Vantshwa Va Vutisa . . .

Ku Vuriwa Yini Hi Loko Mutswari Wa Mina A Ri Na Swihoxo?

“Tata wa mina u na khume ra malembe a ri Mukreste. Kambe a nga hiseki. A nga yi hlayi Bibele, naswona eminhlanganweni a nga yi minkarhi hinkwayo. U tshamela ku sola vamakwavo va Vakreste evandlheni. Naswona u na langutelo ra misava mayelana ni rixaka ni hi timhaka tin’wana to tala ngopfu. Ndzi anakanya leswaku u na swihoxo swo tala.”—Nhwanyana wa kondlo-a-ndzi-dyi.

KU HAVA mutswari la hetisekeke. “Vanhu hinkwavo va dyohile, hikokwalaho ku kwetsima loku a va nyikiwile hi Xikwembu, va ku pfumala,” ku vula Bibele. (Varhoma 3:23) Kambe leswi swi hambane hi ku helela ni loko manana kumbe tata wa wena a tiendla Mukreste exikarhi ka vanhu ivi a hundzuka mavala exihundleni. Nhwanyana un’wana lontsongo u ri: “Exikarhi ka vanhu, tatana u lulamile. Kambe loko a nga voniwi hi munhu umbe—u dyisa mbitsi! U sola-sola xin’wana ni xin’wana lexi ndzi xi endlaka, naswona u siringa un’wana ni un’wana endyangwini wa ka hina. Sweswi ndzi fike laha ndzi nga ha tsakeriki vutomi. Lexi ndzi xi anakanyaka ha yena i rivengo.”

Rivengo ni ku nyenyetseka swi nga ha va swikulu ngopfu eka vantshwa lava xanisiwaka hi ndlela yo karhi exihundleni. Xisweswo wansati la vitaniwaka Mary u tsala hi “vukarhi, nhlamba, ni ku xanisiwa hi tindlela hinkwato” loku a ku huma eka tata wakwe—xilovekelo xa le xihundleni. “Vanhu a va ta eka hina vana va kona ivi va hi byela hi ndlela leyi a hi kateke ha yona hi ku va ni tatana lonene swonghasi,” u swi tsundzuka a karhatekile.

Bibele yi sola mixaka hinkwayo ya vukanganyisi. (Yakobo 3:17) Yi hi tsundzuxa leswaku hambi exikarhi ka vagandzeri va Xikwembu va ntiyiso, ku ta va ni lava “fihlaka le’ŝi nge mbilwini.” (Pisalema 26:4; ringanisa Yuda 4.) Hambi swi ri tano, ku tiva leswi a swi nge antswisi swilo, loko loyi a endlaka vukanganyisi lebyi a ri mutswari wa wena n’wini—munhu loyi a a wu fanele u n’wi rhandza ni ku n’wi xixima. Vantshwa van’wana va karhatiwa swinene hi mintlhaveko leyi nga ha vaka kona. Nhwanyana un’wana lontsongo u te: “Ndzi kombela ku pfuniwa. Bibele yi ri ‘xixima tata wa wena,’ kambe swa ala.”

Leswi Ku Va Xixima Swi Vulaka Swona Hakunene

I ntiyiso leswaku xileriso xa Bibele xa ku xixima vatswari va wena a xi na ‘mpfumelelo wo xi honisa’ eka vantshwa lava va anakanyaka leswaku vatswari va vona a va faneriwi hi ku xiximiwa. (Vaefesa 6:1, 2) Hambi swi ri tano, ku xixima mutswari a swi vuli leswaku u pfumelelana ni mahanyelo kumbe leswaku u tsakisiwa hi ndlela leyi a ku khomaka ha yona. EBibeleni, “ku xixima” swi nga vula ntsena ku xiya xikhundla xa vulawuri lexi faneleke.

Hi xikombiso, muapostola Petro u tsale leswi Vakreste va faneleke ku swi endla, “xiximani hosi leyikulu ya tiko.” (1 Petro 2:17) Petro a a swi tiva kahle leswaku tihosi a ti ri vanhu va mahanyelo lama nga tsakisiki. Hi xikombiso, Hosi Heroda Agripa I, a ri munhu la tlangisaka swilo naswona a nga khathali ha nchumu. Endzhaku ko vekiwa hosi ya Palestina hi Rhoma, u sungule ku xanisa Vakreste. A “dlaya Yakobo makwavo wa Yohane hi fumu. Kutani loko a vona leswaku swi tsakisile Vayuda, a engeta a khoma na Petro.” (Mintirho 12:1-3) Kambe, Petro a nga byi khutazelanga vuxandzuki. Ku ri na sweswo, u khutaze ku xixima tihosi. Naswona u swi endle hi xivangelo lexinene. Ku yingisa vafumi va tiko i ku rhandza ka Yehovha. Naswona esikwini ra Petro tihosi tin’wana a ti ri ni matimba ni vulawuri lebyi heleleke. Solomoni u te: “Hikuv̌a yi endla hikwaŝo leŝi yi ŝi ṭakelaka. Hikuv̌a rito ra hosi ri ni matimba, kutani i mani l’a nga ta ku ka yena: U endla yini?”—Eklesiasta 8:3, 4.

Swi tano ni hi mutswari wa wena—ku nga khathariseki ku hoxisa ka yena—wa ha ri mulawuri naswona u ni matimba yo karhi evuton’wini bya wena. Kutani kahle-kahle a hi ndlela ya vutlharhi ku xandzuka kumbe ku n’wi delela. Ku endla sweswo a swi nge ku tikiseli vutomi ntsena kambe swi nga tlhela swi endla leswaku u nga tsakeriwi hi Xikwembu. (Ringanisa Swivuriso 30:17; Eklesiasta 10:4.) Hi hala tlhelo, ku tirhisana na yena hi laha u nga kotaka ha kona swi nga ha ku pfuna ku hlayisa ku rhula ko karhi ni ntwanano evuxakeni bya wena ni mutswari wa wena.—Vakolosa 3:20.

Ku Langutana Ni Ku Hlundzuka Ni Xikhomela

Kutani ke, xana u nga n’wi xixima njhani munhu loyi a ku vavisaka emintlhavekweni naswona a ku khomisa ni tingana? Leswi a swi olovi. Kambe ku tshamela ku languta swihoxo swakwe ni laha a tsandzekaka kona swi to kurisa xikhomela xa wena. Xana swi nga ha endleka leswaku u fanele u anakanyisisa kahlenyana hi mutswari wa wena, u n’wi xixima hi laha ku faneleke hikwalaho ka timfanelo tihi na tihi letinene leti a nga na tona?

Xiya leswi Swivuriso 19:11 yi swi vulaka: “Munhu wa v̌utlhari o hlwela ku kariha.” Ku ringeta ku twisisa mutswari wa wena swi nga ku nyika langutelo lerintshwa hi xiyimo lexi. Xana hakunene u hanya hi ndlela yo soleka? Kumbexana i mhaka ya ku tsana ntsena, u hetiwe mongo, naswona u lava mpfuno? Xana mahanyelo lawa ma nga va ma vangiwa hi vuvabyi, gome, xivundza, kumbe ntshikilelo wa ntirho? Loko swi ri tano, ku twisisa swiphiqo leswi swi nga ha ku pfuna ku va ni ntwela-vusiwana eka mutswari wa wena naswona u nga karihi ngopfu.

Ku nga khathariseki leswaku xiyimo hi xihi, swa pfuna ku vulavula hi mintlhaveko ya wena ni un’wana. (Swivuriso 12:25) Nhwanyana un’wana wa tsundzuka, “Tatana a a nwa. A ndzi nga swi koti ku byela vatswari va mina ndlela leyi a ndzi titwa ha yona, kutani ndzi lo whi, na swona.” Hambi swi ri tano, a wu fanelanga ku xaniseka u ri swaku. Hambi loko va nga sivi vatswari, vanhu lava vupfeke evandlheni ra Vukreste va nga pfuna swinene ku hunguta ku pfumaleka ka nkhathalelo ekaya. (Ringanisa Marka 10:30.) Swivuriso 17:17 yi ri: “Vanghana va kombisa rirhandzu ra vona minkarhi hinkwayo. Kasi vamakwavo va tirha yini loko ku nga ri ku pfunana hi swirhalanganya?”—Today’s English Version.

‘Ndzi Nga N’wi Hundzula’

Vantshwa van’wana va karhateka emintlhavekweni hikwalaho ka mianakanyo leyi hoxeke yo titwa va ri ni vutihlamuleri. Mary u tsundzuka xiyimo xa yena ni tindzisana takwe: “A hi tshama hi ri eku chaveni leswaku un’wana u ta tiva xiphiqo xa tatana xa ku nwa.” Van’wana va tihlakata hi ku ringetela ku hundzula mutswari wa vona lowo hunguka.

Ku nga khathariseki leswaku u rhandza mutswari wa wena ni ku khathala hi yena ku fikela kwihi, kahle-kahle a wu nge soriwi hikwalaho ka swihoxo swakwe. U ‘byarha ndzhwalo wakwe’ wa vutihlamuleri emahlweni ka Xikwembu. (Ringanisa Vagalatiya 6:5; Yakobo 5:14.) A hi vutihlamuleri bya wena ku langutela kumbe ku lawula mahanyelo ya mutswari wa wena. Ku tshamela ku vilela kumbe ku holovela mutswari wa wena swi to ya swi n’wi hlundzukisa.

Leswi a swi vuli leswaku ku hava lexi u nga xi endlaka. Xa nkoka ngopfu u nga “tshiki ku khongela” leswaku mutswari wa wena a hundzula mbilu yakwe. (1 Vatesalonika 5:17) Ku tshamela ku n’wi byela hi rirhandzu ra wena naswona u n’wi bumabumela swi huma embilwini, laha swi faneleke, na swona swi nga ha antswisa langutelo rakwe. Ku tlula kwalaho, u nga ha tikuma u boheka ku tiyisela xiyimo hi laha u nga kotaka ha kona.a

Kavula, loko wena ni mutswari wa wena mi ri Vakreste ivi a endla swidyoho leswikulu, tanihi ku tirhisa xihoko hi ndlela yo biha kumbe a kariha ku tlurisa, hi ntolovelo u ta boheka ku tiyiseka leswaku timhaka leti ti vulavuriwa ni vakulu va vandlha. (Yakobo 5:14) Lexi a hi xikombiso xa ku nga tshembeki kambe u ta va u ringeta ku kombisa rirhandzu hi ku vona leswaku mutswari wa wena u kuma mpfuno lowu a wu lavaka hakunene. I ntiyiso, vatswari van’wana hi ku hlundzuka va kanete xidyoho xihi ni xihi ivi va kuma hakelo ya kona exihundleni, kambe vantshwa lava “twisiwa[ka] ku vava hikwalaho ka leswo lulama” emhakeni leyi va nga tiyiseka leswaku Yehovha u amukela ndlela ya vona ya xivindzi ni leswaku hi nkarhi wa kona, u ta humesa ntiyiso erivaleni.—1 Petro 3:14; 1 Timotiya 5:24, 25.

Tirhela Ku Ponisiwa Ka Wena

Solomoni u te: “Mašangu ma hlanyisa l’a tlhariheke.” (Eklesiasta 7:7) Khombo ra kona, vantshwa van’wana va vilerisiwa hi xikombiso lexo biha xa mutswari wa vona ivi na vona va sungula ku huma endleleni. Van’wana va hlundzukele Xikwembu ivi va tshika ndlela ya Vukreste! (Swivuriso 19:3) Bibele ya tsundzuxa: “V̌ukari byi nga ṭhuki byi ku yisa e šisolweni. Tilangutele, u tšhav̌a ku tinyiketa le’ŝo biha.”—Yobo 36:18-21.

Ematshan’wini yo vilerisiwa ngopfu hi xiyimo xa mutswari wa wena emahlweni ka Xikwembu, u fanele ku ‘tirhela ku ponisiwa ka wena hi ku chava ni ku rhurhumela.’ (Vafilipiya 2:12) Eminkarhini ya khale, hosana leyitsongo leyi vitaniwaka Hezekiya yi endlise sweswo ehansi ka swiyimo swo tano. Tata wakwe, Hosi Ahazi, a a tivula mugandzeri wa Yehovha. (Esaya 7:10-12) Kahle-kahle a a ri mugandzeri wa swikwembu swa vahedeni, hambi ku ri ku nyikela un’wana wa vana vakwe tanihi gandzelo ra munhu! (2 Tihosi 16:1-4) Anakanya ndlela leyi vugwinehi byonghasi byi faneleke byi hete Hezekiya lontsongo mongo ha kona! Pisalema 119:28, leyi van’wana va anakanyaka leswaku yi tsariwe hi hosana leyi leyitsongo yi ri: “Moya wa mina wu rila hi mahlomulo, nḍi pfuše hi rito ra wena!”

Yehova u endlise sweswo! Loko Hezekiya a tinyiketele eku khongeleni ni le ku dyondzeni ka Rito ra Xikwembu, vumoya byakwe byi kurile ku nga khathariseki leswi n’wi rhendzeleke. (Pisalema 119:97) U tlhele a xiyisisa vanghana vakwe hi vukheta. (Pisalema 119:63) Vuyelo byi ve byihi? Ku nga khathariseki xikombiso lexi twisaka ku vava lexi vekiweke hi tata wakwe wa mukanganyisi, Hezekiya yena a “namarela Yehova.” (2 Tihosi 18:6) Na wena u nga endlisa sweswo! Kumbexana mutswari wa wena u hanya hi vukanganyisi, kambe ku hava xivangelo xo n’wi tekelela. Tshama u namarhela Yehovha, kumbexana xikombiso xa wena lexinene xa ku tshembeka siku rin’wana xi ta susumetela mutswari wa wena ku hundzuka.

[Nhlamuselo ya le hansi]

[Swifaniso leswi nga eka tluka 31]

A swi bohi leswaku u endla swihoxo hi ku va mutswari wa wena a swi endla

Loko u ri ni swivutiso swo karhi swa Bibele endzhaku ko hlaya magazini lowu, hi kombela u titwa u ntshunxekile ku vutisa Timbhoni ta Yehovha eHolweni ya Mfumo leyi nga ekusuhi na wena, kumbe u tsalela vakandziyisi va magazini lowu. (Vona tluka 5.)