Tlhelela Eka Lava Va Kombiseke Ku Tsakela
1 Eka 1 Vakorinto 3:6, Pawulo u tsarile: “Mina ndzi byarile, Apolosi ú cheletile; kambe Xikwembu hi xona xi miriseke.” Pawulo u tirhise langutelo leri leswaku a pfuna vamakwavo ku vona xilaveko xo tirha hi vun’we ehansi ka vunhloko bya Kreste. Hi ndlela leyi nakambe u va pfune ku xiya xiphemu xa nkoka lexi a va xi endla entirhweni wa nkoka wa ku byala ni wa ku cheleta.
2 Ntirho wolowo wo ponisa vutomi wu fanele wu gimetiwa esikwini leri. Tanihi Vakreste lava tinyiketeleke, hi ni vutihlamuleri lebyi fanaka byo pfuna van’wana leswaku va va valandzeri va Yesu. (Mint. 13:48) Xana u ta ku landzela njhani ku tsakela loku u koteke ku ku pfuxa hi ku tirhisa buku leyi nge Nghwazi Leyi Tshameke Yi Hanya?
3 Loko u tlhelela eka munhu loyi a tekeke buku, u nga ha ku:
◼ “Nkarhi lowu hundzeke loko hi vulavula, hi bule hi leswi Yesu Kreste a a ri xiswona tanihi munhu. Ndzi tsakele ku ku siyela buku leyi nge Nghwazi Leyi Tshameke Yi Hanya. I yini lexi ku tsakiseke swinene mayelana na dyondzo ya Yesu na hi vumunhu byakwe?” Yimela nhlamulo. Phendla eka ndzima 113, kutani u bula hi xikombiso lexinene xa ku titsongahata ka Yesu. Hlaya Vafilipiya 2:8 leswaku u komba ndlela leyi muapostola Pawulo a ri tekeke ha yona langutelo ra Yesu ro titsongahata. Kutani u nga ha hlamusela ndlela leyi ku nga dyondziwaka swo tala ha yona edyondzweni ya Bibele ya nkarhi na nkarhi.
4 U nga ha hlawula xingheniso lexi:
◼ “Hi vulavule hi swilo leswi Yesu a swi endleke loko a ha ri emisaveni leswi kombiseke leswaku wa hi khathalela hakunene. Xana u anakanya leswaku u ta endla yini eku heteleleni leswaku a ntshunxa lava va xanisekeke ngopfu?” Yimela nhlamulo. Pfula eka ndzima 133, kutani u bula hi tinhlamuselo leti nga eka ndzimana ya vuntlhanu. Pfula eka xifaniso lexi nga eka tluka leri landzelaka, kutani u hlamusela ndlela leyi swilo swi nga ta famba ha yona loko ku rhandza ka Xikwembu ku endliwa emisaveni tanihi le tilweni. Kombisa mimpfuno leyi nga ta kumiwa hikwalaho ko dyondza swo tala.
5 Loko u nga swi kotanga ku fambisa buku eka riendzo ro sungula hikwalaho ka ku tsakela loku nga nyawuriki, kumbexana u nga ha sungula bulo ra wena hi ndlela leyi:
◼ “Ndza tshemba mina na wena ha pfumela leswaku vanhu vo tala namuntlha va hanya vutomi bya vona hi ku tekelela munhu loyi va n’wi langutaka tanihi xikombiso xa vona lexikulu. Yesu Kreste i xikombiso lexikulu lexi mani na mani a nga xi landzelaka. Ndzi ta tsakela ku avelana na wena dyondzo ya nkoka swinene leyi ndzi yi kumeke hi ku dyondza xikombiso lexi Yesu a xi vekeke. [Phendla eka ndzima 40 ebukwini leyi nge Nghwazi, kutani u bula hi dyondzo ya Yesu malunghana ni ntwela-vusiwana.] Yona yi ndzi tsundzuxe swinene hi ndlela leyi ndzi faneleke ku kombisa mfanelo leyi eka van’wana ha yona.” Hlaya Matewu 5:7. Loko sweswi se ku vonaka ku ri na ku tsakela loku engetelekeke fambisa buku kumbe broxara leyi nge Xana Xikwembu Xa Hi Khathalela Hakunene?
6 Kumbexana u nga ha lava ku ringeta xingheniso lexi xo kongoma:
◼ “Nkarhi lowu hundzeke loko ndzi ri laha, hi bule hi nkoka wo kuma vutivi mayelana na Yesu. Yohane 17:3 yi vula leswaku ku nghenisa vutivi byo tano swi vula ‘vutomi lebyi nga heriki.’ Xana hi nga swi endlisa ku yini sweswo?” Yimela nhlamulo. Yana emahlweni hi ku hlamusela lunghiselelo ra hina ra dyondzo ya Bibele ni ndlela yo pfuneka ha rona.
7 Pawulo u vula leswaku eku tshoveleni mutirhi u “ta amukela hakelo ya yena hi mpimo wa ntirho wa yena.” (1 Kor. 3:8) Loko hi gingiriteka hi matimba hi ri karhi hi pfuna van’wana leswaku va va valandzeri va Yesu, hakelo ya hina yi ta va leyikulu.