Tsima Leri Humelelaka Ra Xiphephana Xa Kingdom News
“HA YINI Ku Ri Ni Swiphiqo Swo Tala Swonghasi eVuton’wini?—Xana Paradeyisi Leyi Nga Riki Na Swiphiqo Yi Nga Va Kona?” Leri a ku ri vito ra Kingdom News No. 34, ku nga xiphephana xa matluka ya mune lexi hangalasiweke emisaveni hinkwayo hi tindzimi ta 139 hi April na May n’wexemu. “Yin’wana ya tinhla-nkulu ta lembe” i ndlela leyi Timbhoni ta le Jamaica ti hlamuseleke tsima leri ra ntirho ha yona. “I xihlovo lexikulu xa ntsako eka vamakwerhu,” hi laha Timbhoni ta le Belgium ti vulaka ha kona. Le Riphabliki ra Czech a ku ri ro sungula Timbhoni ta Yehovha ti ve na nkarhi wo hlanganyela eku hangalasiweni ka xiphephana xa Kingdom News. Rhavi ra vika: “Tsima ri nghenise moya wa ku hiseka ni ku chivirika.” Marito lama fanaka ma twiwile ematikweni man’wana yo tala.
Xiphephana xa Kingdom News No. 34 xi ni rungula ro hlawuleka eka lava hlunameke ni ku konya hikwalaho ka manyala lama endliwaka hi vito ra vukhongeri. (Ezekiyele 9:4) Xa chavelela eka lava vutomi bya vona byi nga ni swiphiqo hikwalaho ka ‘masiku ya makumu, ya minkarhi yo nonon’hwa’ lawa ya nga lawulekiki. (2 Timotiya 3:1) Loko xi kombetela eBibeleni, xiphephana xi kombisa leswaku swiphiqo swa vutomi swi ta ololoxiwa ku nga ri khale. Paradeyisi leyi nga riki na swiphiqo yi ta fika hakunene. (Luka 23:43) Vo tala lava hlayeke xiphephana xa Kingdom News va khorwisiwile hi rungula ra xona. Wanuna un’wana wa le Togo u byele Mbhoni a ku: “Leswi mi swi tsaleke a swi kanetiwi.”
Handlekokanakana, ku hangalasiwa ka xiphephana xa Kingdom News ku koke nyingiso lowu nga tolovelekangiki. Le Denmark nhloko ya muti yi angule Mbhoni leyi yi nyikeke xiphephana yi ku: “Ndza ha ku vuya hi le United States. Loko ndza ha ku suka, un’wana u ndzi nyike xiphephana xa n’wina. Kutani sweswi ndza ha ku fika laha, naswona hi ku hatlisa xiphephana lexi fanaka xi tisiwile hi Xidanish!”
Ku Seketela Tsima Hi Ku Hiseka
Timbhoni ta Yehovha emisaveni hinkwayo ti hlanganyele entirhweni wo hangalasa xiphephana hi ku hiseka. Austria, El Salvador, Haiti, Hungary, Italy, New Caledonia, a ku ri man’wana ya matiko lamo tala lama ya vikaka tinhlohlorhi letintshwa ta vahuweleri eka tin’hweti leti a ku hangalasiwa xiphephana xa Kingdom News ha tona.
Le Zambia mulanguteri wa xifundzha u letele Deborah xinhwanyetana xa yena xa malembe manharhu, ku fambisa tibuku hi yindlu na yindlu. Hi nkarhi wa tsima ra Kingdom News No. 34, Deborah u fambise tikopi to tlula 45 ta xiphephana. Mana wakwe u sungule tidyondzo ta Bibele ni van’wana lava tekeke xiphephana xa Kingdom News eka Deborah.
EAfrika Dzonga n’wana wa kondlo-a-ndzi-dyi u fambise xiphephana eka mudyondzi-kulobye la vuriwaka Cashia. Cashia u hlaye xiphephana kutani a ku: “Leswi swa hlamarisa hakunene—ku hanya hi masiku emisaveni ya paradeyisi! Ha yini ndzi nga byeriwanga ha yona khale?” Dyondzo ya Bibele yi sunguriwile. Ku nga si hela vhiki Cashia u kume xiphephana xin’wana. Xa vumbirhi a xi huma eka munghana wakwe loyi va tsalelanaka mapapila wa Murhoma Khatoliki, loyi a tshamaka eKipra. Munghana wakwe hi papila u hlamusele Cashia xivangelo xo va tidyondzo ta Kereke ya Rhoma Khatoliki ti ri ta mavunwa kutani a n’wi byela leswaku u kunguhate ku dyondza Bibele ni Timbhoni ta Yehovha. Ina, sweswo swi ku tiyise swinene ku tiyimisela ka Cashia ko hambeta ni dyondzo yakwe.
Mufana wa malembe ya khume hi vukhale le Switzerland u hlanganyele ni mana wakwe eku hangalaseni ka xiphephana. U nyike wansati un’wana kopi ivi a n’wi khutaza ku yi hlayisisa. Wansati yoloye u vutise mufana loyi loko hakunene a swi tshemba leswi kombisiweke exifanisweni lexi nga exifunengetweni—vutomi lebyi nga riki na makumu emisaveni. Xana mufana loyi u hlamule a ku yini? “Ina, ndza swi tshemba swinene.” Kutani wansati loyi u paluxe leswaku a a ri karhi a lavisisa vukhongeri bya ntiyiso hikuva a ku ri na ku kanetana ko tala evukhongerini bya yena. Eka riendzo ro vuyela, dyondzo ya Bibele yi sunguriwile.
N’wangulo Wa Xihatla
Minkarhi yin’wana xiphephana xa Kingdom News xi vangele n’wangulo wa xihatla eka lava va xi hlayeke. Endzhaku ko hlaya xiphephana, xinhwanyetana xa malembe ya 11 hi vukhale le Belgium xi byele Timbhoni ta Yehovha leswaku a a xi ri khamba ra le mavhengeleni. Mana wa xona a a nga lavi ku yi paluxa mhaka leyi, kambe ripfalo ra xinhwanyetana lexi ri susumetiwe hi leswi xi swi hlayeke, naswona xi sindzise ku ya vonana na murhangeri wa ndhawu ya mabindzu. Eku heteleleni mana wa xona u pfumerile leswaku n’wana wakwe a tlhelela endhawini ya mavhengele ni Mbhoni yoleyo. Murhangeri u hlamarisiwe hi ku tiphofula ka yena. Loko a tive leswaku a ku ri xiphephana xa Kingdom News lexi n’wi susumeteleke ku endla leswi, u tikumele kopi leswaku a ta vona leswi nga eka yona leswi nga ni matimba swonghasi. Sweswi xinhwanyetana xexo xi na dyondzo ya Bibele leyi yaka emahlweni.
Mbhoni yin’wana le Cameroon yi siyele wanuna un’wana kopi ya xiphephana xa Kingdom News naswona yi ri: “Loko hi tlhelela, hi kume leswaku ana se u xi khwatihatile naswona u ni swivutiso swo hlaya. Loko a kume tinhlamulo leti enerisaka, u te: ‘I ntiyiso lowu heleleke leswaku vukhongeri byi engetele ku pfumala ntsako evanhwini. Xiphephana xa n’wina xi ndzi pfune ku twisisa swo tala, kambe ndzi ta tsakela ku tiva swo tala.’” Sweswi u ni dyondzo ya Bibele ya nkarhi na nkarhi.
Mbhoni leyi a yi famba hi yindlu na yindlu eUruguay yi fambisele wanuna un’wana xiphephana. Mbhoni yi ye emahlweni ni ntirho wa yona wo chumayela hi yindlu na yindlu ni ku tirha emiakweni hinkwayo ku kondza loko yi fika enyangweni wa le ndzhaku ka yindlu ya wanuna yoloye. Yi hlamarile ku kuma wanuna luyani a yi yimerile, a tamele xiphephana. Ana se a xi hlayile naswona a a lava rungula leri engetelekeke. Dyondzo yi sunguriwile hi wona nkarhi wolowo.
Vanhu Va Pfuna Eku Hangalaseni
Le Japani Mbhoni leyitsongo yi tshinelele wanuna loyi a nga emalembeni yakwe ya va-50 kutani yi n’wi hlamusela hi xiphephana. Wanuna loyi u vutisile: “Xana u endla yini hi xiphephana xolexo loko u hlangana ni vanhu lava nga voniki?” Mbhoni yi vule leswaku a yi swi tivi. Wanuna loyi u n’wi byele leswaku a yimanyana kutani a nghena endlwini yakwe. U vuye na kopi ya xiphephana xa Kingdom News kutani a ku: “Ana se ndzi xi kumile xiphephana xolexo. Ndzi anakanye leswaku xi na rungula leri tsakisaka ni ra nkoka, kutani ndzi xi kope hi Braille. Ndzi kombela leswaku u tirhisa lexi eka vanhu lava nga mabofu.” Wanuna loyi u hete tiawara to tala a kopa xiphephana xa Kingdom News hi Braille leswaku mabofu ma nga kayeli leswi xi swi tameleke.
Le Slovakia wanuna u xi rhandze ngopfu xiphephana lexi lerova a endla tikopi ta 20, kutani a hangalasa tikopi leti ta ntima ni ko basa hi yexe. Le Switzerland muhuweleri u siyele ndyangu wun’wana xiphephana xa Kingdom News ivi a ya emahlweni a tirha eka miako ya le henhla ya muako lowu ndyangu wolowo a wu tshama eka yona. Loko se a xika, u hlanganisiwe hi xifanyetana lexi humaka endyangwini wolowo, lexi kombeleke tikopi tin’wana ta 19 ta xiphephana. Exikolweni xa xifanyetana xexo, swichudeni a swi averiwe ku tsala hi ta swiphiqo ni ndzavisiso wa ntlhantlho wa swona. A a xi lavela mudyondzi-kulobye un’wana ni un’wana kopi ya xiphephana xa Kingdom News.
A Ku Siyiwanga Munhu
Lava hlanganyeleke etsimeni va ringete hi matimba ku vona leswaku a ku siyiwi munhu. Le New Caledonia Timbhoni timbirhi a ti ya ensin’wini ya le kule leswaku ti ya hangalasa xiphephana xa Kingdom News. Endleleni va vone xindledyana lexi a xi vonaka xi nga tirhisiwi, kambe hambiswiritano, va ehlekete ku vona loko ku ri na loyi a tshamaka emakumu ka xona. Loko va humile emovheni va fambe hi xindledyana, va tsemakanya swinkobyana kukondza va kuma yindlu. Kwalaho a ku tshama mpatswa lowu a wu nga si tshama wu twa hi ta Timbhoni ta Yehovha, kutani wu teke kopi ya xiphephana xa Kingdom News. Endzhakunyana vahuweleri va endle riendzo ro vuyela, kutani lexi va hlamariseke va kume leswaku mpatswa wu lunghise pato ni mabuloho yo hlayanyana leswaku Timbhoni ti ta kota ku chayela movha wa tona wu ya fika endlwini. Dyondzo ya Bibele ya nkarhi na nkarhi yi sunguriwile.
Le Poland Mbhoni a yi boheka ku hundza hi le ndhawini leyi ku akiwaka eka yona leswaku yi ya fambisa kopi ya xiphephana xa Kingdom News eka n’wini wa muti. Vatirhi a va yi vona loko yi ri karhi yi tlhelela endzhaku yi hundza laha ku akiwaka kona. Eku heteleleni, un’wana wa vatirhi u yi vitanile, a yi byela leswaku yi nga va rivali. Loko a va tshinelerile, va yimile va yingiserisisa ku vulavuleriwa ka xiphephana. Va amukele tikopi ta xiphephana xa Kingdom News kun’we ni timagazini naswona endzhakunyana, eka riendzo ro vuyela va teke ni tibuku.
Madzana ya timiliyoni ta xiphephana xa Kingdom News No. 34 ya hangalasiwile hi tindzimi to tala. Rungula ra xona ana se ri tirhe hi matimba. Vo tala va dyondze leswaku paradeyisi leyi nga riki na swiphiqo yi ta va kona. Hi khongelela leswaku lava timbilu letinene va hambeta va angula naswona eku heteleleni va va exikarhi ka “lava titsongahataka,” (BML) lava nga ta “fuma misav̌a, v̌a . . . tiṭakela e ku ruleni lo’kukulu ka v̌ona.”—Pisalema 37:11.
[Bokisi leri nga eka tluka 31]
Hambetani Mi Hangalasa Timagazini!
Tin’hweti ta April na May 1995 ti ve ni tsima leri humelelaka swinene ra ku hangalasiwa ka xiphephana xa Kingdom News No. 34. Etin’hwetini toleto timbirhi, ku tlhele ku hangalasiwa timagazini ta Xihondzo xo Rindza ni Xalamuka! hi ndlela leyi hlamarisaka. Hi xikombiso, makwerhu wa xinuna wa le Riphabliki ra Czech u vika leswaku hi April, u fambise tikopi ta 250 ta xiphephana xa Kingdom News ni timagazini ta 750. Le Guadeloupe, Mugqivela wa April 15, a wu hlawuleriwe ku va siku ro hlawuleka ra timagazini. Kwalomu ka vahuweleri hinkwavo etikweni rolero va hlanganyerile evutirhelini siku rero! Slovakia ri ve ni nhlohlorhi leyintshwa ya ku hangalasiwa ka timagazini hi April. Swiviko leswi fanaka swi fikile swi huma ematikweni man’wana yo tala.
Hikwalaho ka yini u nga endli tin’hweti ta April na May 1996 ti va tin’hweti leti xiyekaka ta ku hangalasiwa ka timagazini? Mavandlha ma nga hlela masiku yo hlawuleka ya timagazini. Vahuweleri va nga hlanganyela entirhweni wa vuphayona bya nkarhinyana. Ku fanele ku khutaziwa ku hangalasiwa ka timagazini hi tindlela to hambana-hambana, naswona rungula ra nkoka leri nga eka xiphephana xa Kingdom News No. 34 ri ta ya emahlweni ri hangalasiwa. Kutani, hilaha swi endlekeke ha kona n’wexemu, entiyisweni Yehovha u ta katekisa moya wa ku hiseka lowu hi wu kombisaka.—2 Timotiya 4:22.