Xana U Ni Moya Wa Ku Tinyiketela?

¹ Ku tlangela ka hina leswi Yesu Kreste a swi endleleke vanhu handle ka vutianakanyi, swi fanele swi susumetela un’wana ni un’wana wa hina ku tirhisa vuswikoti bya yena, matimba ni ntamu wa yena hi ndlela leyi kombisaka ku tinyiketela. Matsalwa ma hi khutaza: ‘Nyikelani mimiri ya n’wina yi va xitlhavelo lexi hanyaka, xo kwetsima.’ (Rhom. 12:1) Ku tikambela nkarhi na nkarhi ku ta ku pfuna leswaku u vona loko u kombisa moya wolowo hi ku helela hilaha swiyimo swa wena swi ku pfumelelaka hakona.

² Eku Lavisiseni Ka Vutivi Bya Bibele: Xana u ni nkarhi lowu u wu vekeleke tlhelo wa dyondzo ya wena ya Bibele naswona u dyondza nkarhi ni nkarhi? Xana wa xi namarhela xiyimiso xexo? Xana i mukhuva wa wena ku lunghiselela kahle minhlangano ya vandlha nkarhi ni nkarhi? Loko u ri nhloko ya ndyangu, xana u ni dyondzo ya Bibele ya nkarhi ni nkarhi ni ndyangu wa wena? Ku endla swilo leswi swi nga lava leswaku u titsona nkarhi wo karhi wa ku hlalela thelevhixini kumbe lowu u wu tirhiselaka khompyutara kumbe nkarhi wo endla swilo swo karhi. Hambiswiritano, sweswo a swi nyawuli loko u anakanya leswaku nkarhi lowu u wu hetaka u hlaya Rito ra Xikwembu, wu ta pfuna wena ku kuma vutomi lebyi nga heriki!—Yoh. 17:3.

³ Eku Leteleni Ka Vana Va Wena: Nkarhi lowunene wa ku hlakulela moya wa ku tinyiketela eka vana hi le vutsongwanini bya vona. Dyondzisa vana va wena leswaku hambiloko ku ri ni nkarhi wa ku tlanga, ku fanele ku va ni nkarhi wo tirha ntirho wa le kaya ni wa mintirho ya swa le tilweni. (Efe. 6:4) Va nyike ntirho wo karhi lowu faneleke leswaku va wu endla ekaya. Tiendlele xiyimiso xa nkarhi ni nkarhi leswaku u famba na vona ensin’wini nkarhi ni nkarhi. Tiyisa ndzetelo wa wena hi xikombiso xa wena lexinene.

⁴ Emintirhweni Ya Vandlha: Vandlha ra vuyeriwa loko un’wana ni un’wana a tinyiketela ku endla swilo hi ku swi rhandza leswaku ku vuyeriwa vanhu hinkwavo. (Hev. 13:16) Xana u nga swi kota ku heta nkarhi wo tala entirhweni wo chumayela hi Mfumo ni wo endla vadyondzisiwa? Xana u nga pfuna vavabyi kumbe lava dyuhaleke, hi ku tirhandzela, kumbexana u va pfuna hi ku va khandziyisa u ya na vona eminhlanganweni?

⁵ Emahlweni ko endla xitlhavelo xa yena xo hetelela hi vutomi byakwe tanihi munhu wa nyama, Yesu u tsundzuxe vadyondzisiwa va yena ku rhangisa swilaveko swa Mfumo, swilo leswin’wana swa vutomi a swi fanele swi ta endzhaku. (Mat. 6:33) Ku landzela moya wo tano wa ku tinyiketela swi ta hi tisela ntsako lowukulu loko hi ri karhi hi ya emahlweni hi tirhela Yehovha hi ntsako.