Vuphayona—Ntirho Lowu Tisaka Tihakelo Leti Fuweke

1 Yehova u lava leswaku hi tsaka ni ku vona leswinene hi ntirho wa hina hinkwawo wo chivirika. (Ekl. 5:18) Ntirho wa nkoka swinene lowu hi nga katsekaka eka wona i ntirho wa ku chumayela Mfumo ni ntirho wo endla vadyondzisiwa. Pawulo u khutaze Timotiya: “Endla ntirho wa muevhangeli, hetisisa vutirheli bya wena hi xitalo.” (2 Tim. 4:5, NW) U khutaze Timotiya, naswona marito ya Pawulo ma hi khutaza hinkwerhu namuntlha leswaku hi tinyiketela evutirhelini bya hina. Eka van’wana, ntirho wa moya-xiviri hinkwawo wu nga ha katsa ku tirha tanihi phayona ra nkarhi hinkwawo. Ha yini u nga kambisisi hi xikhongelo loko swiyimo swa wena swi ta ku pfumelela leswaku u nghenela vutirheli bya nkarhi hinkwawo?

2 Goza Lerinene Ra Laveka: Ku nghenela ntirho wa vuphayona swi lava ku teka magoza lama tiyeke hi ku fambisana ni swikhongelo swa hina. Hlakulela ku navela loku humaka embilwini ka ntirho wa Yehova, swin’we ni ku rhandza vanhu. Engetela ntirho wa wena ensin’wini, u aka maendzo yo vuyela ni tidyondzo ta Bibele. Tirhela ku vumba xiyimiso lexinene; u nga kanakani. Lava swiringanyeto eka vakulu ni maphayona. Namarhela ndlela leyi anakanyisisiweke kahle yo hlanganyela entirhweni wo chumayela. Ku tikhoma, ku va xikombiso ni ku tiyimisela i swa nkoka. (1 Vakor. 9:23, 25, 27) Leswi swi le xikarhi ka magoza lamanene lama tekiweke hi vanhu vo tlula 528 lava tsariseke elembeni leri hundzeke ra ntirho.

3 Ku veka tipakani leti heleleke ni ku tirhela eka tona hi vutlhari swi ta hi pfuna leswaku hi endla nhluvuko eku chumayeleni ka hina loko hi ya hi antswisa vuswikoti bya hina. Xana hi nga antswisa swingheniso swa hina emitini kumbe ndlela leyi hi khomaka minkaneto ha yona? Xana hi ti tirhisa hi xitalo tibuku hinkwato leti nga kona? Xana hi fambisa dyondzo ya Bibele leyi yaka emahlweni? Xana hi nga sungula ku phayona nkarhinyana sweswi hi ri ni mianakanyo ya ku phayona nkarhi hinkwawo endzhakunyana? Tipakani ti fanele ti tirha ni ku vekiwa hi ku ya hi leswi hi kotaka ku swi hetisisa. Ku fikelela tipakani to tano swi ta antswisa ku humelela ka hina naswona swi ta hi anerisa swinene.—1 Tim. 4:15, 16.

4 Ndlela Ya Vutomi Leyi Hakelaka: Ku phayona hi nsusumeto lowunene ni ku navela ku endla nhluvuko wa moya swi tisa mimpfuno yo tala. Hi kurisa ku tshemba ka hina Yehova. Vuswikoti lebyikulu eku tameleni ka Rito ra Xikwembu byi ta hi ku byi tirhisa nkarhi na nkarhi evutirhelini. Leswi swi va nkucetelo lowunene ebandlheni, naswona van’wana va nga ha khutazeka leswaku va hlanganyela hi xitalo evutirhelini hikwalaho ka xikombiso xa hina xa ku chivirika. Ku phayona ku nga hi pfuna leswaku hi ya hi languta vutomi hi tlhelo ra moya, ivi ku hi sirheleta eka ku navela swilo swa misava ni vunghana bya yona.

5 Yesu u byele valandzeri vakwe: “Ntshovelo i wukulu, kambe vatirhi a va talanga. Hikokwalaho, khongelani N’wini wa ntshovelo, leswaku a rhuma vatirhi eku tshoveleni ka yena.” (Mat. 9:37, 38) Xilaveko xa vatirhi i xikulu swinene sweswi ku tlula leswi a xi ri xiswona esikwini ra Yesu. Vuphayona byi hi nyika nkarhi wo va ni xiphemu lexikulu entirhweni lowu wa xihatla, lowu ponisaka vutomi. Ku hava xilo lexi xi nga fanaka ni ku eneriseka ni ntsako lowu kumekaka hi ku tirhisa vutomi bya hina entirhweni wa nkarhi hinkwawo, wa Muvumbi wa hina Lonkulu.—Swiv. 10:22.