Xiphephana Xa Kingdom News Lexi Fikeke Hi Nkarhi Xi Ta Hangalasiwa eMisaveni Hinkwayo
1 Hi Sonto, April 23, nkulumo yo hlawuleka ya le rivaleni yi ta nyikeriwa yi ri ni nhloko-mhaka leyi kokaka miehleketo leyi nge “Makumu Ya Vukhongeri Bya Mavunwa Ma Tshinele.” Eku gimetiweni ka nhlangano wa siku rolero, xiphephana xa matluka ya mune lexi ntlhontlhaka miehleketo xa Kingdom News xi ta humesiwa. Rungula leri nga enkarhini leri xi nga na rona ri ta hangalasiwa emisaveni hinkwayo hi mavhiki manharhu ku sukela hi April 24 ku ya eka May 14.
2 Eswiphen’wini hinkwaswo swa misava, vanhu va pfilunganyekile. Ku nga khathariseki leswaku va tshama kwihi, va karhatiwa hi swiphiqo. Xiphephana xa Kingdom News xi ta tsakisa lava khumbekaka swinene hi leswi humelelaka, tanihi leswi xi nga ta va yisa eRitweni ra Xikwembu ku nga xihlovo lexi nga hoxisiki xa nkongomiso wa munhu. (Ps. 119:105) Hinkwerhu ka hina hi langutele ku kuma kopi ya xiphephana xa Kingdom News loko xi humesiwa hi April 23. Enkarhini wa sweswi ku ni swo tala swo swi endla eku lunghiseleleni ka tsima leri lerikulu ra mavhiki manharhu.
3 Khutaza Hinkwavo Leswaku Va Hlanganyela Hi Ku Hiseka: I vamani lava nga ha hlanganyelaka entirhweni lowu? Entiyisweni un’wana ni un’wana loyi a nga muhuweleri u ta hisekela ku endla sweswo! Ku vuriwa yini hi swichudeni swa Bibele leswi vaka kona eminhlanganweni ya vandlha nkarhi na nkarhi? Van’wana va hlanganyele na hina nkarhi wo leha naswona va endla nhluvuko lowu xiyekaka. Loko vutomi bya vona byi pfumelelana ni minsinya ya nawu ya Matsalwa, xana va faneleka ku vuriwa vahuweleri va Mfumo? Muhuweleri loyi a fambisaka dyondzo ya Bibele a nga ha bula hi mhaka leyi ni xichudeni, naswona loko xichudeni xi navela ku hlanganyela entirhweni wa nsimu, vakulu vambirhi va ta pfuxeta na xona mhaka leyi nga eka matluka 98 na 99 ya buku leyi nge Ku Hleleriwa Ku Hetisisa Vutirheli Bya Hina. Leswi swi fanele ku endliwa hi xihatla leswaku lava fanelekaka tanihi vahuweleri lava nga khuvuriwangiki va ta hlanganyela hi xitalo etsimeni leri. Swichudeni swa Bibele leswi nga siki fanelekaka ku va vahuweleri lava nga khuvuriwangiki swi nga ha khutaziwa ku hlanganyela eku hangalaseni ka xiphephana lexi nga enkarhini lexi nge Kingdom News eka vanghana ni swirho swa ndyangu.—Vona Xihondzo xo Rindza xa November 15, 1988, tluka 17, ndzimana 8.
4 Ntirho lowu a wu nonon’hwi; un’wana ni un’wana a nga hoxa xandla. Vatswari va nga ha hlela nkarhi wo titoloveta xiphephana lexi xa Kingdom News tanihi xiphemu xa dyondzo ya ndyangu ya Bibele ya vhiki na vhiki leswaku swirho hinkwaswo swa ndyangu swi ta lungheka kahle leswaku swi xi fambisa hi yindlu na yindlu. Xingheniso lexo olova hakanyingi xi fanerile. Endzhaku ka xingheniso xo koma, fambisa xiphephana xa Kingdom News eka n’wini wa muti, kutani u n’wi khutaza ku xi hlaya. Loko n’wini wa muti a kombisa ku tsakela, tsala vito ra yena leswaku u ta tlhelela u ya hlakulela ku tsakela. (1 Kor. 3:6, 7) Xilotlelo xa ku humelela i ku va ni xingheniso lexo olova, lexi lunghiseleriweke kahle.
5 Ku ta va ni ‘swo tala swo swi endla’ hi April na May. Enkandziyisweni wa n’hweti leyi taka wa Vutirheli Bya Hina Bya Mfumo, ku ta nyikeriwa rungula leri engetelekeke eka xiengetelo lexi nge ‘Ku Ni Swo Tala Swo Swi Endla eNtirhweni Wa Hosi.’—1 Kor. 15:58.