Dyondzo Ya Xikwembu Yi Ni Nkucetelo Wa Matimba
1 Mawaku lunghelo leri hi nga na rona ra ku amukela vuleteri lebyi humaka eka Loyi a Tlakukeke, Muvumbi wa hina, Yehovha Xikwembu! (Ps. 50:1; Esa. 30:20b) Eka matiko hinkwawo namuntlha, mintshungu ya vanhu yi khitikanela entshaveni yakwe ya vugandzeri lebyi tengeke leswaku yi ta dyondzisiwa hi yena. (Mik. 4:2) Timiliyoni tin’wana ti tsarisa eswikolweni leswi tlakusaka mianakanyo ya vanhu ni vutlharhi bya misava. Kambe vutlharhi lebyi fularhelaka Yehovha ni Rito rakwe leri tsariweke i vuhunguki emahlweni ka Xikwembu, naswona lava kongomisiwaka hi byona va va swihunguki.—Ps. 14:1; 1 Kor. 1:25.
2 ENtsombanweni wa hina wa muganga wa nan’waka, nhloko-mhaka leyi nge “Dyondzo Ya Xikwembu” yi ta fambisana ni nongonoko hinkwawo. Hi ta dyondza leswaku Rito ra Xikwembu swin’we ni moya wa xona swi hi hlanganisa hi vumakwerhu bya misava hinkwayo, swi vumba vumunhu byerhu, swi hi sirhelela eka tidyondzo ta mademona, swi tlhela swi hi letela ku va vatirheli vo antswa. Xana u ta va kona eka wun’wana wa mintsombano leyi leswaku u vuyeriwa hi dyondzo ya Xikwembu?
3 Nkucetelo Eka Mahanyelo Ya Vukreste: Dyondzo ya Xikwembu yi pfuna ku aka mapfalo ya hina. Un’wana ni un’wana u velekiwe a ri ni ripfalo, kambe leswaku ri hi kongomisa endleleni ya ku lulama ni le ntirhweni lowu tsakisaka Yehovha, ri fanele ku leteriwa. (Ps. 19:7, 8; Rhom. 2:15) Mianakanyo ya vanhu va misava a yi vumbiwanga hi ku ya hi Rito ra Xikwembu, hikwalaho ka sweswo a va swi tivi leswi swi nga swinene ni leswi biheke. Ku pfuka timholovo etimhakeni ta mahanyelo ni milawu hikuva un’wana ni un’wana u lwela ku endla leswi tsakisaka yena. Vanhu vo tala va lava ntshuxeko lowu heleleke wo tilangela ndlela ya vona ya mahanyelo. Va ala ku yingisa xihlovo xa vutlharhi bya ntiyiso. (Ps. 111:10; Yer. 8:9; Dan. 2:21) Kambe dyondzo ya Xikwembu yi hi lulamisele timhaka toleto, naswona hi ni vun’we tanihi ndyangu wa Xikwembu hikuva hi dyondzisiwa hi xona. Hi languta vumundzuku hi ripfalo leri baseke, hi tshama hi khomekile evutirhelini byerhu.
4 Dyondzo ya Xikwembu yi hi pfuna ku bakanya “mheho yihi ni yihi ya dyonḍo.” (Ef. 4:14) A hi xisiwi hi tidyondzo ta filosofi, leti endlaka vanhu va kambela swihoxo ni ku va vaxopaxopi, leti va khutazaka ku titshemba, ni leti onhaka mahanyelo. Ha tsaka leswi hi dyondzisiwaka hi Yehovha, xisweswo hi papalata mbitsi ni ku karhateka loku welaka vo tala. Milawu ni switsundzuxo swa Yehovha swi kotisa ‘rito leri taka hi le ndzhaku ka hina,’ ri ku: “Ndlela hi leyi, fambani ha yona.”—Esa. 30:21.
5 Minhlangano Ni Vutirheli Bya Hina: Tsalwa ra Vaheveru 10:23-25 hi ri languta tanihi xileriso lexi humaka eka Xikwembu. Eminhlanganweni ya vandlha hi dyondzisiwa hi Yehovha. Xana i mukhuva wa hina ku tshama hi ri kona eminhlanganweni, kumbe xana hi languta minhlangano tanihi nchumu lowu nga vuliki nchumu? Tsundzuka, ku hlengeletana i xiphemu xa vugandzeri bya hina. A hi fanelanga hi ku languta tanihi mhaka ya ku tihlawulela. Hi nga tshuki hi hundziwa hi xiphemu xo karhi xa nongonoko wa swakudya swa moya lexi Yehovha a hi lunghiseleleke xona.
6 Muxe u khongele Xikwembu a ku: “Hi dyonḍise ku hlaya ŝinene masiku ya hina, leŝaku timbilu ta hina ti ṭunḍukela e v̌utlharini.” (Ps. 90:12) Xana na hina hi khongerisa xisweswo? Xana hi tlangela siku rin’wana ni rin’wana ro saseka? Loko swi ri tano, ‘mbilu ya hina yi ta va ni vutlharhi’ hi ku tirhisa siku rin’wana ni rin’wana hi ndlela ya nkoka, hi dzunisa Muleteri werhu Lonkulu, Yehovha Xikwembu. Dyondzo ya Xikwembu yi ta hi pfuna ku endla sweswo.