Tiphine Hi Ku Nyikela Vumbhoni Hi Rixaladza
1 Hinkwerhu Ka Hina Hi Tsakela Swilo Leswi Hi Swi Endleke Kahle. Marka 7:37 Yi Vula Leswaku Mintshungu Yi Vule Marito Lawa Malunghana Na Yesu: “Swilo Hinkwaswo U Swi Endle Kahle.” A Swi Hlamarisi Leswi Yesu A Tiphineke Hi Ku Endla Ku Rhandza Ka Yehovha! (Ringanisa Pisalema 40:8.) Loko Hi Ehleketisisa Hi Swiringanyeto Leswi Landzelaka, Na Hina Hi Ta Kuma Ntsako Loko Hi Ri Karhi Hi Yingisa Xileriso Xa Yesu Xo “Chumayela Evanhwini Ni Ku Nyikela Vumbhoni Bya Rixaladza.” (Mint. 10:42) Hi January Hi Ta Fambisa Buku Leyi Nge Nghwazi Leyi Tshameke Yi Hanya Kumbe Leyi Nge Ku Lavisisa Ka Vanhu Xikwembu. Xana Hi Nga Ti Tirhisa Njhani Tibuku Leti Leswaku Hi Nyikela Vumbhoni Bya Rixaladza?
2 Tanihi leswi vanhu hakanyingi va karhatekaka hi timhaka ta rihanyo, u nga ha vula leswi:
◼ “Ku nga khathariseki nhluvuko lowu endliweke eswivandleni swa mirhi, ka ha ri ni ku xaniseka lokukulu hikwalaho ka mavabyi. Hi ku vona ka wena, xana leswi swi vangiwa hi yini? [Yimela nhlamulo.] Yesu Kreste u vule leswaku mintungu a yi ta va xikombiso xa masiku ya makumu. [Lk. 21:11] Kambe Bibele yi tlhela yi vulavula hi nkarhi lowu vuvabyi byi nga ta va byi nga ha ri kona. [Hlaya Esaya 33:24.] Xiya ndlela leyi buku leyi yi kandziyisaka ha yona ntshembo eka dyondzo leyi ya xisekelo ya Bibele.” Kandziyisa tinhlamuselo leti faneleke eka Dyondzo 46 kumbe 57 ivi u yi fambisa hi munyikelo wa R12,00.
3 Loko u nyikela vumbhoni hi xitshuketa ekusuhi ni tindhawu ta mabindzu, u fanele u xeweta kutani u vutisa:
◼ “Xana u vona onge masiku lawa swilo swi ya swi durha swinene lerova swa nonon’hwa ku kuma mali ya swixavaxavani leswi? [Yimela nhlamulo.] Xana u ehleketa leswaku ku ta kala ku fika nkarhi lowu hi nga ta va hi sirhelelekile hi tlhelo ra ikhonomi?” Yimela nhlamulo. Kutani hlamusela Dyondzo 52, leyi nge “Yesu U Phamela Magidi Hi Hlori,” u yisa nyingiso eka xifaniso ni swiyenge leswi faneleke. Fambisa buku hi munyikelo wa R12,00. U nga ha n’wi byela ndlela leyi u tsakeleke bulo leri ha yona, kutani u vutisa: “Xana swi nga koteka leswaku hi yisa bulo leri emahlweni enkarhini wun’wana?” Hi ndlela leyi, u nga ha kota ku kuma nomboro ya riqingho ya munhu yoloye ni adirese ya laha a tshamaka kona.
4 U nga ha va ni nkarhi wo ringeta xingheniso lexi loko u vulavula ni mutswari kumbe muntshwa:
◼ “Vantshwa vo tala va lava ku tekelela vanhu lava nga swikombiso emahanyelweni, kambe a swi talanga ku kuma lava nga swikombiso leswinene. Yesu Kreste i xikombiso lexinene eka mani na mani. [Hlaya 1 Petro 2:21.] Vutomi byakwe hinkwabyo a byi fambisana ni vugandzeri bya Tata wakwe wa le tilweni. Xana u ehleketa leswaku swi nga va njhani loko vanhu vo tala vo ringeta ku n’wi tekelela?” Yimela nhlamulo. Yisa nyingiso eka ndzimana 3 eka tluka leri landzelaka lero hetelela ra buku leyi, leyi hlamuselaka timfanelo takwe leto hlawuleka. Hlamusela ndlela leyi buku leyi nge Nghwazi yi nga hi pfunaka ha yona leswaku hi va Vakreste vo antswa. Fambisa buku hi munyikelo wa R12,00 ivi u endla malunghiselelo lama tiyeke ya ku tlhela u vuyela.
5 Loko u tlhelela ku ya vona lava kombiseke ku tsakela, u nga ha tikarhatela ku sungula dyondzo ya Bibele hi ku pfumelelana ni xingheniso lexi:
◼ “Loko hi vulavula enkarhini lowu nga hundza, u vule nhlamuselo leyi tsakisaka swinene. [Boxa nhlamuselo leyi vuriweke hi munhu yoloye.] A ndzi ri karhi ndzi ehleketa hi mhaka yoleyo, naswona ndzi tsakela ku ku byela vuyelo bya ndzavisiso wun’wana lowu ndzi wu endleke emhakeni leyi. [Hlaya tsalwa leri faneleke.] Hi fambisa dyondzo ya mahala leyi pfuneke vanhu va timiliyoni leswaku va kambisisa tidyondzo ta xisekelo ta Bibele hi nkarhi wo koma. Dyondzo yo tano yi nga tiyisa ntshembo wa wena eku hetisekeni ka switshembiso swo karhi swa Xikwembu.” Kandziyisa swivutiso swin’wana leswi nga ta hlamuriwa. Loko munhu a ala nyiko ya dyondzo ya Bibele, hlamusela leswaku hi ni dyondzo yin’wana ya xihatla leyi hetaka 16 wa mavhiki ya 15 wa timinete ntsena. N’wi kombise broxara leyi nge Leswi Xi Swi Languteleke, pfula dyondzo 1, ivi u vutisa loko swi nga koteka ku endla nkombiso wa dyondzo yo sungula.
6 Tsundzuka Ku Tirhisa Swiphephana: Swi nga tirhisiwa hilaha ku humelelaka leswaku u pfuxa ku tsakela eka swilo swa moya, kumbe swi nga ha siyiwa loko ku nga ri na buku leyi amukeriweke. Laha ku kombisiwaka ku tsakela, tirhisa rungula leri nga endzhaku ka xiphephana leswaku u khutaza munhu loyi ku amukela dyondzo ya le kaya ya Bibele ni ku ta eminhlanganweni ya hina.
7 Vana ni vutshila entirhweni wa wena, naswona u ta tiphina hi wona. Tikarhatele ku nyikela vumbhoni hi rixaladza, ivi u tiphina hi ku swi endla kahle swiyenge hinkwaswo swa vutirheli.—1 Tim. 4:16.