Lexi Endlaka Leswaku Ndzi Nga Yi Tlangeli Halloween

N’WEXEMU, loko vaakelani vakwe va ha khomekile va lunghiselela Halloween—ematikweni man’wana, holideyi ya lembe ni lembe leyi dumeke leyi fambisanaka ni vungoma—Michael, la nga ni malembe ya 14 a a ehleketa swin’wana. Eka xitsalwana lexi a xi tsaleleke xikolo, Michael u te:

‘Lebyi i vusiku lebyi tlhandlamaka siku ra Halloween. Loko ndzi languta ehandle hi fesitere, ndzi vona byanyi bya vaakelani va mina hinkwavo byi sasekisiwe hi maribye ya le masirheni ni marhambu naswona va voninge hi mavoni lama langutekaka ku fanaka ni swikandza swa vanhu emafasitereni ya vona.a Vatswari va lunghisa swiambalo swa vana va vona; vana va ehleketa hi malekere yo tala lawa va nga ta ma kuma mundzuku.

‘Ndyangu wa ka hina wu hambanile ni mindyangu yoleyo. Byanyi bya le kaya a byi sasekisiwanga, naswona mafasitere ya ka hina a ma lumekiwanga timboni. Vanhu va ndzi vutisa leswaku ha yini ndzi nga tlangeli Halloween. Kahle-kahle, Timbhoni ta Yehovha a ti yi tlangeli hikwalaho ka ndlela leyi yi sunguleke ha yona.b

‘Lexi tsakisaka, ndza wu rhandza nkarhi lowu wa Halloween. U nga ha tivutisa leswaku, “Ha yini?” Hikuva wu endla leswaku ndzi ehleketa. Wu endla ndzi ehleketa hi swivangelo leswi endlaka leswaku ndzi nga endli swilo swin’wana. Un’wana ni un’wana u fanele a tihlamulela hi byakwe loko mhaka ya leswaku mukhuva wo karhi wu sungule njhani yi ri ya nkoka. Ndzi ehleketa leswaku i swa nkoka ku tiva leswaku mukhuva wo karhi wu sungule njhani. Hi xikombiso, vanhu vo tala va nga hlundzuka loko vaakelani va vona vo ambala yunifomo ya Vunazi. Ha yini? Hikwalaho ka leswi yunifomo ya Vunazi yi sunguriseke xiswona nileswi yi yimelaka swona—ku nga swivangelo leswi nyenyetsaka vanhu vo tala. Diyavulosi, mimoya leyo homboloka ni valoyi swa ndzi nyenyetsa, naswona a ndzi lavi ku tekiwa ndzi ri ni vuxaka byo karhi ni swilo swo tano. I swinene ku ehleketa hi swiboho leswi hi swi endlaka ni swivangelo swo endla swiboho swo tano, kutani hi endla swiboho hikwalaho ka swivangelo ku nga ri hikwalaho ka leswi nchumu wo karhi wu dumeke. Hi yona mhaka leyi ndzi rhandzaka nkarhi lowu wa lembe. Ndza tinyungubyisa hi ku va la hambaneke na vona ni ku namarhela leswi ndzi pfumelaka eka swona.’

[Tinhlamuselo ta le hansi]