Mihlangano Ya Ntirho Wa Nsimu Leyi Hetisisaka Xikongomelo Xa Yona

1. Hi xihi xikongomelo xa mihlangano ya ntirho wa nsimu?

¹ Siku rin’wana, Yesu u hlengelete vadyondzisiwa vakwe va 70 loko va nga si ya eku chumayeleni. (Luka 10:1-11) U va khutazile hi ku va tsundzuxa leswaku a va nga ta va voxe nileswaku a va ta kongomisiwa hi “N’wini wa ntshovelo,” ku nga Yehovha. U tlhele a va nyika swileriso leswi va endleke va lunghekela ntirho wolowo, ivi a va rhuma “hi vambirhi-mbirhi.” Ninamuntlha, xikongomelo xa mihlangano leyi hi vaka na yona loko hi nga si ya ensin’wini xa fana, i ku hi khutaza, ku hi hlomisa ni ku hi endla hi hleleka.

2. Nhlangano wa ntirho wa nsimu wu fanele wu teka timinete tingani?

² Sweswi nhlangano wa ntirho wa nsimu wu teka 10 ku ya eka 15 wa timinete, laha ku katsekaka ku ava vamakwerhu, ku va byela leswaku nsimu yi tirhiwa kwihi ni ku pfala hi xikhongelo. Hambiswiritano, swilo se swa cinca. Ku sukela hi April, nhlangano wa ntirho wa nsimu wu ta teka ntlhanu ku ya eka nkombo wa timinete. Kambe loko wu khomiwa endzhaku ka mihlangano yin’wana ya vandlha, wu fanele wu koma swinene, tanihi leswi lava nga ta va va ri kona eka nhlangano wolowo va nga ta va va tiphine hi bulo lerinene leri sekeriweke eMatsalweni. Ku va ni mihlangano yo koma ya ntirho wa nsimu swi ta endla leswaku hinkwavo lava yaka ensin’wini va tirha nkarhi wo leha. Ku engetela kwalaho, loko maphayona kumbe vahuweleri se va sungurile ku tirha nsimu emahlweni ka ku va nhlangano wa ntirho wa nsimu wu sungula, va ta kavanyeteka katsongo ntsena.

3. Mihlangano ya ntirho wa nsimu yi nga hleriwa njhani hi ndlela leyi nga ta va pfuna swinene vahuweleri?

³ Mihlangano ya ntirho wa nsimu yi fanele yi hleriwa hi ndlela leyi nga ta va pfuna swinene vahuweleri. Emavandlheni yo tala, swa pfuna loko mintlawa ya vamakwerhu lava yaka ensin’wini yi hlangana etindhawini leti hambaneke ematshan’weni yo hlangana endhawini yin’we. Leswi swi nga ha endla leswaku swi va olovela vahuweleri ku ya enhlanganweni wa ntirho wa nsimu kumbexana ni le nsin’wini leyi yi tirhiwaka. Vahuweleri va nga aviwa hi ku hatlisa, naswona swi nga ha va olovela valanguteri va mintlawa ku va pfuna kahle vanhu lava nga eka ntlawa wa vona. Huvo ya vakulu yi nga ha kambisisa swiyimo swa le ndhawini ya vona kutani yi vona leswaku hi swihi leswi tirhaka. Vamakwerhu hinkwavo lava yaka ensin’wini va fanele va swi tiva leswaku ku tirhiwa kwihi ni leswaku va famba na mani loko ku nga si pfariwa hi xikhongelo xo koma.

4. Ha yini mihlangano ya ntirho wa nsimu yi fanele yi tekiwa yi ri ya nkoka ku fana ni mihlangano leyin’wana?

⁴ I Ya Nkoka Ku Fana Ni Mihlangano Leyin’wana Ya Vandlha: Leswi xikongomelo xa mihlangano ya ntirho wa nsimu ku nga leswaku vanhu lava yaka ensin’wini va vuyeriwa, a swi bohi leswaku hinkwavo lava a va ri kona emihlanganweni ya vandlha va va kona eka yona. Hambiswiritano, yi fanele yi tekiwa yi ri ya nkoka ku fana ni mihlangano leyin’wana ya vandlha. Ku fana ni mihlangano ya hina hinkwayo, mihlangano ya ntirho wa nsimu i lunghiselelo leri humaka eka Yehovha leri endlaka leswaku hi kota ku khutazana erirhandzwini ni le mintirhweni leyinene. (Hev. 10:24, 25) Hikwalaho, mufambisi wa yona u fanele a va a lunghiselele kahle leswaku bulo rolero ri ta yisa ku dzuneka eka Yehovha ri tlhela ri vuyerisa lava nga ta va va ri kona. Loko swi koteka, vahuweleri lava yaka ensin’wini va fanele va tikarhatela ku va kona eka mihlangano leyi.

Mihlangano ya ntirho wa nsimu yi fanele yi tekiwa yi ri ya nkoka ku fana ni mihlangano leyin’wana ya vandlha

5. (a) Mulanguteri wa ntirho u fanele a yi hlela njhani mihlangano ya ntirho wa nsimu? (b) Makwerhu wa xisati u fanele a wu fambisa njhani nhlangano wa ntirho wa nsimu?

⁵ Ndlela Leyi Mufambisi A Faneleke A Lunghiselela Ha Yona: Leswaku munhu a swi lunghekela kahle ku nyikela nkulumo enhlanganweni, u fanele a nyikiwa xiavelo xa yena ka ha ri ni nkarhi. Swi tano ni hi mihlangano ya ntirho wa nsimu. Loko mintlawa ya ntirho wa nsimu yi hlangana etindhawini leti hambaneke, valanguteri va mintlawa kumbe lava va pfunaka hi vona va faneleke va fambisa nhlangano wa ntlawa wa vona. Hambiswiritano, loko vandlha ri ta va ni nhlangano wa ntirho wa nsimu endhawini yin’we, mulanguteri wa ntirho u ta avela un’wana leswaku a wu fambisa. Valanguteri van’wana va ntirho va nyika vafambisi hinkwavo swiyimiso swa vona ivi xin’wana va xi nameka ebodweni ya rungula. Mulanguteri wa ntirho u fanele a va ni vuxiyaxiya loko a avela vafambisi, a nga fanelanga a rivala leswaku xin’wana lexi nga ta endla leswaku mihlangano yoleyo yi va leyi vuyerisaka i vuswikoti byo dyondzisa ni ku hleleka ka lava va yi fambisaka. Loko ku nga ri na nkulu, nandza wa vutirheli kumbe makwerhu un’wana wa xinuna la fanelekaka la khuvuriweke, loyi a nga averiwaka ku yi fambisa hi masiku yo karhi, mulanguteri wa ntirho u fanele a avela makwerhu wa xisati la khuvuriweke la nga ni vuswikoti leswaku a yi fambisa.—Vona xihloko lexi nge “Loko Makwerhu Wa Xisati A Fanele A Fambisa Nhlangano Wa Ntirho Wa Nsimu.”

6. Ha yini swi ri swa nkoka leswaku makwerhu la averiweke ku fambisa nhlangano wa ntirho wa nsimu a lunghiselela kahle?

⁶ Loko hi nyikiwa nkulumo eXikolweni xa Vutirheli bya le Tilweni kumbe eka Nhlangano wa Ntirho, hi yi teka yi ri ya nkoka naswona hi lunghiselela kahle. Vo tala va hina a hi nge sunguli ku anakanya hi leswi hi nga ta swi vula loko se hi ri endleleni yo ya emihlanganweni. Xiavelo xo fambisa nhlangano wa ntirho wa nsimu na xona hi fanele hi xi teka hi ndlela leyi fanaka. Leswi nhlangano wa ntirho wa nsimu wu nga ta va se wu komile, i swa nkoka swinene ku lunghiselela kahle leswaku nhlangano wolowo wu ta va lowu vuyerisaka naswona wu hela hi nkarhi lowu faneleke. Nakambe ku lunghiselela kahle swi katsa ku tiva laha nsimu yi tirhiwaka kona ka ha ri emahlweni.

7. Hi swihi swilo swin’wana leswi mufambisi wa nhlangano wa ntirho wa nsimu a nga bulaka ha swona?

⁷ Leswi Mi Nga Bulaka Ha Swona: Leswi swiyimo swi hambanaka hi ku ya hi tindhawu, hlonga ro tshembeka a ri tsalanga nxaxamelo wa leswi ku nga buriwaka ha swona eka nhlangano wun’wana ni wun’wana wa ntirho wa nsimu. Bokisi leri nge, “Leswi Mi Nga Ha Bulaka Ha Swona Hi Nkarhi Wa Nhlangano Wa Ntirho Wa Nsimu,” ri hlamusela swin’wana swa swona. Hi ntolovelo, eka nhlangano wolowo ku fanele ku burisaniwa. Minkarhi yin’wana, ku nga ha katsiwa nkombiso lowu lunghiseleriweke kahle kumbe vhidiyo leyi faneleke leyi kumekaka eka jw.org/ts. Loko mufambisi wa nhlangano wa ntirho wa nsimu a ri karhi a lunghiselela, u fanele a anakanya hi swilo leswi nga ta khutaza lava yaka ensin’wini hi siku rero swi tlhela swi va hlomisa.

Loko mufambisi wa nhlangano wa ntirho wa nsimu a ri karhi a lunghiselela, u fanele a anakanya hi leswi nga ta khutaza vamakwerhu siku rero swi tlhela swi va hlomisa

8. Hi swihi swilo leswi vuyerisaka leswi ku nga ha buriwaka ha swona eka mihlangano ya ntirho wa nsimu hi Migqivela ni hi Tisonto?

⁸ Hi xikombiso, hi Migqivela vahuweleri vo tala va fambisa Xihondzo xo Rindza ni Xalamuka! Vo tala lava yaka ensin’wini hi Migqivela a va humi exikarhi ka vhiki, hikwalaho swi nga ha va tikela ku tsundzuka xingheniso lexi va xi praktiseke eka Vugandzeri bya vona bya Ndyangu bya nimadyambu. Hikwalaho, swi nga ha va vuyerisa loko mufambisi a bula hi xin’wana xa swingheniso leswi nga emakumu ka Vutirheli Bya Hina Bya Mfumo. A nga ha tlhela a bula hi ndlela leyi va nga ma katsaka ha yona mahungu yo karhi ya le ndhawini yoleyo, xiendlakalo kumbe holideyi yo karhi loko va ri karhi va fambisa timagazini kumbe leswi va nga swi vulaka eka n’wini wa muti leswaku a lunghekela riendzo leri landzelaka loko a teke timagazini. Loko van’wana enhlanganweni wa ntirho wa nsimu se va sungule ku fambisa timagazini leti fambisiwaka, mufambisi wa wona a nga ha va kombela leswaku va vula swiringanyeto swo karhi swo koma kumbe va hlamusela mintokoto leyi khutazaka. Hi Tisonto, mufambisi wa nhlangano wa ntirho wa nsimu a nga ha hlawula ku bula hi swingheniso leswi fambisanaka ni minkandziyiso leyi fambisiwaka n’hweti yoleyo. Minkandziyiso leyi hi yi tirhiselaka ku fambisa dyondzo, yo tanihi broxara leyi nge Mahungu Lamanene ni leyi nge Yingisa Xikwembu ni buku leyi nge Leswi Bibele Yi Swi Dyondzisaka yi nga ha fambisiwa nkarhi wihi ni wihi, hikwalaho mufambisi wa nhlangano wa ntirho wa nsimu a nga ha bula katsongo hi ndlela leyi yin’wana ya minkandziyiso yoleyo yi nga ha fambisiwaka ha yona.

9. I yini leswi ku nga ha buriwaka ha swona hi mahelovhiki loko ku ri ni tsima ro hlawuleka?

⁹ Loko vandlha ri endla tsima ro hlawuleka hi mahelovhiki, mufambisi wa nhlangano wa ntirho wa nsimu a nga ha bula hi ndlela yo fambisa timagazini ta n’hweti yoleyo swin’we ni xirhambo kumbe xiphephana, kumbe a nga ha bula hi leswi vahuweleri va nga swi endlaka loko munhu a tsakela rungula ra hina. Xin’wana lexi nga endliwaka i ku va ku hlamuseriwa mintokoto leyi kombisaka nkoka wa matsima yo tano.

10, 11. Ha yini swi ri swa nkoka leswaku vahuweleri va lunghiselela leswaku nhlangano wa ntirho wa nsimu wu ta famba kahle?

¹⁰ Ndlela Leyi Vahuweleri Va Nga Lunghiselelaka Ha Yona: Vahuweleri na vona va fanele va hoxa xandla eku endleni ka leswaku nhlangano wa ntirho wa nsimu wu famba kahle. Loko va lunghiselela ka ha ri emahlweni, kumbexana hi nkarhi wa vugandzeri bya vona bya ndyangu, va ta va ni xo karhi xo xi byela vahuweleri van’wana. Ku lunghiselela kahle swi katsa ni ku kuma timagazini ni minkandziyiso va nga si ya enhlanganweni wa ntirho wa nsimu leswaku hinkwavo lava nga kona va ta namba va ya ensin’wini va nga dyi nkarhi swi nga fanelanga.

¹¹ Nakambe i swa nkoka ku kunguhata ku fika enhlanganweni wa ntirho wa nsimu wu nga si sungula. I ntiyiso leswaku hi tikarhatela ku fika hi nkarhi emihlanganweni hinkwayo ya vandlha. Hambiswiritano, swi nga kavanyeta malunghiselelo ya nsimu loko hi fika nhlangano wa ntirho wa nsimu se wu sungurile. Njhani? Makwerhu loyi a wu fambisaka u anakanyisisa hi swilo swo hlayanyana loko a nga si ava vamakwerhu. Loko ku ri ni vahuweleri va nga ri vangani, a nga ha hlawula leswaku vamakwerhu volavo va ya tirha nsimu leyi nga hetiwangiki. Loko van’wana va te hi milenge enhlanganweni wa ntirho wa nsimu naswona nsimu ya kona yi ri ekule, a nga ha ava vahuweleri volavo leswaku va famba ni lava teke hi timovha. Loko nsimu ya kona yi ri endhawini leyi nga ni vugevenga swinene, a nga ha ava vamakwerhu va xinuna leswaku va ya tirha ni vamakwerhu va xisati kumbe va tirha ekusuhi ni mintlawa ya vamakwerhu va xisati. Vamakwerhu lava lamaleke va nga ha averiwa ku tirha xitarata lexi fambekaka kumbe lexi nga ni tiyindlu leti nga riki na switepisi swo tala. Vahuweleri lava ha riki vantshwa va nga ha averiwa ku tirha ni lava nga ni ntokoto swinene. Kambe, loko vahuweleri van’wana va fika nhlangano wolowo se wu herile, hakanyingi swi nga ha lava leswaku van’wana va aviwa hi vuntshwa leswaku lava nga fikangiki hi nkarhi na vona va ta aviwa. I ntiyiso leswaku minkarhi yin’wana hi nga ha va hi nga fikanga hi nkarhi hikwalaho ka xivangelo lexi twalaka. Kambe, loko se ku ri ntolovelo wa hina ku nga fiki hi nkarhi, hi nga ha tivutisa loko ku ri hikwalaho ka leswi hi nga yi tlangeliki mihlangano ya ntirho wa nsimu kumbe hikwalaho ka leswi hi tsandzekaka ku hleleka.

12. Loko u tolovele ku tihlawulela munhu loyi u fambaka na yena ensin’wini, i yini leswi u faneleke u anakanyisisa ha swona?

¹² Vahuweleri lava hlanganaka leswaku va ta ya ensin’wini va nga tihlawulela munhu loyi va nga ta famba na yena emahlweni ka ku va nhlangano wu sungula kumbe va nga rindzela ku aviwa ni munhu un’wana. Loko u tolovele ku tihlawulela munhu loyi u nga fambaka na yena, xana u nga ‘ndlandlamuka’ hi ku tirha ni vahuweleri vo hambanahambana ematshan’weni yo tirha ni vanghana va wena lavakulu nkarhi ni nkarhi? (2 Kor. 6:11-13) Xana minkarhi yin’wana u nga hlela ku tirha ni muhuweleri lontshwa leswaku u ta n’wi pfuna ku endla nhluvuko eka ndlela leyi a dyondzisaka ha yona? (1 Kor. 10:24; 1 Tim. 4:13, 15) Yingiserisisa swiletelo leswi mi nga ta nyikiwa swona, ku katsa ni leswaku mi ya sungula kwihi ku chumayela. Loko nhlangano wu hela, tshikani ku cinca vanhu lava mi aviweke na vona kutani mi namba mi ya laha nsimu yi tirhiwaka kona.

13. Mihlangano ya ntirho wa nsimu yi ta hi vuyerisa njhani loko hinkwavo lava katsekaka va tikarhatela ku endla swiavelo swa vona?

¹³ Vadyondzisiwa va 70 lava Yesu a va rhumeke ku ya chumayela “va [vuye] va tsakile.” (Luka 10:17) A swi kanakanisi leswaku leswi Yesu a va byeleke swona loko va nga si ya chumayela swi va pfunile leswaku swilo swi va fambela kahle. Ninamuntlha, mihlangano ya ntirho wa nsimu yi nga endla hi va ni vuyelo lebyi fanaka. Mihlangano ya ntirho wa nsimu yi ta hi khutaza, yi hi hlomisa ni ku endla leswaku hi hleleka leswaku hi ta endla ntirho wa hina wo nyikela “vumbhoni ematikweni hinkwawo,” loko hinkwavo lava katsekaka va tikarhatela ku endla swiavelo swa vona.—Mat. 24:14.

Loko Makwerhu Wa Xisati A Fanele A Fambisa Nhlangano Wa Ntirho Wa Nsimu

Makwerhu wa xisati u fanele a ambala xo funengeta nhloko naswona u fanele a va a tshame ehansi loko a fambisa nhlangano wa ntirho wa nsimu. Leswi a hlawulaka ku bula ha swona swi ta va swi fana ni leswi makwerhu wa xinuna a a ta bula ha swona. Hambileswi a nga fanelangiki a endla onge u le ku dyondziseni ka lava nga kona eka nhlangano wolowo, a nga burisana ni ntlawa wolowo. Loko a kombela makwerhu un’wana wa xisati la khuvuriweke leswaku a ta khongela, makwerhu yoloye na yena u fanele a va a ambale xo funengeta nhloko. Loko ko fika makwerhu wa xinuna la khuvuriweke loko nhlangano wolowo se wu sungurile, makwerhu yoloye wa xisati u fanele a kombela makwerhu yoloye wa xinuna leswaku a ta hetisa nhlangano wolowo. Mulanguteri wa ntirho u fanele a ringeta ku langutela swiyimo leswi nga tolovelekangiki ivi a nyikela swiletelo leswi faneleke leswaku ku nga vi ni swiyimo leswi khomisaka tingana. Hi xikombiso, enhlanganweni lowu fambisiwaka hi makwerhu wa xisati ku nga ha va ku ri ni makwerhu wa xinuna la ha riki emalembeni ya vuntshwa loyi a khuvuriweke, kambe vakulu va nga ha vona onge makwerhu yoloye wa xinuna a nga si faneleka ku fambisa nhlangano wolowo. Eswiyin’weni swo tano, mulanguteri wa ntirho a nga ha byela makwerhu yoloye wa xisati swin’we ni makwerhu yoloye wa xinuna loyi a ha riki emalembeni ya vuntshwa leswaku makwerhu yoloye wa xisati u fanele a fambisa nhlangano wolowo, kambe makwerhu yoloye wa xinuna hi yena a faneleke a khongela loko vakulu va vona a faneleka. Kumbexana ku nga ha va ku ri ni makwerhu wa xinuna la kuleke loyi a nga pfumeleriwangiki ku fambisa nhlangano wolowo kumbe ku khongela evandlheni hikwalaho ka swivangelo leswi tiviwaka hi vakulu. Vakulu va fanele va byela vamakwerhu va xisati lava averiweke leswaku va fanele va fambisa nhlangano wolowo va tlhela va khongela hambiloko makwerhu yoloye wa xinuna a ri kona, handle ko byela vamakwerhu volavo va xisati swivangelo leswi nga xihundla leswi endlaka makwerhu yoloye a nga tirhisiwi. Vakulu va nga ha tlhela va byela makwerhu yoloye wa xinuna masiku lawa vamakwerhu va xisati va nga ta yi fambisa ha wona mihlangano ya ntirho wa nsimu.

Leswi Mi Nga Ha Bulaka Ha Swona Hi Nkarhi Wa Nhlangano Wa Ntirho Wa Nsimu:

Xingheniso lexi kumekaka eka Vutirheli Bya Hina Bya Mfumo.
Vhidiyo leyi vulavulaka hi nsimu leyi kumekaka eka jw.org/ts.
Xiyenge xo karhi xa xingheniso lexinene, xo tanihi masungulo, leswi hi nga swi vulaka eka n’wini wa muti leswaku a lunghekela riendzo ro vuyela kumbe ku n’wi hlamusela hi mhaka ya munyikelo loko a teke minkandziyiso ya hina.
Tsalwa leri khutazaka kumbe leri dyondzisaka leri fambisanaka ni ntirho wa nsimu.
Ntokoto wa le ntirhweni wa nsimu wa le ndhawini ya ka n’wina kumbe lowu nga eka minkandziyiso ya hina.
Rungula leri kumekaka eka xihloko xo karhi eka Vutirheli Bya Hina Bya Mfumo.
Rungula leri kumekaka eka nkulumo ya sweswinyana ya le ka Nhlangano wa Ntirho.
Rungula leri fambisanaka ni ntirho wa nsimu leri kumekaka eka Xihondzo xo Rindza.
Rungula leri fambisanaka ni ntirho wa nsimu leri kumekaka eka tibuku to tanihi leyi nge Xikolo Xa Vutirheli ni leyi nge ‘Tana U Va Mulandzeri Wa Mina.’
Mhaka yo karhi leyi kumekaka eka jw.org/ts leyi nga tirhisiwaka ensin’wini.
Mhaka yo karhi leyi nga tirhisiwaka ensin’wini leyi kumekaka eka Vuhundzuluxeri Bya Misava Leyintshwa lebyi pfuxetiweke. Vamakwerhu lava nga riki na byona va nga tirhisa rungula leri kumekaka eka xibukwana lexi nge, Xingheniso Xa Rito Ra Xikwembu (igw) ni lexi nge Xibukwana Xo Pfuneta Ku Dyondza Rito Ra Xikwembu (sgd).
Ndlela yo sungula bulo ni munhu wo karhi loyi mi nga ha n’wi kumaka ensin’wini ya n’wina, wo tanihi loyi a pfumelaka leswaku Xikwembu a xi kona, loyi a pfumelaka eka dyondzo ya ku tihundzukela ka swilo, Muhindu kumbe Mubudha.
Ndlela yo hlamula munhu wo karhi la lavaka ku siva bulo.
Ndlela yo pfuna munhu loyi u fambaka na yena ensin’wini leswaku a tirhisa xingheniso lexi kokaka rinoko ra n’wini wa muti.
Ndlela yo hlamula munhu la vulavulaka ririmi rin’wana loyi mi nga ha hlanganaka na yena ensin’wini.
Ku chumayela hi ndlela yo karhi leyi van’wana va nga ha vaka va yi tirhisa, yo tanihi ku lavisisa vanhu, ku chumayela hi riqingho, ku chumayela erivaleni, ku endla maendzo yo vuyela kumbe ku fambisa tidyondzo ta Bibele.
Xitsundzuxo malunghana ni vuhlayiseki, ku pfumelelana ni swiyimo, ku tikhoma hi ndlela leyinene, ku va ni langutelo lerinene kumbe swin’wana swo yelana ni sweswo.