Vantshwa Va Vutisa

I Yini Lexi Endlaka Xinkhubyana Xi Tsakisa Swinene?

Laha hansi, fungha hi ✔ etlhelo ka nchumu lowu u wu langutelaka hi mahlo-ngati loko u ya exinkhubyanini.

ku dya
ku cina
ku tlanga mintlango
ku tiendlela vanghana lavantshwa
ku ya dzumba ni vanghana va khale
swin’wana ․․․․․

VANTSHWA vo tala va rhandza ku hlangana swin’we naswona sweswo a swi hoxanga. Hambi ku ri eBibeleni, swinkhubyana ku vulavuriwa kahle ha swona.

Xana a wu swi tiva?

Vana va Yobo va majaha a va endla minkhuvo.—Yobo 1:4.
Yesu u ye eka nkhuvo wa vukati.—Yohane 2:1-11.
Vakreste va lembe-xidzana ro sungula a va rhambana emakaya ya vamakwerhu leswaku va ta endla xinghana.—Mintirho 2:46, 47.

I ntiyiso leswaku ku hlangana ni vanghana swa tsakisa. Kambe lexi twisaka ku vava hileswaku swinkhubyana swin’wana a swi phyuphyisi.

MHAKA YA XIVIRI “Ndzi rhambiwe exinkhubyanini lexi eka xona a ku rhambiwe munhu un’wana ni un’wana naswona a xi fanele xi endleriwa endlwini ya ka va jaha leri vatswari va rona a va nga ri kona. Ndzi endle xiboho xo ka ndzi nga yi naswona ndzi tsakile! Hi siku leri tlhandlamaka, ndzi twe leswaku vanhu vo tala va nwe byala naswona van’wana a va pyopyiwile. Hambi ku ri majaha manharhu ma titivarile hileswi a ma pyopyiwile. Nakambe, ku pfuke nyimpi lerova maphorisa ma boheka ku ta leswaku ma ta herisa xinkhubyana.”—Janelle.

LESWI HI SWI DYONDZAKA U nga tibyeli leswaku swilo swi to tiendlekela! Ku nga khathariseki leswaku u le ku hleleni ka xinkhubyana kumbe u rhambiwe eka xin’wana, tiyiseka leswaku u tiva tinhlamulo ta swivutiso leswi nga eka matluka lama landzelaka. Hi ndlela yoleyo xinkhubyana xa wena a xi nge rivaleki naswona a wu nge tisoli loko xi herile.

MINTOKOTO YA VANHU LAVA VUYERIWEKE HIKWALAHO KO ENDLA SWIBOHO LESWINENE

“Loko munghana wa mina a va ni xinkhubyana, mana wakwe a languta laha munhu un’wana ni un’wana a nga kona. Hambiloko ndzi ya emovheni leswaku ndzi ya teka baji, u ndzi vutise leswaku ndzi ya kwihi. Xana a a tiendla phorisa? Kumbexana, kambe a ndzi khunguvanyekanga hikuva ndzi xiye leswaku i swinene ku hlayiseka ematshan’weni yo tisola.”—Kim.

“Ndzi tshame ndzi ya eswinkhubyanini leswinene naswona ndzi ehleketa leswaku lexi endleke leswaku swi famba kahle hileswi a ku ri ni vanhu va malembe yo hambana-hambana. Ku engetela kwalaho, vini va swinkhubyana a va hlele mintlangu leyi tsakisaka, kutani ku hava ni un’we loyi a lava ku suka eka ntlawa a endla swin’wana.”—Andrea.

Swihloko swin’wana leswi nge “Vantshwa Va Vutisa” swi kumeka eka Web site leyi nge www.watchtower.org/ype

I vamani lava nga ta va kona naswona xinkhubyana xi ta va xi kule ku fikela kwihi?

“Ndzi anakanya leswaku u fanele u rhamba vanhu lava u va tivaka kahle naswona a wu fanelanga u pfumelela mani na mani leswaku a ta kumbe ku byela lava nga ta ta leswaku va ta ni vanghana va vona.”—Renee.

“Loko nhlayo ya vanhu lava rhambiweke yi nga xiyiwi, xinkhubyana xi nga hetelela xi nga ha lawuleki. U rhamba vanhu va 20, kutani vona va rhamba van’wana va khume na vona lava khume va rhamba van’wana . . . Ndzi tshame ndzi swi vona swi endleka!”—Colette.

“Swa olova leswaku xinkhubyana lexi nga ni vanhu vo tala xi nga lawuleki. Ndzi anakanya leswaku i vutlhari ku rhamba vanhu vatsongo.”—Alexis.

“Loyi a fambaka ni vanhu vo tlhariha u ta tlhariha, kambe loyi a tirhisanaka ni lavo hunguka, a swi nge n’wi fambeli kahle.”—SWIVURISO 13:20

I yini leswi nga ha endlekaka exinkhubyanini?

“Loko ku ri xinkhubyana xa wena naswona ku humelela swilo swo biha, swi ku endla u languteka u ri munhu wo biha.”—Bridget.

“Loko u va ni vuxiyaxiya, xinkhubyana xi nga va lexi tsakisaka eka un’wana ni un’wana. Hinkwaswo swi titshege hi ku va u tirhisa vuxiyaxiya.”—Seth.

MHAKA YA XIVIRI “Ndzi ni munghana loyi a ndzi byeleke leswaku a nga ndzi rhambi eswinkhubyanini swakwe hileswi a tivaka leswaku vatswari va mina va ta n’wi vutisa swivutiso swo tanihi hi leswi nge, I vamani lava nga ta va kona? ni lexi nge, Xana xi ta teka nkarhi wo tanihi kwihi? U vule leswaku a nga lavi ku xopaxopiwa hi ndlela yoleyo. Sweswo swi ndzi byela leswaku ku ni xiphiqo lexi nga kona ha yena ni hi swinkhubyana swakwe. Loko a nga lavi ku vutisiwa swivutiso, ndzi anakanya leswaku muxaka wa swinkhubyana swakwe a hi wona lowu ndzi nga lavaka ku va eka wona!”—Ellen.

“Hambi mi dya kumbe mi nwa kumbe mi endla yini na yini, endlani hinkwaswo leswaku mi vangamisa Xikwembu.”—1 VAKORINTO 10:31

Xana u ta endla yini loko xinkhubyana xa kona xi endla u titwa u nga ntshunxekanga?

“Ndzi ni kungu ro baleka. Minkarhi hinkwayo loko ndzi famba ndzi fonela vatswari va mina ndzi va byela nkarhi lowu ndzi nga ta vuya ha wona ekaya. Loko ndzi endla tano, va ndzi vutisa loko swilo hinkwaswo swa ha famba kahle. Loko ndzi va byela leswaku a swi fambi kahle, vona va ndzi tsundzuxa mintirho hinkwayo leyi ndzi faneleke ndzi yi endla. Loko ndzi heta ku vulavula na vona, ndzi byela vanghana va mina leswaku vatswari va mina va lava ndzi vuya ekaya ka ha ri ni nkarhi naswona ndzi fanele ndzi hatla ndzi famba.”—Therese.

MHAKA YA XIVIRI “Eka xinkhubyana xin’wana, vafana vambirhi lava a va nga rhambiwanga va tile naswona un’wana wa vona a ri ni mukhuva wo tirhisa swidzidziharisi. A swi ndzi tikela ku teka xiboho, kambe ndzi bele tatana riqingho kutani ndzi n’wi kombela leswaku a ndzi landza.”—Mary.

“U tlharihile la voneke khombo kutani a tumbela, kambe la nga riki na ntokoto u ye emahlweni kutani u fanele a xupuriwa.”—SWIVURISO 22:3