Timbhoni Ta Yehovha eMisaveni Hinkwayo—India
INDIA! Vanhu va n’we xa ntsevu eka lava nga kona emisaveni va tshama eka tiko-nkulu leri. Loko ti hlanganile, tindzimi to tlula 1 000 ni tindzimi-mpambukwa ti vulavuriwa hi vanhu vo hambana-hambana etikweni leri. Vanhu vo tala i Mahindu ku nga 83 wa tiphesente ta vona, kasi 11 wa tiphesente i Mamoslem, ni Masikh, Mabudha, Majain kasi nhlayo leyi nga sala i Vakreste va nomu.
Timbhoni ta Yehovha a ti ri karhi ti tsakela ku humelela loku xiyekaka eIndia emalembeni ya sweswinyana. Ti kume lava fanaka ni tinyimpfu lava tsakelaka ku yima va tiyile etlhelweni ra Mfumo wa Yehovha, ku nga khathariseki muxaka wihi na wihi wa mitshikilelo ni nkaneto.
Hi xikombiso, nhwanyana loyi a nga endyangwini wa Mahindu hi ndhavuko u ve xilema hikwalaho ka vuvabyi byo khwanyana swirho ku sukela evuhlangini bya yena. Ku xaniseka loku a hlanganeke na kona ku n’wi endle a anakanya hi Xikwembu ni xikongomelo xa vutomi. U kambisise eka vukhongeri byo tala ku kuma nhlamulo kambe a nga wu kumanga nchavelelo. Hikwalaho ka sweswo u lahlekeriwe hi ripfumelo rakwe eka vukhongeri, ku nga ri eka Xikwembu.
Hi nkarhi lowu Timbhoni timbirhi ti hlangane ni nhwanyana loyi evutirhelini bya yindlu na yindlu. Wa tsundzuka: “Ndzi ririle loko ndzi twa va hlaya Nhlavutelo 21:4.” U amukele tibuku to tala ta Sosayiti ya Watch Tower naswona u pfumelele dyondzo ya le kaya ya Bibele ku nga khathariseki nkaneto wa mana wakwe. Nhwanyana loyi u endle ku cinca lokukulu evuton’wini bya yena, u langutane ni nkaneto wa maxaka hi xivindzi, naswona u ve Mbhoni leyi khuvuriweke. U ri: “Ndzi endle nhluvuko lowukulu, hambi leswi a swi tika. Kambe Yehovha Xikwembu nkarhi hinkwawo a ri na mina naswona u ndzi nyikile ku rhula lokukulu ni ntsako.”
Ku Yimela Vugandzeri Bya Ntiyiso eXikolweni U Tiyile
Makwerhu lontsongo wa xisati, u komberiwe hi mudyondzisi wakwe ku ya ekerekeni ya Khatolika ni tlilasi hinkwayo. Makwerhu wa xisati u ale hi ku titsongahata, a vula leswaku i wun’wana wa Timbhoni ta Yehovha naswona a nge gandzeri un’wana kumbe xin’wana ematshan’wini ya Yehovha. Mudyondzisi u vule leswaku loko lavan’wana hinkwavo va ya ekerekeni, na yena u fanele ku ya. Kambe makwerhu wa xisati u yime a tiyile kutani a vula leswaku tanihi leswi lava yaka ekerekeni va nga yeliki ku ya khongela Yehovha u vona swi fanerile leswaku a nga fambi na vona.
Hikwalaho ka ku yima ka nhwanyana loyi a tiyile, mudyondzisi wakwe u lave ku tiva leswi engetelekeke. Siku leri tlhandlhamaka makwerhu wa xisati u n’wi nyike xihloko xa Xihondzo xo Rindza lexi vulavulaka hi vugandzeri bya Yehovha. Hikwalaho ko hlamarisiwa hi leswi a swi hlayeke, mudyondzisi u n’wi ntshunxile eka mintirho hinkwayo ya vukhongeri ya le xikolweni. Makwerhu loyi wa xisati u swi kotile ku n’wi fambisela khume ra timagazini ni ku fambisela vadyondzisi lavan’wana.
Ku Yingisa Nawu Wa Xikwembu eHehleni Ka Ngati Ku Hakeriwa
Sweswinyana xitsongwa-tsongwana xa dari xi hangalake hi mpimo lowukulu swinene eswiphen’wini swin’wana swa tiko ra Kerala. Vuvabyi lebyi hakanyingi byi onhe tinso leswi lavaka vutshunguri byo hlantswa ngati. Mimpopelo ya ngati hi ntolovelo a yi tirhisiwa. Edorobeni rin’wana vanhu vo ringana 14 va amukeriwile exibedlhele hikwalaho ka vuvabyi lebyi. Un’wana wa vavabyi lava a ri Mbhoni, leyi nga nkulu evandlheni ra kwalaho. U byeriwe leswaku mpopelo wa ngati a ku ri byona vutshunguri lebyi a byi kumeka. Nkulu u hlamusele ripfumelo rakwe ra Matsalwa ivi a ala ngati hi laha ku tiyeke. (Mintirho 15:28, 29) Endzhaku ka njhekanjhekisano wo leha madokodela ma vule leswaku u ta fa hikwalaho ka leswi a alaka mpopelo wa ngati.
Vavabyi lavan’wana va 13 va amukele ngati. Lexi twisaka ku vava, hinkwavo ka vona va file endzhaku ka masiku ma nga ri mangani. Makwerhu hi yena a poneke a ri yexe! Valawuri va xibedlhele va hlamale ngopfu. Vatirhi va swa vutshunguri va susumeteleke ngopfu hi maendzo ya nkarhi na nkarhi ya swirho swa vandlha. Endzhaku ka loko a humesiwile exibedlhele, makwerhu u nkhense madokodela, kambe va te: “Ha yini u hi nkhensa? Nkhensa Yehovha, Xikwembu xa wena. Hi xona lexi ku poniseke. Hi kombela u hi khongelela na hina, eka Yehovha Xikwembu xa wena.”
[Bokisi leri nga eka tluka 24]
XIVIKO XA TIKO
Lembe Ra Ntirho Ra 1994
NHLOHLORI YA LAVA NYIKELEKE VUMBHONI: 14 271
MPIMANYETO: Mbhoni yin’we eka vanhu va 65 266
LAVA VEKE KONA EXITSUNDZUXWENI: 38 192
NHLAYO-XIKARHI YA VAHUWELERI LAVA NGA MAPHAYONA: 1 780
NHLAYO-XIKARHI YA TIDYONDZO TA BIBELE: 12 453
NHLAYO YA LAVA KHUVURIWEKE: 1 312
NHLAYO YA MAVANDLHA: 410
HOFISI YA RHAVI: LONAVLA
[Xifaniso lexi nga eka tluka 25]
Hofisi ya rhavi, Lonavla
[Xifaniso lexi nga eka tluka 25]
Ku chumayela mayelana ni “Mahungu Lamanene Lama Nga Riki Na Ku Hela” entsombanweni wa 1963
[Xifaniso lexi nga eka tluka 25]
Ku chumayela endhawini ya vuxavisi ehandlenyana ka Red Fort eDelhi