Xiviko Xa Vahuweleri Va Mfumo

Yehova U Tiyisa Malandza Yakwe Lama Tshembekaka

YESU u te: “‘Nandza a hi nkulu eka n’wini wa yena’. Loko va ndzi xanisile, na n’wina va ta mi xanisa.” (Yohane 15:20) Kambe malandza lama tshembekaka ya Yehova ma tiyiseka leswaku u ta ma tiyisa. (Psalma 18:2; Nahum 1:7) Etikweni ra Vantima laha ntirho wa ku rhula wa Timbhoni ta Yehova wu siveriwaka swinene, Yehova u tiyise malandza ya yena ehansi ka ku himeteriwa ni ku khotsiwa, hi laha xiviko lexi landzelaka xi kombaka ha kona:

“Mulanguteri wa xifundza ni vamakwerhu va mune va kwalaho va khomiwe hi ku avanyisiwa ko pfumala xivangelo ivi va nghenisiwa exikamaraneni lexi hi ntolovelo xi hlayiseriweke timbyana leti lahlekeke,” ku vula xiviko. “Va pfaleriwe kona masiku ya 123 va ambale mpahla ya vona yo rhangisa naswona a va nga pfumeleriwi hambi ku ri ku ya exihambukelweni.” Xirho xa Palamendhe xi twe hi ta swiyimo leswi nga riki swa vumunhu ivi xi sungula ku kaneta, naswona eku heteleleni, endzhaku ka masiku ya 123, vamakwerhu va ntshunxiwile. Yehova u tiyise malandza lawa yo tshembeka hi moya wakwe.

Ntokoto wun’wana lowu humaka etikweni leri wu kombisa vuyelo lebyi pfunaka bya ntirho wa hina wo chumayela. Xiviko xi ri: “Emugangeni wun’wana, vanhu a va ri ni ndhuma ya vukari ni ku xandzuka. Hambi swi ri tano, endzhaku ka loko Timbhoni ta Yehova ti chumayerile kona, vo tala va sungule ku xixima vafumi va kwalaho ivi va sungula ku hlanganyela entirhweni wa vhiki na vhiki wa tiko emagondzweni.” Hosi yin’wana ya kwalaho yi lave ku tiva xivangelo xa ku hundzuka loku elangutelweni ra vanhu kutani yi byeriwa ku: “A ku ri hikwalaho ka dyondzo ya ‘mutirheli’ wa Timbhoni ta Yehova.” “Siku rin’wana hosi leyi yi ndzi rhambile endlwini ya yona,” ku vula Mbhoni, “kutani yi ndzi khutaza ku hambeta ni ntirho lowu wunene. U ndzi nyike nyiko ya huku leyikulu leswaku ndzi dya ni ndyangu wa mina.” Eka khamba rin’wana, meyara wa kwalaho u endzele makwerhu, naswona makwerhu u n’wi amukerile ivi a n’wi vekela vumbhoni. Meyara “u kombele timagazini ivi a ku, ‘A hi ehleketi leswaku ku na lexi mi xi onhaka. Hambetani mi endla swikombelo. Hi hava swileriso swo mi khoma. Ndzi anakanya leswaku ku nga ri khale Mfumo wu ta tamela xiphiqo xa n’wina.’”

Phayona leri hlawulekeke ra tsala ri ku: “Hi ku landzela swihehlo leswi humaka eka matsalana wa xiyenge xa politiki, hosi ya kwalaho yi lerise leswaku ndzi khomiwa ni ku khotsiwa ekhotsweni leri nyakapfaleke leri thyakisiweke hi mirhundzu ni vulongo bya swiharhi. Ndzi hlayisiwe ntlhanu wa masiku emunyameni lowu. Loko ndzi ri karhi ndzi ya kona, ndzi khongele Yehova ivi ndzi tsundzuka Psalma 50:15. Kwalaho valanguteri va ndzi twele vusiwana kutani a va wu pfalanga hi laha ku heleleke nyangwa leswaku ndzi kota ku hefemula moya wo tenga. Endzhaku ka ntlhanu wa masiku ekhotsweni leri, ndzi vekiwe endzingweni loko ndzi nyikiwe mbuti leswaku ndzi yi yisa ehosini ya kwalaho, ndzi nga heleketiwi hi munhu. Tanihi leswi ndzi nga balekangiki, ndzi nyikiwe ntshunxeko siku rin’wana ni rin’wana ku sukela hi 3:00 p.m. ku ya eka 7:00 p.m. A ndzi hlangana ni vamakwerhu, naswona a hi chumayela kun’we. Hambi leswi ndzi sunguleke ku vabya enkarhini lowu wo nonon’hwa naswona valala va mina va tshembeke leswaku a ndzi ta fa, Yehova a nga ndzi tshikanga. Ntokoto lowu wu ndzi tshinete kusuhi na Yehova, naswona ndza tiyiseka leswaku nxaniso wu nga ka wu nga ndzi hambanisi ni vanhu va Yehova.”—Ringanisa Varhoma 8:35-39.

Timbhoni ta Yehova ti tlangela ndlela leyi Xikwembu xi ti tiyisaka ha yona eminkarhini ya ku nonon’hwa. Nakambe ti tlangela lava va kombisaka musa eka tona loko ti ri karhi ti hetisisa ntirho lowu wa nkoka swinene wo ponisa vutomi wa ku chumayela mahungu lamanene. Yehova a nga ka a nga wu rivali musa wo tano.—Matewu 25:40.