Tirhisa Swiphephana Hi Ndlela Leyinene

¹ Swiphephana swa vandlha swi pfuna ngopfu eku tiviseni ka vanhu va tiko ndhawu ya Holo ya Mfumo ni nkarhi lowu faneleke wa minhlangano. I swinene ku xi nyika munhu un’wana ni un’wana loyi u hlanganaka na yena. Hikwalaho ka sweswo, vandlha rin’wana ni rin’wana ri fanele ri va ni swiphephana swo tala exitokweni. Eka mavandlha lama cincaka minkarhi ya minhlangano lembe na lembe hi January, ma fanele ma oda swiphephana leswintshwa hi October ya lembe rin’wana ni rin’wana leswaku swiphephana leswi tsariweke minkarhi leyintshwa swi ta kumeka. Fomo leyi nge Handbill Request yi fanele yi tirhisiwa loko ku odiwa swiphephana leswi. Loko mi ta va mi swi kumile, xana swiphephana swi nga tirhisiwa hi ndlela yihi leyi vuyerisaka?

² Vahuweleri vo tala va kuma leswaku ku nyika munhu xiphephana i ndlela leyi humelelaka yo sungula mabulo ni ku titivisa. Ku kombisa xiyimiso xa minhlangano kumbe rungula leri nga hala ndzhaku swi nga pfula ndlela yo bula hi ntirho wa hina ni xikongomelo xa wona. Vatswari va nga katsa vana va vona lavatsongo evutirhelini hi ku va nyika swiphephana leswaku va swi fambisa loko va ri ensin’wini. Vahuweleri lava hlanganyelaka eku nyikeleni ka vumbhoni hi ku tsala mapapila va fanele va xi hoxa epapileni ivi va rhambela munhu wa kona eminhlanganweni. Swi nga ha fanela leswaku swiphephana swi siyiwa lomu ku nga riki na vanhu, ntsendze loko u va ni vukheta byo xi nghenisa ehansi ka rivanti laha xi nga ta ka xi nga voniwi hi vanhu.

³ Swiphephana swi vile switirho leswinene swo kongomisa vanhu va timbilu letinene entiyisweni. Ntokoto wun’wana wu kombisa ndlela leyi wansati un’wana, hikwalaho ka xiphephana, a koteke ku enerisa ku navela ka yena ko twisisa Bibele evuton’wini byakwe. Endzhaku ka loko a hete vusiku hinkwabyo a khongela eka Xikwembu, mpatswa wa Timbhoni wu gongondze erivantini rakwe mixo lowu landzelaka. Loko a hlometela hi le mbhoveni, u huwelerile a vula leswaku a nge va pfuleli. Timbhoni ti hoxe xiphephana ehansi ka rivanti. A xi hlayeka hi ndlela leyi: “Twisisa Bibele Ya Wena.” Loko a xi vonile u pfule rivanti. Ku sunguriwe dyondzo xikan’we-kan’we, naswona eku heteleleni u khuvuriwile. Hi nga wu tekeli ehansi ntamu wa moya wa Xikwembu, onge nkarhi na nkarhi hi nga swi tirhisa kahle swiphephana loko hi ri karhi hi hetisisa vutirheli hi xitalo.—Nakambe vona Vutirheli Bya Hina Bya Mfumo bya February 1994, tluka 1.