evutirhelini swi ta hi pfuna leswaku hi landzela ku tsakela loku hi ku kumeke ni ku sungula tidyondzo letintshwa ta le kaya ta Bibele, hi ku tirhisa broxara leyi nge I Yini Leswi Xikwembu Xi Swi Languteleke Eka Hina? Hi ta tlhela hi hlanganisa nsimu ya hina hinkwayo, ngopfu-ngopfu hi mahelo-vhiki, hi tirhisa timagazini ta sweswinyana leti nga enkarhini ta Xihondzo xo Rindza ni Xalamuka! Tsundzuka ku fambisa swikhokhelo swa timagazini letimbirhi to saseka, nkarhi wun’wana ni wun’wana leswaku vanhu lava tsakelaka va hambeta va kuma swakudya swa moya.
5 I Vamani Lava Fanelekaka Ku Va Maphayona Ya Nkarhinyana?: Buku leyi nge Ku Hleleriwa Ku Hetisisa Vutirheli Bya Hina, eka tluka 114, ya hlamusela: “Ku nga khathariseki leswaku swiyimo swa wena hi swihi, loko u khuvuriwile, u ri ni mahanyelo lamanene, u nga swi kota ku tirha tiawara ta 60 hi n’hweti evutirhelini bya nsimu naswona u tshemba leswaku u nga tirha n’hweti yin’we kumbe ku tlula tanihi phayona ra nkarhinyana, vakulu va vandlha va ta swi tsakela ku amukela xikombelo xa wena xa lunghelo leri ra ntirho.” Xana u nga swi kota ku amukela lunghelo leri ra ntirho hi March? hi April? hi May?
6 Langutelo lerinene ra huvo ya vakulu kun’we ni ku seketela ka vahuweleri hi mbilu hinkwayo, ku fanele ku endla leswaku xirhambo lexi xa maphayona ya nkarhinyana yo ringana 10000 xi amukeriwaka hilaha ku humelelaka. (Hev. 13:7) Tinhloko hinkwato ta mindyangu ti khutaziwa ku kumisisa kahle leswaku i vangani emindyangwini ya tona lava nga tsariselaka vuphayona bya nkarhinyana eka yin’wana ya tin’hweti leti landzelaka kumbe hinkwato ka tona.—Ps. 148:12, 13; ringanisa Mintirho 21:8, 9.
7 U nga hatliseli ku vula leswaku a wu nge swi koti ku nghenela vuphayona bya nkarhinyana hikwalaho ka leswi u tirhaka, u nghenaka xikolo, u nga ni vutihlamuleri bya ndyangu kumbe hikwalaho ka mindzhwalo yin’wana ya Matsalwa. Van’wana swi nga ha va tikela ku hlanganyela; kambe, hikwalaho ka ku hlela swilo kahle ni ku katekisiwa hi Yehovha, va nga humelela. (Ps. 37:5; Swiv. 16:3) Endla leswaku ku navela ka wena ku hlanganyela entirhweni wa vuphayona ku lawula swiyimo swa wena; u nga pfumeleli swiyimo swa wena swi lawula ku navela ka wena ku phayona. (Swiv. 13:19a) Kambe, hikwalaho ka ku rhandza ka vona Yehovha swinene ni vanhu-kulobye, vo tala va swi kota ku lulamisa tirhelo ra vona ra vutomi ra vhiki na vhiki leswaku va ta ndlandlamuxa vutirheli bya vona hi n’hweti yin’we. (Lk. 10:27, 28) Lava tikarhataka hi matimba entirhweni wa Mfumo va ta katekisiwa swinene.—1 Tim. 4:10.
8 Leswi Vuphayona Bya Nkarhinyana Byi Swi Endlaka: Ku tinyikela hi moya-xiviri hinkwawo loku magidi ya malandza ya Xikwembu ma ku endlaka hi ku phayona nkarhinyana swi endla leswaku ku dzunisiwa Yehovha swinene. Loko vahuweleri lava va Mfumo va tinyiketela ku hangalasa mahungu lamanene eka vanhu vo tala, va tshinela eka Yehovha swinene hikuva va dyondza ku titshega swinene hi yena ni hi moya wakwe naswona va katekisiwa.
9 Loko hi ri ni maphayona ya nkarhinyana, ya nkarhi hinkwawo ni yo hlawuleka swi endla leswaku vandlha ri va ni matimba lamantshwa. Ku hiseka ka vona ka khutaza loko va ri karhi va vulavula hi mintokoto ya vona ya le nsin’wini. Leswi swi susumetela van’wana leswaku va tlhela va kambisisa swilo leswi va swi rhangisaka emahlweni ni ku vona loko va ta swi kota ku ndlandlamuxa ku hlanganyela ka vona evutirhelini bya nkoka swinene. Makwerhu wa xisati la khuvuriweke a ri ni malembe ya 70 hi vukhale u sungule ku phayona nkarhinyana a nga ha tshiki. Loko a vutisiwile endzhaku ka malembe leswaku ha yini a hambeta a tinyiketela swinene evutirhelini tanihi phayona ra nkarhinyana n’hweti yin’wana ni yin’wana hambiloko a ri ni malembe yo tala swonghasi hi vukhale, u vule leswaku u titwa a tlangise malembe yakwe yo sungula ya 70, naswona a nga ha swi lavi ku tlangisa malembe wahi na wahi yakwe lama nga sala!
10 Munhu wihi na wihi la hlanganyelaka entirhweni wa vuphayona bya nkarhinyana u antswisa vutshila byakwe evutirhelini. Muntshwa un’wana la nga mbhoni u te: ‘Loko ndza ha ri xihlangi a ndzi hamba ndzi famba ni vatswari va mina emintirhweni ya vona yo chumayela. Ntirho wa nsimu a wu tsakisa swinene. Hambiswiritano, hi ku famba ka nkarhi, ndzi tikume ndzi hambane ni vana lavan’wana exikolweni. Kutani swi sungule ku ndzi nonon’hwela ku vulavula ni swichudeni-kulorhi hi ntiyiso. Loko ndzi chumayela hi yindlu ni yindlu, ndzi sungule ku tela hi miehleketo yo chava ku hlangana ni un’wana loyi ndzi nghenaka na yena xikolo. Loko ndzi swi languta ndzi vona onge a ndzi ri ni xiphiqo xo chava vanhu. [Swiv. 29:25] Loko ndzi hetile xikolo, ndzi endle xiboho xo ringeta ku phayona swa xinkarhana. Hikwalaho ka sweswo, ndzi sungule ku rhandza ku chumayela ku tlula eku sunguleni. A ndzi nga ha byi languti byi ri ntirho wo tlanga, kumbe ndzhwalo lowukulu. Loko ndzi vona swichudeni swa mina swa Bibele swi endla nhluvuko entiyisweni, ndzi titwa ndzi eneriseka hi ku tiva leswaku Yehovha Xikwembu a a seketela matshalatshala ya mina.’ Muntshwa loyi u ye emahlweni a tirha tanihi phayona ra nkarhi hinkwawo.
11 Entiyisweni, loko vo tala evandlheni va ri maphayona ya nkarhinyana, nsimu hinkwayo ya hlanganisiwa. Makwerhu la avelaka nsimu a nga kombela maphayona ya nkarhinyana leswaku ma pfuneta ku hlanganisa nsimu leyi nga tirhiwiki ngopfu. Ku famba ni timbuva loko mi ya tirha nsimu dyambu hinkwaro swi ta endla leswaku mi tirha ni lomu a mi nga ta fika kona.
12 Vakulu Va Fanele Va Lunghiselela Ka Ha Ri Na Nkarhi: Eka tin’hweti tinharhu hinkwato leti taka, ku fanele ku endliwa malunghiselelo ya xiyimiso xa ntirho wa ku nyikeriwa ka vumbhoni hi minkarhi yo hambana evhikini, ku katsa nindzhenga swinene ni loko ra ha ku mphimela, leswaku vahuweleri vo tala hilaha swi nga kotekaka hakona va kota ku hlanganyela. Ku tlhandlekela eku endleni ka ntirho wa ntolovelo wa yindlu na yindlu, katsa ni minkarhi ya ku nyikela vumbhoni exitarateni, ku tirha ensin’wini ya mabindzu ni ku tlhelela emakaya lama mi nga kumangiki munhu eka wona. Hi ku endla tano, vakulu va pfuna lava phayonaka leswaku va hlanganyela ensin’wini ni vandlha hi nkarhi lowu maphayona ma nga ta wu kota. Vandlha ri fanele ri tivisiwa malunghana ni malunghiselelo hinkwawo ya ntirho wa nsimu. Ku fambisiwa ka minhlangano ya ntirho wa nsimu ku fanele ku hleriwa kahle ni ku fambisiwa kahle hambiloko mavandlha ma ri na nhlangano hi Sonto. Ku engetela kwalaho, ku fanele ku kumeka nsimu leyi eneleke naswona ku fanele ku odiwa timagazini ni tibuku leti eneleke hi ku hatlisa.
13 Kunguhata Xiyimiso Xa Wena N’wini Xa Ntirho Wa Nsimu: Makwerhu un’wana loyi eku sunguleni a chava ku phayona nkarhinyana, u te: “Hakunene swi olova swinene ku tlula hilaha ndzi anakanyeke leswaku swi ta va ha kona. Swi lava xiyimiso lexinene ntsena.” Eka tluka ra le ndzhaku ra xiengetelo lexi, xana wa xi vona xiyimiso xa vuphayona bya nkarhinyana lexi nga xikombiso lexi nga ha ku pfunaka? Nkarhi lowu languteriweke eka phayona ra nkarhinyana evutirhelini i 15 wa tiawara ntsena hi vhiki.
14 Leswaku va kota ku tirha tanihi maphayona ya nkarhinyana, vamanana va mindyangu ni lava tirhaka ku sukela nindzhenga ku ya fika nivusiku va nga endla xiyimiso xo ya entirhweni wa nsimu nimixo. Vana va xikolo ni lava tirhaka ku sukela nivusiku kukondza ri xa, va nga endla ntirho wo chumayela nindzhenga. Lava tirhaka ntirho wa ku tihanyisa nkarhi hinkwawo va kume swi koteka ku kombela siku rin’we ra ntirho evhikini kumbe ku ya evutirhelini hi mahelo-vhiki hinkwawo, ku tlhandlekela eka ku nyikela vumbhoni nimadyambu. Vo tala lava endlaka ntirho wa vona wa nsimu hi mahelo-vhiki va hlawula tin’hweti leti nga ni mahelo-vhiki ya ntlhanu. Nan’waka tin’hweti ta kona i March, kun’we na August na November. Loko u tirhisa xiyimiso lexi nga tsariwangiki nchumu lexi nga eka tluka 6 lexi endleriweke ku ku kongomisa, swi anakanyisise kahle ni hi xikhongelo ehenhleni ka leswi wena hi wexe u nga ta swi endlisa xiswona.
15 Xin’wana lexi endlaka vuphayona bya nkarhinyana byi vuyerisa i ku pfumelelana ka byona ni swiyimo. U nga hlawula tin’hweti leti u nga phayonaka ha tona, naswona u nga tirha hi ku phindha-phindha hilaha u tsakelaka hakona. Loko u tsakela ku phayona nkarhinyana u nga wisi kambe u nga swi koti, xana u tshama u ehleketa hi ku tsarisela ku phayona etin’hwetini tin’wana elembeni? Hi hala tlhelo, van’wana va swi kota ku hambeta va va maphayona ya nkarhinyana ku ringana nkarhi wo leha.
16 Lunghiselela Vuphayona Bya Nkarhi Hinkwawo: Vo tala lava nga ni moya wa vuphayona va nga tsakela ku va maphayona ya nkarhi hinkwawo, kambe va tivutisa loko va ri ni nkarhi, swiyimo kumbe ntamu wo endla tano. Handle ko kanakana vo tala lava sweswi va nga maphayona ya nkarhi hinkwawo eku sunguleni va tirhise ntirho wa vuphayona bya nkarhinyana tanihi malunghiselelo ya ntirho wa nkarhi hinkwawo. Loko munhu a engetela xiyimiso xa vuphayona bya nkarhinyana hi awara yin’we ntsena eka siku rin’wana ni rin’wana, kumbe hi siku hinkwaro vhiki rin’wana ni rin’wana, swa koteka ku hetisisa xiyimiso xa vuphayona bya nkarhi hinkwawo. Leswaku u kota ku vona loko leswi swi ta ku tirhela, swi nga va njhani loko wo tirha 90 wa tiawara evutirhelini en’hwetini yin’we kumbe to tala ta vuphayona bya nkarhinyana? Hi nkarhi lowu fanaka, u ta va u endla maendzo yo vuyela ni tidyondzo ta Bibele, leswi nga ta endla leswaku u tiphina hi vutirheli bya wena bya vuphayona.
17 Makwerhu un’wana wa xisati u tiphine hi malembe ya tsevu ya vuphayona bya nkarhinyana. Nkarhi lowu hinkwawo a ku ri pakani yakwe ya ku nghenela ntirho wa vuphayona bya nkarhi hinkwawo. Hikwalaho ka xikongomelo xexo, u ringete mintirho ya mune yo hambana-hambana ya ku tihanyisa hi ntshembo wo sungula xiyimiso lexi nga ta n’wi pfuna leswaku a fikelela tiawara ta 90 leti a languteriweke tona. N’hweti yin’wana ni yin’wana, u endle xiyimiso xin’we kumbe swimbirhi leswaku a ta kota ku hlayela loko swi ta koteka. Kambe loko a swi kambisisa, u vone leswaku ntirho wa nkarhi hinkwawo a hi lowu a nga ta wu kota. Kambe, u hambete a kombela Yehovha leswaku a n’wi kongomisa. Kutani siku rin’wana loko a ri karhi a lunghiselela Nhlangano wa Ntirho, u hlaye xihloko lexi nga eka Vutirheli Bya Hina Bya Mfumo bya September 1991 lebyi nga te: “Ematshan’weni yo kandziyisa xilaveko xa tiawara swi nga fanelanga, swi nga va njhani loko wo yisa nyingiso eka nkarhi lowu engetelekeke wo hlanganyela entirhweni wo hlengeleta? (Yoh. 4:35, 36)” Wa hlamusela: “Ndzi hlaye xivulwa lexi ka ntlhanu kumbe ka tsevu, naswona a ndzi tshemba leswaku leyi a ku ri nhlamulo ya Yehovha. Hi nkarhi wolowo ndzi endle xiboho xo nghenela ntirho wa vuphayona bya nkarhi hinkwawo.” Hambileswi xiyimiso xa ntirho wakwe wo tihanyisa wa nkarhinyana a wu nga ri wa nkoka, u endle xikombelo xa vuphayona bya nkarhi hinkwawo. Endzhaku ka vhiki xiyimiso xakwe xi cinciwile, naswona u nyikiwe tiawara ta ntirho wa ku tihanyisa leti pfumelelanaka na yena. Wa gimeta, “Xana lowu a hi nkateko lowu humaka eka Yehovha ke?,” ivi a engetela a ku: “Loko u kombela nkongomiso wa Yehovha naswona u wu kuma, u nga wu balekeli—wu amukele.” Loko u swi navela hi mbilu hinkwayo ku phayona nkarhi hinkwawo, kumbexana eku heleni ka tin’hweti tinharhu ta ntirho wa vuphayona bya nkarhinyana sweswi hi March, April na May, u nga khorwiseka leswaku na wena u nga humelela evutirhelini bya nkarhi hinkwawo.
18 Ha tshemba leswaku Yehovha u ta katekisa ku hiseka ka vanhu vakwe naswona u ta va seketela loko va twarisa mahungu lamanene ya ku ponisiwa hi nkarhi wa ntirho wa ximun’wana lexi. (Esa. 52:7; Rhom. 10:15) Xana u ta amukela xirhambo xa maphayona ya nkarhinyana ya 10 000 lama lavekaka hi ku hlanganyela hi March? hi April? hi May?
Tindlela To Kota Ku Phayona Nkarhinyana
■ Vana ni ntshembo wa leswaku u ta humelela
■ Khongela Yehovha leswaku a katekisa matshalatshala ya wena
■ Kombela muhuweleri un’wana leswaku a phayona na wena
■ Endla xiyimiso lexi nga ta ku vuyerisa xa ntirho wa nsimu
■ Kuma timagazini leti ringaneleke
■ Seketela malunghiselelo ya vandlha ya ntirho
■ Lava minkarhi yo nyikela vumbhoni hi xitshuketa