Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g05 8/8 matl. 19-21
  • Xana Timhangu Ta Ntumbuluko Ta Andza?

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Xana Timhangu Ta Ntumbuluko Ta Andza?
  • Xalamuka!—2005
  • Swihloko
  • Tinhlokomhaka Tin'wana Leti Yelana Na Yona
  • Xana Misava Yi Langutane Ni Papa Ra Ntima?
  • Timhangu Ta Ntumbuluko Ni Ndlela Leyi Vanhu Va Hoxaka Xandla Ha Yona
    Xalamuka!—2005
  • Makhombo Ya Ntumbuluko—Xana Ma Vangiwa Hi Xikwembu?
    Xihondzo xo Rindza Xi Huwelela Mfumo Wa Yehovha—1993
  • Xana Pulanete Ya Misava Ya Xungetiwa?
    Xalamuka!—2008
  • Loko Makhombo Ya Ntumbuluko Ma Hlasela
    Xihondzo xo Rindza Xi Huwelela Mfumo Wa Yehovha—1996
Vona Swo Tala
Xalamuka!—2005
g05 8/8 matl. 19-21

Xana Timhangu Ta Ntumbuluko Ta Andza?

“Hi nga langutela leswaku swiendlakalo leswikulu leswi vangiwaka hi ku cinca ka maxelo swi va ni vuyelo byo biha ngopfu enkarhini lowu taka. Leswi swi vula leswaku hi fanele hi lunghekela ku langutana ni makhombo lamantshwa lama vangiwaka hi maxelo naswona hi langutela ku lahlekeriwa swinene. . . . Leswi hi faneleke hi tisirhelela, hi ta tsundzuxiwa leswaku hi tilunghiselela ku cinca lokukulu.”—“Topics Geo—annual Review: Natural Catastrophes 2003.”

ESWIPHEN’WINI swa Yuropa ku ve ni ku hisa lokukulu hi ximumu xa 2003. Ku hisa koloko ku hoxe xandla eka vanhu va kwalomu ka 30 000 lava feke eBelgium, eBritain, eFurwa, eItaliya, eNetherlands, ePortugal ni le Spaniya. Moya wo hisa lowu veke kona eBangladesh, eIndiya ni le Pakistan wu dlaye vanhu va 1 500, kasi eAustralia dyandza ni ku hisa lokukulu swi hise timiliyoni tinharhu ta tihekitara.

Hi ku ya hi Nhlangano wa Misava Hinkwayo wa Maxelo, “hi nkarhi wa xidzedze le Atlantic hi 2003 ku ve ni mimoya yin’wana ya 16 leyi a yi tlula leyi veke kona ku sukela hi 1944 ku ya fika hi 1996 hi 9,8 hi xiringaniso, kambe mimoya leyi a yi engeteleka lembe ni lembe ku suka hi va-1990.” Mimoya yoleyo yi engetelekile ni hi 2004, naswona hi lembe rero ku ve ni moya lowukulu eKharibiya ni le Nsonga-nkulu wa Mexico, laha ku feke vanhu va kwalomu ka 2 000 naswona moya wolowo wu onhe ngopfu.

Hi 2003, Sri Lanka ri hlaseriwe hi bubutsa leri vangeke ndhambhi leyikulu, leyi dlayeke vanhu va kwalomu ka 250. Hi 2004 mimoya ya thayifuni ya kwalomu ka 23 yi hlasele evupela-dyambu bya Pacific. Khume ra mimoya leyi yi hlasele eJapani, laha yi onheke ngopfu ni ku dlaya vanhu vo tlula 170. Tindhambhi leti vangiwaka hi mpfula leyi fambisanaka ni moya ti hlasele vanhu va kwalomu ka 30 wa timiliyoni eAsiya Dzonga, ngopfu-ngopfu eBangladesh. Vanhu va timiliyoni va sale va nga ha ri na makaya, va kwalomu ka timiliyoni tinharhu va boheke ku siya makaya ya vona naswona vo tlula 1 300 va file.

Hi 2003 ku ve ni ku tsekatseka lokukulu ka misava ko hlayanyana. Hi May 21, le Algiers, eAlgeria, vanhu va 10-000 va vavisekile hikwalaho ko tsekatseka ka misava naswona va 200 000 va sale va nga ha ri na makaya. Hi December 26 hi nkarhi wa 5:26 nimixo, ku ve ni ku tsekatseka lokukulu ka misava loku veke eka 8 wa tikhilomitara edzongeni wa tiko ra Bam le Iran. Ku tsekatseka ka misava loku pimeke 6,5 ku onhe 70 wa tiphesente ta tiko, ku dlaya vanhu va 40 000 ku tlhela ku siya vanhu vo tlula 100 000 va nga ha ri na makaya. Ku ve khombo lerikulu ngopfu ra ntumbuluko leri veke kona elembeni rero. Ku tsekatseka koloko ku tlhele ku mbundzumuxa khokholo ra le Bam, eArg-e-Bam leri nga ni malembe ya 2 000, leswi vaviseke ndhawu yoleyo hi tlhelo ra ikhonomi tanihi leswi a yi rhandziwa hi vapfhumba.

Endzhaku ka lembe ntsena, ku ve ni ku tsekatseka ka misava ka mpimo wa 9,0 eribuweni ra le vupela-dyambu bya Sumatra n’walungu, le Indonesia, loku vangeke magandlati ya tsunami lama dlayeke vanhu vo tala ku tlula hinkwavo lava tshameke va dlayiwa hi tsunami ematin’wini lama tiviwaka. Magandlati wolawo ma dlaye vanhu va kwalomu ka 200 000 ni ku siya vanhu vo tala va vavisekile, va nga ri na makaya kumbe haswimbirhi. Tsunami yi fikile ni le ribuweni ra le vuxeni bya Afrika, ku nga 4 500 wa tikhilomitara kumbe ku tlula evupela-dyambu bya laha ku veke ni ku tsekatseka ka misava.

Xana Misava Yi Langutane Ni Papa Ra Ntima?

Xana swiendlakalo swo tano swo va xikombiso xa leswi nga ta humelela enkarhini lowu taka? Malunghana ni makhombo lama fambisanaka ni maxelo, van’wasayense vo tala va vula leswaku vanhu hi vona va cincaka maxelo ya misava naswona va hoxa xandla eka maxelo yo biha. Loko leswi swi ri ntiyiso, swi vula leswaku vumundzuku bya hina byi funengetiwe hi papa ra ntima. Ku engetela eka khombo rero, vanhu vo tala sweswi va tshama etindhawini leti swi nga ha endlekaka ti hlaseriwa hi makhombo ya ntumbuluko, swi nga ha endleka va lo tihlawulela ku tshama kwalaho kumbe vo boheka ku tshama kona.

Tinhlayo ti kombisa leswaku 95 wa tiphesente ta makhombo hinkwawo lama dlayaka vanhu ma humelela ematikweni lama ha hluvukaka. Hi hala tlhelo, matiko lama fuweke ma ni nhlayo ya le hansi ya vanhu lava faka kambe ma lahlekeriwa hi 75 wa tiphesente eka ikhonomi ya wona. Tikhampani tin’wana ta ndzindza-khombo ti vona onge a ti nge vi na yona mali leyi ringaneke yo hakela ku lahlekeriwa loku lokukulu.

Eka xihloko lexi landzelaka hi ta kambisisa tindlela tin’wana leti vangaka makhombo ya ntumbuluko ni leswi vanhu va swi endlaka leswi endlaka leswaku makhombo lawa ma va ni khombo swinene. Hi ta tlhela hi kambisisa loko vanhu va ri na wona matimba ni vuswikoti byo tisa ku cinca loku lavekaka eku endleni ka leswaku misava yi va kaya leri sirhelelekeke ra switukulwana leswi taka.

[Xifaniso lexi nga eka tluka 19]

FURWA 2003 Ku hisa lokukulu ku dlaye vanhu va 30 000 le Yuropa; eSpaniya ku hisa a ku fika eka 44,8°C

[Xihlovo Xa Kona]

Alfred/EPA/Sipa Press

[Swifaniso leswi nga eka tluka 20, 21]

IRAN 2003 Ku tsekatseka ka misava ku dlaye vanhu va 40 000 le Bam; vavasati va rila maxaka esirheni leri ku lahliweke vanhu vo tala eka rona

[Xihlovo Xa Kona]

Background and women: © Tim Dirven/Panos Pictures

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela