Anakanyela Van’wana—Xiyenge 1
1 Ha tsaka ku vona ku humelela ka vanhu va Yehovha, loku vangeke ku kula ka nhlayo ya mavandlha. Etindhawini tin’wana, ngopfu-ngopfu emadorobeni lamakulu, miako ya Tiholo ta Mfumo yi tirhisiwa ngopfu, minkarhi yin’wana swi lava leswaku mavandlha yo hlaya ma tirhisa Holo yin’we ya Mfumo. Xiyimo lexi xi lava ku anakanyela lokukulu eka hinkwavo lava khumbekaka.
2 Vandlha rin’wana ni rin’wana leri tirhisaka Holo ya Mfumo ri fanele ku yi siya yi basile naswona yi ri exiyin’weni lexi langutekaka hikwalaho ka vamakwerhu lava nghenaka endzhaku. Switulu swi fanele ku vekiwa hi ndlela leyi hlelekeke, tibuku tihi na tihi leti nga ekhawuntarini ti fanele ku vekiwa endhawini ya tona, naswona swilo swihi na swihi swa munhu hi xiyexe leswi siyiweke eHolweni ya Mfumo swi fanele ku susiwa. Swihambukelo swi fanele ku siyiwa swi ri exiyin’weni lexinene, hi tiyiseka leswaku swisibi, mathawula ni maphepha swi kona naswona thyaka leri nga emathinini ri halatiwile.
3 Loko ku hleriwe leswaku nhlangano wun’wana wu sungula endzhakunyana, lava salaka endzhaku ka nhlangano lowo sungula a va fanelanga va hlwela swi nga fanelanga, va kavanyeta malunghiselelo ya nhlangano lowu landzelaka. Mabulo ya vunghana lama lehisiwaka ma nga vanga ntlimbano ephasejini kutani swi hlwerisa vamakwerhu lava endlaka malunghiselelo ya nhlangano lowu taka. Ndhawu yo paka ya le Holweni ya Mfumo yi nga ha va yi ri yitsongo, hikwalaho swi nga va kahle ku suka hi xihatla leswaku lava nghenaka va ta kuma ndhawu yo paka. Hi hala tlhelo, lava yaka enhlanganweni lowu landzelaka a va fanelanga va hatlisa va fika, leswi nga vangaka ntlimbano lowu nga fanelangiki ephasejini, ni le ndhawini yo paka.
4 Laha mavandlha yo hlaya ma hlanganyelaka ndhawu yin’we, ku ni xilaveko xo hlawuleka xa ntirhisano lowukulu eku endleni ka malunghiselelo ya vhiki na vhiki yo basisa Holo ya Mfumo. Hi ntolovelo, mavandlha ma cincana hi ku ya hi nkarhi lowu vekiweke. Loko vandlha ra ka n’wina ri ri ni vutihlamuleri, tiyisekani leswaku ntirho wo basisa wu endliwa hi vukheta naswona hi xihatla. Hikwalaho mavandlha man’wana lama tirhisaka holo a ma nge vi na xivangelo xo vilela.
5 Minkarhi yin’wana, ku ni xilaveko xa leswaku vandlha rin’wana ni rin’wana ri cinca minkarhi ya rona ya minhlangano, tanihi loko ku ta ta mulanguteri wa xifundzha. Loko vandlha rin’wana ri khumbeka, vakulu va fanele ku tivisa vandlha rero ka ha ri emahlweni leswaku rona ri ta tivisa vahuweleri va rona ka ha ri na nkarhi hi laha swi nga kotekaka ha kona. Nakambe, loko ku va ni xiyimiso xa ntirho lowu hleriweke, xo tanihi Xikolo xa Ntirho xa Maphayona, nhlangano wa vakulu va xifundzha kumbe mucato, mavandlha laman’wana ni valanguteri vahi na vahi va xifundzha lava khumbekaka va fanele ku byeriwa kahle ka ha ri emahlweni; xisweswo a va nge endli xiyimiso xo tirhisa Holo ya Mfumo hi nkarhi wun’we.
6 Ku ni tiholo to tala leti tirhisiwaka hi mavandlha lama averiweke eka swifundzha swo hambana. I swa nkoka leswaku valanguteri lava famba-fambaka lava endzelaka mavandlha lawa va tshama va ri karhi va tivisa rin’wana ni rin’wana hi riendzo leri landzelaka exiyimisweni. Malunghiselelo ya xihatla kumbe ku nonon’hweriwa kun’wana ku nga va kona loko valanguteri vambirhi lava famba-fambaka va endla xiyimiso xo endza hi vhiki leri fanaka.
7 Ku anakanyela van’wana hi rirhandzu, mbulavurisano lowunene, ku kunguhata ka ha ri na nkarhi ni ntirhisano swi ta pfuna ku hlayisa vuxaka lebyinene exikarhi ka mavandlha naswona swi ta endla leswaku ‘hinkwaswo swi endliwa hi mukhuva lowo saseka, hi nawu wa kona.’—1 Kor. 14:40.