Ku Tirhisa Tinhla Ta Xisekelo

VO TALA a va dyi byi rhelela loko va ta vulavula hi ku tirhisa tinhla ta xisekelo. Va titwa va ri ni xivindzi loko hinkwaswo leswi va nga ta swi vula swi tsariwe ehansi kumbe va swi nhlokohata.

Kambe entiyisweni, hinkwerhu loko hi vulavula siku na siku a hi hlayi kunene. A hi hlayi kunene loko hi vulavula ni vandyangu ni vanghana. A hi hlayi kunene loko hi chumayela ensin’wini. Naswona a hi hlayi kunene loko hi khongela swi suka embilwini, hambi ha tikhongelela kumbe hi khongela emahlweni ka ntlawa wo karhi.

Loko u nyikela nkulumo, xana ku ni ku hambana loko u yi hlaya kunene kumbe u tirhisa tinhla ta xisekelo? Hambileswi ku nyikela nkulumo yo hlaya leyi u yi lunghiseleleke swi nga ku pfunaka leswaku u ma hlaya kahle marito ni ku tirhisa marito lawa wena u ma tsakelaka, a swi olovi leswaku nkulumo yo tano yi fikelela timbilu. Loko u hlaye swiga swi nga ri swingani, hakanyingi u ta sungula ku hlaya hi rivilo hi mukhuva lowu hambanaka ni mavulavulelo ya wena ya ntumbuluko. Loko u languta ngopfu maphepha ya wena ku tlula ku languta vayingiseri va wena, vo tala va vona a va nge yingiseli hilaha a va ta yingisela hakona loko va xiya leswaku wa va anakanyela hakunene, naswona nkulumo ya wena yi fambisana na swiyimo swa vona. Leswaku nkulumo yi ta khutaza hakunene, swa antswa leswaku u yi nyikela hi ku tirhisa tinhla ta xisekelo.

Xikolo xa Vutirheli bya le Tilweni xi kunguhateriwe ku hi pfuna etimhakeni ta siku na siku. Loko hi hlangana ni vanghana, a hi humesi xiphephana ivi hi sungula ku va hlayela mhaka ya hina leswaku hi nga endli xihoxo. Entirhweni wa nsimu, a hi fambi na muhwenga wa rungula leri hi nga ta ri hlaya, hi ku chava leswaku hi nga rivala tinhla tin’wana leti hi lavaka ku ti byela vanhu. Loko u kombisa ndlela yo chumayela ehansi ka swiyimo swo tano exikolweni, titolovete ku vulavula hi ndlela ya ntumbuluko. Loko u lunghiselele kahle, u ta kuma leswaku tinhla ta xisekelo, leti nga emianakanyweni ya wena kumbe leti tsariweke, hakanyingi ti enele ku ku tsundzuxa tinhla-nkulu leti u lavaka ku vulavula ha tona. Kambe, xana u nga xi kuma njhani xivindzi lexi lavekaka loko u vulavula hi ku tirhisa tinhla ta xisekelo?

Hlela Mhaka Ya Wena. Leswaku u vulavula hi ku tirhisa tinhla ta xisekelo, u fanele u hlela mhaka ya wena. Leswi a swi vuli ku hlawula marito lawa u lavaka ku ma tirhisa. Swi vula ku rhanga hi ku ehleketa u nga si vulavula.

Evuton’wini bya siku na siku, munhu wo tshwa enon’wini a nga tikuma a vule mhaka leyi endzhaku a navelaka ku tlhela a yi mita. Un’wana yena a nga tlovatlova mhaka yi sala yi nga hlangani, hi ku khoma la a tshika, hi luya, a khoma lahaya a tshika. Mimboyamelo leyi yi nga hluriwa hi ku koka moya, u hlela tinhla ta xisekelo to olova emianakanyweni ya wena, u nga si sungula ku vulavula. Rhanga hi ku dzikisa pakani ya wena emianakanyweni ya wena, kutani u hlawula magoza lawa u faneleke u ma teka leswaku u fikelela pakani ya kona, ivi u sungula ku vulavula.

Xana u lunghiselela ntirho wa nsimu? U nga tinyiki nkarhi wa ku paka nkwama wa wena wa tibuku ntsena, kambe ni wa ku hlela leswi u nga ta swi vula. Loko u lava ku tirhisa xin’wana xa swingheniso leswi ringanyetiweke eka Vutirheli Bya Hina Bya Mfumo, xi hlaye hi ku phindha-phindha leswaku tinhla-nkulu ti dzika emianakanyweni. Vula tinhla-nkulu ta kona hi xiga xin’we kumbe swimbirhi swo koma. Cinca mavekelo ya mhaka ma pfumelelana ni leswi wena a wu ta yi vekisa swona, ma tlhela ma pfumelelana ni swiyimo swa le nsin’wini ya ka n’wina. U ta swi kuma swi pfuna ku tiva tinhla ta xisekelo hi nhloko. Xana ti nga katsa yini? (1) Exinghenisweni xa wena, u nga vula nchumu lowu vanhu vo tala endhawini ya ka n’wina va karhatekaka ha wona. Kombela n’wini wa muti leswaku a vula vonelo ra yena. (2) Anakanya hi nchumu lowu kongomeke lowu u nga wu nghenisaka emhakeni, ku katsa ni tsalwa rin’we kumbe mambirhi lama kombaka leswi Xikwembu xi tshembiseke ku swi endla leswaku xi va wisisa emaxangwini. Loko n’wini wa muti a ku nyika nkarhi, kandziyisa leswaku Yehovha u ta endla tano hi ku tirhisa Mfumo wa yena, hulumendhe yakwe ya le tilweni. (3) Khutaza n’wini wa muti leswaku a teka goza ro karhi malunghana ni leswi mi buleke ha swona. U nga n’wi siyela buku ni/kumbe u ringanyeta ku dyondza na yena Bibele, kutani mi endla malunghiselelo ya xiheri yo ya emahlweni ni bulo.

Handle ko kanakana, tinhla ta xisekelo leti u nga ta rhandza ku ti tirhisa eka xingheniso xo tano hi leti u ti tivaka hi nhloko. Loko u lava ku languta tinhla ta xisekelo leti tsariweke kunene u nga si nghena emutini wo sungula, handle ko kanakana tinhla ta kona ti ta va ti vumbiwe hi marito ma nga ri mangani lawa u nga ta ma tirhisa exinghenisweni xa wena, tsalwa rin’we kumbe mambirhi ni nhlamuselo yo koma ya leswi u lavaka ku gimeta ha swona. Ku lunghiselela tinhla to tano ta xisekelo ni ku ti tirhisa swi hi sivela ku khoma la hi tshika, hi khoma lahaya hi tshika, naswona swi hi pfuna ku siya munhu a ri ni rungula leri twisisekaka leri a nga ta ri tsundzuka hi ku olova.

Loko ku ri ni xivutiso lexi talaka ku vutisiwa ensin’wini ya ka n’wina kumbe mhaka leyi vanhu va talaka ku pfuxa njhekanjhekisano ha yona, swi nga ku pfuna loko wo endla ndzavisiso hi mhaka ya kona. Hakanyingi leswi u swi lavaka i tinhla timbirhi kumbe tinharhu ta xisekelo kun’we ni matsalwa lawa u nga ta ti seketela ha wona. “Tinhloko-mhaka To Vulavurisana Ta Bibele” kumbe swihlokwana leswi nga ni maletere yo dzwihala ebukwini leyi nge Ku Hlamulana Hi Matsalwa swi nga va ni tinhla ta xisekelo leti hi ku kongoma u lavaka tona. U nga tsakela ku katsa ni nhlamuselo leyi faneleke leyi u yi kumeke enkandziyisweni wun’wana. Tiendlele tinhla ta xisekelo to koma leti tsariweke, namarheta ni kopi ya nhlamuselo ya kona, kutani u swi veka ndhawu yin’we ni leswi u swi tirhisaka ensin’wini. Loko n’wini wa muti a vutisa xivutiso kumbe a lwisana ni mhaka yo karhi, n’wi byele leswaku u nga tsaka loko a ku pfumelela leswaku u n’wi hlamusela leswaku ha yini u pfumela eka nchumu wo karhi. (1 Pet. 3:15) Tirhisa tinhla ta wena leti u ti lunghiseleleke ti va xisekelo xa nhlamulo ya wena.

Loko u ta khongela emahlweni ka ndyangu wa ka n’wina, ntlawa wa dyondzo ya buku kumbe vandlha, nakambe i swinene leswaku u anakanya hi leswi u nga ta swi vula. Hi ku ya hi Luka 11:2-4, Yesu u nyike vadyondzisiwa vakwe xikombiso lexinene xa ku khongela. Loko ku nyiketeriwa tempele eYerusalema, Solomoni u khongele nkarhi wo leha. Swi le rivaleni leswaku u rhange a gayela hi leswi a a ta khongela ha swona. U rhange a vulavula hi Yehovha ni xitshembiso lexi A xi tshembiseke Davhida; kutani a vulavula hi tempele; endzhaku u vulavule hi swiyimo swo karhi ni mintlawa ya vanhu hi ku hambana ka vona. (1 Tih. 8:22-53) Swikombiso leswi swi nga hi pfuna.

Olovisa Tinhla Ta Wena Ta Xisekelo. Xana u lava ku tirhisa tinhla ta wena ta xisekelo loko u nyikela nkulumo? Xana ti fanele ti va ni rungula ro tanihi kwihi?

Tsundzuka leswaku xikongomelo xa tinhla ta xisekelo i ku ku pfuna ku tsundzuka tinhla-nkulu. U nga kuma swi antswa ku tsala swiga swi nga ri swingani leswi u nga ta swi tirhisa eka xingheniso xa wena. Kambe endzhaku ka sweswo, languta tinhla-nkulu, ku nga ri marito. Loko u lava ku tsala tinhla-nkulu teto ehansi, tirhisa swiga swo koma. Tinhla-nkulu ti nga ri tingani leti u rhandzaka ku ti ndlandlamuxa ti tsale ti vonaka kahle eka phepha ra wena ra tinhla ta xisekelo. Sweswo u nga swi endla hi ku ti tsala hi marito lamakulu, hi ku ti khwatihata kumbe hi ku ti fungha hi muvala wo karhi. Ehansi ka yinhla-nkulu yin’wana ni yin’wana, xaxameta tinhla leti u nga ta tirhisa loko u nyikela nkulumo ya wena. Fungha matsalwa lawa u lavaka ku ma hlaya. Swi antswa ngopfu loko u hlaya matsalwa hi ku kongoma eBibeleni. Fungha swifaniso leswi u lavaka ku swi tirhisa. Nakambe u nga tirhisa rungula ra nkoka leri u ri tshaheke enkandziyisweni wa misava, loko ri fanerile. Ndlandlamuxa tinhla ta wena swinene leswaku u va ni mhaka leyi kongomeke leyi u nga ta yi vula. Swi ta ku olovela ku tirhisa phepha ra tinhla ta xisekelo loko u ti tsale kahle.

Van’wana va tirhisa tinhla ta xisekelo to koma swinene. Tinhla ta xisekelo ti nga va ni marito ma nga ri mangani yo hlawuleka, matsalwa lawa xivulavuri xi nga ta ma tshaha hi nhloko, ni mimpfampfarhuto kumbe swifaniso leswi nga ta xi pfuna ku tsundzuka tinhla-nkulu. Hi tinhla leti to koma, xivulavuri xi kota ku nyikela rungula ra xona hi ndlela leyi hlelekeke xi tlhela xi vulavula hi ku ntshunxeka. Yoleyo i pakani ya dyondzo leyi.

Eka matluka 39 ku ya ka 42 ya buku leyi, u ta kuma rungula leri vulavulaka hi “Ku Vumba Nkulumo Leyi Nga Ni Tinhla Ta Xisekelo.” U ta pfuneka loko u hlaya rungula rero loko u tirhela eka dyondzo leyi, leyi nge “Ku Tirhisa Tinhla Ta Xisekelo.”

Ndlela Yo Tirhisa Tinhla Ta Xisekelo. Hambiswiritano, pakani ya wena emhakeni leyi a hi ku lunghiselela nkulumo ya wena hi ku tirhisa tinhla ta xisekelo. I ku kota ku tirhisa tinhla ta xisekelo hi mfanelo.

Goza ro sungula ra ku tirhisa tinhla ta xisekelo i ku lunghiselela ndlela leyi u nga ta ti nyikela ha yona. Languta nhloko-mhaka, hlaya yinhla-nkulu yin’wana ni yin’wana, naswona kumisisa ndlela leyi yinhla yin’wana ni yin’wana yi hlanganaka ha yona ni nhloko-mhaka. Tsala nkarhi lowu yinhla yin’wana ni yin’wana yi nga ta wu kuma. Kutani tlhelela endzhaku u ya kambisisa yinhla-nkulu yo sungula. Tlhela u kambisisa tinhlamuselo, matsalwa, swifaniso ni swikombiso leswi u lavaka ku swi tirhisa loko u ndlandlamuxa yinhla yoleyo. Pfuxeta rungula ra wena ko talanyana ku fikela loko xiyenge xexo xa nkulumo ya wena yi dzika xi twelela emianakanyweni. Endla tano ni hi tinhla-nkulu letin’wana ha yin’we-yin’we. Hlawula rungula leri u nga ta ri siya loko swi laveka, leswaku u heta nkulumo ya wena hi nkarhi. Kutani tlhela u pfuxeta nkulumo hinkwayo. Kambisisa tinhla, hayi marito. U nga nhlokohati nkulumo ya wena.

Loko u nyikela nkulumo ya wena, u fanele u kota ku tshama u langute vayingiseri va wena. Endzhaku ko hlaya tsalwa, hakanyingi u fanele u kota ku ri hlamusela hi ku tirhisa Bibele u nga langutanga tinhla. Hilaha ku fanaka, loko u tirhisa xifaniso, xi hlamusele hilaha a wu ta xi hlamusela hakona eka vanghana, ematshan’weni yo xi hlaya kunene ehansi. Loko u vulavula, u nga hlayi xivulwa xin’wana ni xin’wana ehansi. Vulavula swi suka embilwini, kutani u ta fikelela timbilu ta vayingiseri va wena.

Loko wo kala u kota ku vulavula hi ku tirhisa tinhla ta xisekelo, u ta va u endle nhluvuko lowukulu wa ku va xivulavuri xa le rivaleni lexi nga ni vutshila.