Ku Veka Matirhelo Ya Mhaka eRivaleni

LOKO u vulavula ni munhu un’we kumbe ni vayingiseri vo tala, u nga tibyeli leswaku (va-)muyingiseri u ta tsakela mhaka ya wena hikwalaho ka leswi wena u yi tsakelaka. Rungula ra wena i ra nkoka, kambe loko u nga swi veki erivaleni leswaku ri pfuna njhani, ku tsakela ka vayingiseri va wena a ku nge yi kule.

Sweswo u fanele u swi endla ni loko u vulavula ni vayingiseri eHolweni ya Mfumo. Va nga ha rhiya ndleve loko u tirhisa xikombiso kumbe u rungula ntokoto lowu va nga si tshamaka va wu twa. Kambe rungula ra wena ri nga ha hundza ni moya loko va tshame va ri twa, ngopfu-ngopfu loko u nga ri ndlandlamuxi. U fanele u va pfuna va vona leswaku ha yini leswi u va byelaka swona swi ri swa nkoka ni leswaku vona va nga vuyeriwa njhani.

Bibele yi hi khutaza leswaku hi ehleketa hi ndlela leyi mhaka yi pfunaka ha yona. (Swiv. 3:21) Yehovha u tirhise Yohane Mukhuvuri leswaku a kongomisa vanhu eka “vutlhari lebyi pfunaka bya lava lulameke.” (Luka 1:17) Lebyi i vutlhari lebyi sekeriweke eku chaveni ka Yehovha hi vuenti. (Ps. 111:10) Lava tlangelaka vutlhari lebyi, va pfuniwa leswaku va langutana ni vutomi hilaha ku humelelaka sweswi, ni leswaku va khomelela eka vutomi bya xiviri, vutomi lebyi nga heriki, lebyi taka.—1 Tim. 4:8; 6:19.

Ku Endla Leswaku Nkulumo Yi Tirha. Leswaku nkulumo ya wena yi tirha u fanele u ehleketisisa hi rungula ra kona u tlhela u anakanya hi vayingiseri. U nga ehleketi hi ntlawa hi ku angarhela. Ntlawa wolowo wu katsa vanhu vo karhi ni mindyangu. Swi nga ha endleka ku ri ni vana lavatsongo, vana va kondlo-a-ndzi-dyi, lavakulu ni van’wana lava dyuhaleke. Swi nga ha endleka ni lava tsakelaka va ri kona, ku tlhela ku va ni lava sunguleke ku tirhela Yehovha u nga si velekiwa. Van’wana swi nga ha endleka va vupfile emoyeni; kasi van’wana swi nga ha endleka va ha lawuriwa hi malangutelo ni swiendlo swa misava. Tivutise: ‘Rungula leri ndzi nga ta bula ha rona ri ta va vuyerisa njhani vayingiseri? Ndzi nga va pfuna njhani leswaku va ri twisisa?’ U nga ha hlawula ku kongomisa ngopfu rungula ra wena eka ntlawa wun’we kumbe yimbirhi leyi boxiweke laha. Hambiswiritano, ni lavan’wana u nga va bakanyeli etlhelo hi ku helela.

Ku vuriwa yini loko u averiwe ku vulavula hi dyondzo ya xisekelo ya Bibele? U nga endla yini leswaku nkulumo yoleyo yi vuyerisa lava ana se va pfumelaka eka dyondzo yoleyo? Tikarhatele ku va tiyisekisa eka leswi va pfumelaka eka swona. Njhani? Hi ku hlamusela vumbhoni bya Matsalwa lebyi seketelaka dyondzo yoleyo. U nga ha tlhela u endla leswaku va yi twisisa ku antswa dyondzo yoleyo ya Bibele. Sweswo u nga swi endla hi ku kombisa ndlela leyi dyondzo yoleyo yi fambisanaka ha yona ni ntiyiso hinkwawo wa Bibele swin’we ni vumunhu bya Yehovha. Tirhisa swikombiso—loko swi koteka tirhisa mintokoto ya xiviri—leyi kombisaka ndlela leyi ku twisisa dyondzo leyi swi va vuyeriseke ha yona vanhu, ni ndlela leyi swi ri khumbeke ha yona langutelo ra vona hi vumundzuku.

Ndlela leyi rungula ri tirhaka ha yona u nga yi boxi loko se u gimeta nkulumo ntsena. Ta ha suka, un’wana ni un’wana wa vayingiseri u fanele a swi vona leswaku “mhaka leyi ya ndzi khumba.” Loko u xi vekile xisekelo xexo, hambeta u kombisa ndlela leyi mhaka yi tirhaka ha yona eka tinhla-nkulu hinkwato ta nkulumo ya wena ni loko u gimeta.

Loko u kombisa ndlela leyi mhaka yi tirhaka ha yona, yi hlamusele hi ndlela leyi fambisanaka ni misinya ya milawu ya Bibele. Sweswo swi vula yini? Swi vula ku hlamusela hi ndlela ya rirhandzu ni ku anakanyela. (1 Pet. 3:8; 1 Yoh. 4:8) Niloko a tlhantlha swiphiqo leswikulu eTesalonika, muapostola Pawulo u tikarhatele ku kandziyisa swilo leswinene leswi vamakwavo va Vakreste a va swi endla leswaku va endla nhluvuko wa moya. U tlhele a va ni ntshembo wa leswaku a va ta endla leswi ku buriweke ha swona, swi suka embilwini. (1 Tes. 4:1-12) Kunene i xikombiso lexinene lexi hi faneleke hi xi tekelela!

Xana nkulumo ya wena yi hleleriwe ku khutaza ku hlanganyela entirhweni wo chumayela ni ku dyondzisa van’wana mahungu lamanene? Pfurhetela ku hiseka ni ku tlangela lunghelo leri. Hambiswiritano, loko u ri karhi u endla tano, tsundzuka leswaku vanhu a va nge hlanganyeli hi ndlela leyi fanaka entirhweni lowu, hilaha Bibele yi kombisaka hakona. (Mat. 13:23) U nga endli leswaku vamakwenu va titwa va ri ni nandzu. Vaheveru 10:24 yi hi khongotela leswaku “hi khutazana erirhandzwini ni le mintirhweni leyinene.” Loko hi khutazana erirhandzwini, swi ta hi olovela ku endla swilo hi moya lowunene. Ematshan’weni yo sindzisa vanhu ku endla swilo, xiya leswaku Yehovha u lava leswaku hi kondletela moya wa “ku yingisa hi ripfumelo.” (Rhom. 16:26) Hi ri karhi hi ehleketa hi leswi, hi fanele hi lwela ku tiyisa ripfumelo—ra hina ni ra vamakwerhu.

Ku Pfuna Van’wana Leswaku Va Kuma Yinhla. Loko u ri karhi u chumayela, u nga rivali ku kandziyisa ndlela leyi mahungu lamanene ma pfunaka ha yona. Leswaku u kota ku endla sweswo, u fanele u anakanya leswi vanhu va le nsin’wini ya ka n’wina va ehleketaka ha swona. U nga swi tiva njhani? Yingisela mahungu eka xiya-ni-moya kumbe thelevhixini. Languta tinhloko-mhaka-nkulu ta maphepha-hungu. Nakambe, ringeta ku nghenisa vanhu ebulwini, u tlhela u rhiya ndleve loko va vulavula. U nga ha kuma leswaku va khome nyarhi hi timhondzo—ku heleriwa hi ntirho, ku hakelela ndhawu yo tshama, vuvabyi, ku fa ka xirho xa ndyangu, vugevenga, ku cinisiwa gija hi munhu la nga ni vulawuri kambe u nga n’wi dyelanga nchumu, ku hahluka ka vukati, ku tshama u ri karhi u tshinya vana ni swin’wana. Xana Bibele yi nga va pfuna? Kunene.

Loko u sungula bulo, swi le rivaleni leswaku ku ni mhaka leyi u ehleketeke ha yona. Hambiswiritano, loko munhu a ta ni mhaka leyi eka yena yi nga ya nkoka swinene, titwe u ntshunxekile ku rhanga u bula ha yona loko swi koteka, kumbe u tshembisa ku tlhela u vuya ni rungula leri pfunaka. Ina, ha swi papalata ‘ku nghenelela eka leswi nga hi khumbiki,’ kambe hi tsakela ku byela van’wana hi ndzayo leyi pfunaka leyi humaka eBibeleni. (2 Tes. 3:11) Kunene, leswi nga ta tsakisa vanhu swinene i ndzayo ya Bibele leyi khumbaka vutomi bya vona.

Loko vanhu va nga swi voni leswaku rungula ra hina ri va khumba njhani, va nga ha tsema bulo hi ku hatlisa. Hambiloko va hi tshika hi tivulavulela, loko hi tsandzeka ku kombisa leswaku mhaka ya hina yi pfuna njhani, rungula ra hina ri to hundzuka nyuku wa mbyana. Ku hambana ni sweswo, loko hi yi veka erivaleni ndlela leyi mhaka yi tirhaka ha yona, bulo ra hina ri nga ha cinca vutomi bya munhu.

Loko u fambisa tidyondzo ta Bibele, hambeta u kandziyisa ndlela leyi rungula ri tirhaka ha yona. (Swiv. 4:7) Pfuna swichudeni ku twisisa ndzayo ya Matsalwa, misinya ya milawu ni swikombiso leswi kombisaka ndlela leyi va nga fambaka ha yona etindleleni ta Yehovha. Swi veke erivaleni leswaku loko va endla sweswo va ta pfuneka njhani. (Esa. 48:17, 18) Sweswo swi ta pfuna swichudeni leswaku swi lulamisa laha swi faneleke swi lulamisa kona evuton’wini. Swi pfune leswaku swi rhandza Yehovha, swi tsakisa yena, u tlhela u swi khutaza leswaku swi hisekela ku tirhisa ndzayo ya Rito ra Xikwembu hi mbilu hinkwayo.