Pfuna Lava Nga Riki Na Ripfumelo
1 Manguva lawa, ku va la dyondzekeke ni la endlaka nhluvuko hi tlhelo ro anakanya swi tolovelekile. Tifilosofi ta vanhu ni mianakanyo leyi nga twisisekiki swi rhangisiwa emahlweni, kasi mimpimanyeto ya moya ya honisiwa. Vanhu lavanene lava tsakelaka tinhla leto olova ni mintiyiso leyi twisisekaka va ta amukela lunghelo ro kambisisa buku leyi nge Bibele—I Rito Ra Xikwembu Kumbe I Ra Munhu? Buku leyi yi nga pfuna lava pfumalaka ripfumelo. (Rhom. 1:19, 20) Tiyiseka leswaku wa vuyela eka hinkwavo lava kombiseke ku tsakela.
2 U nga ha sungula bulo ra wena hi ndlela leyi:
◼ “Eriendzweni ra mina ra nkarhi lowu hundzeke, ndzi vutise xivutiso lexi nge, Hi byihi vumundzuku bya munhu ni misava? Xiya ndlela leyi buku leyi ndzi ku siyeleke yona yi hlamulaka xivutiso xexo ha yona.” Pfula eka tluka 161 ra buku leyi nge Rito Ra Xikwembu kutani u n’wi kombela ku hlaya tindzimana 29 na 30. Loko ku tsakela ku ya emahlweni, u nga ha vutisa u ku: “Loko leswi swi ri leswi vumundzuku byi hi khomeleke swona, kutani ha yini misava yi tele hi madzolonga ni tihanyi letin’wana?” Loko swi fanerile, yinhla leyi ku nga buriwa ha yona hi nkarhi wolowo kumbe eriendzweni ra wena ra nkarhi lowu taka hi ku bula hi ndzima 10 ya buku leyi nge Rito Ra Xikwembu.
3 Kumbe u nga ha tirhisa xingheniso lexi loko u vuyela:
◼ “Timotiya wa Vumbirhi 3:16, 17 yi hlamusela mhaka leyi tiyeke mayelana ni lomu Bibele yi humaka kona; ndzi tsakela ku tiva leswi u swi ehleketaka malunghana ni mhaka leyi. [Hlaya u tlhela u n’wi nyika nkarhi wo hlamusela.] Xana a wu nga ta pfumela leswaku loko vanhu vo tala a va ri ni langutelo leri ra Bibele, a hi nga ta va na swiphiqo swo tala leswikulu laha hi tshamaka kona?” Yimela nhlamulo. Hlaya ndzimana 4 eka tluka 176 ebukwini leyi nge Rito Ra Xikwembu. Vutisa n’wini wa muti loko u nga vuya hi nkarhi lowu faneleke leswaku mi ta yisa bulo emahlweni.
4 U khome Bibele ya wena, u nga ha sungula bulo hi ku vula leswi:
◼ “Hi tlhele hi vuya leswaku hi ta kombisa leswaku ha yini ku dyondza Bibele swi fanerile eminkarhini ya hina. Vanhu vo tala va na yona Bibele, kambe a hi vangani lava yi hlayaka. Van’wana va hi byela hi ku kongoma leswaku a va ha ri na ntshembo eBibeleni. Xana u titwa njhani hi mhaka leyi? [Yimela nhlamulo.] Xin’wana lexi hi khorwisaka leswaku Bibele i Rito ra Xikwembu leri huhuteriweke i ku hetiseka ka vuprofeta bya yona.” Kombetela eka tluka 134 kutani u hlaya ndzimana ya xingheniso. Endzhaku ka ku kombisa tinhla tin’wana leti tsakisaka eka ndzima leyi, n’wi byele leswaku u ta tlhela u vuya emasikwini ma nga ri mangani leswaku mi ta yisa bulo emahlweni.
5 Ndlela yin’wana leyi u nga sungulaka riendzo ro vuyela ha yona i ku vula leswi:
◼ “Vanhu va xanisekile ni ku vona nhlomulo hikwalaho ka vubihi ni vuhomboloki. Bibele, ku nga Rito ra Xikwembu, yi hlamusela xivangelo lexi endlaka leswaku hi langutana ni swiphiqo leswi. [Pfula tluka 134, kutani u hlaya ndzimana 1 ya ndzima 10.] Lava tinyikaka nkarhi wo kambisisa Bibele va ta kota ku twisisa vuprofeta lebyi bya Bibele lebyi xiyekaka naswona va ta tlhela va va ni ntshembo wo vona misava leyi yi hundzuriwa paradeyisi yo saseka.” Hlamusela n’wini wa muti hi lunghiselelo ra hina ra dyondzo ya le kaya ya Bibele ya mahala, u n’wi byela leswaku u ta tlhela u vuya hi nkarhi lowu nga ta va wu n’wi lungherile.
6 Hi nga va mpfuno eka van’wana hi ku tirhisa buku leyi leswaku hi va pfuna ku kuma xisekelo lexi tiyeke xa ripfumelo eka Muvumbi wa vona.