“Swilo Hinkwaswo A Swi Endleriwe Ku Aka”
1 Loko hi tirhisana ni vamakwerhu, hi fanele ku endla swilo hi ndlela leyi nga ta va aka. Leswi swi vula ku khumbeka hi ku hlayiseka ka swilaveko swa vona swa moya. Loko hi endla ntirho wo karhi wa ku tihanyisa lowu katsaka ku xavisa nchumu wo karhi kumbe ku endla swo karhi, hi fanele ku xiya leswaku hinkwaswo leswi hi swi endlaka a swi nge va khunguvanyisi vamakwerhu.—2 Kor. 6:3; Filp. 1:9, 10.
2 Van’wana va katseke etimhakeni to hambana-hambana ta mabindzu, va teka Vakreste-kulobye tanihi vaxavi va leswi va swi xavisaka. Tikhampani tin’wana leti xavisaka swilo ti khutaza vayimeri va tona ku teka munhu un’wana ni un’wana a ri muxavi—ku katsa ni vagandzeri-kulobye. Vamakwerhu van’wana va endle malunghiselelo ya ku hlanganisa Timbhoni to tala, hi xikongomelo xa ku ti khutaza ku katseka ebindzwini ro karhi. Van’wana va yisa bindzu ra vona emahlweni hi ku nyika vapfumeri-kulobye swilo leswi va nga swi laviki, tibroxara, ku rhumela rungula hi Internet kumbe tikhasete. Xana swi ta va swi lulamile ku va Mukreste a tirhisa malunghiselelo ya swa le tilweni leswaku a dyelela vamakwavo va moya? Doo!—1 Kor. 10:23, 24, 31-33.
3 Vamakwerhu Va Fanele Va Tivonela: Leswi a swi vuli swona leswaku Mukreste a nge ngheneli bindzu ni makwerhu. Yoleyo i mhaka ya munhu hi xiyexe. Kambe, van’wana va sungula mabindzu lama khutazaka ku va ni makwanga kutani va susumeta vapfumeri-kulobye ku tirhisana na vona kumbe ku vekisa eka vona. Vunyingi bya mabindzu lawa ma wa, ma koxa mali yo tala eka lava hlanganyeleke eka wona. Hambileswi swi nga endlekaka leswaku lava va hlanganyeleke eka mabindzu lawa va susumetiwe hi ku lava ku vuyeriwa hi mali yo tala hi xihatla, musunguri wa bindzu leri a nga tshuki a tibyela leswaku a nga na nandzu loko bindzu rero ri wa. U fanele a anakanya hi vukheta ka ha ri emahlweni hi ndlela leyi ku hlayiseka hi tlhelo ra moya ni ra nyama ka vamakwavo ku nga ta khumbeka ha yona loko bindzu rero ri nga humeleli. Ngopfu-ngopfu lava va nga ni vutihlamuleri bya swa le tilweni va fanele ku va ni vuxiyaxiya hi matshalatshala ya vona ya swa mabindzu, hikuva van’wana va nga ha va languta tanihi lava xiximekaka naswona va va tshemba hi mbilu hinkwayo. Swi ta va swi hoxile ku dlaya ntshembo wolowo. Malunghelo ya ntirho wo kwetsima ma nga tekiwa loko makwerhu o sungula ku va la nga xiximekiki eka van’wana.
4 Pakani ya hina yi fanele yi va leswaku “swilo hinkwaswo [swi endleriwa] ku aka.” (1 Kor. 14:26) Hi fanele ku papalata xin’wana ni xin’wana lexi nga ta sungula mintirho ya bindzu endzeni ka vandlha kumbe ku yi kondletela. Swilo swo tano, a swi fambisani nikatsongo ni swivangelo swa Matsalwa swa ku hlengeletana ka hina.—Hev. 10:24, 25.