“Rito Leri Vuriweke Hi Nkarhi Wa Kona”
1 Xana i ntlhontlho eka wena ku bula ni van’wana hi rungula leri nyikaka vutomi? Xana u titwa u boheka ku vula marito yo karhi lama rharhanganeke leswaku u ta koka nyingiso wa vayingiseri va wena? Loko Yesu a rhumela vadyondzisiwa vakwe, u te eka vona: “Loko mi ri karhi mi famba, chumayelani, mi ku, ‘Mfumo wa matilo wu tshinele.’” (Mat. 10:7) Rungula leri a ri nga rharhangananga naswona a swi olova ku ri vula. Swi tano ninamuntlha.
2 Hakanyingi wa swi kota ku sungula bulo hi marito ma nga ri mangani. Loko Filipi a hlangana ni mutsheniwa wa Muetiyopiya, u n’wi vutise a ku: “Xana kahle-kahle wa swi tiva leswi u swi hlayaka?” (Mint. 8:30) Bulo rero ri ve ni vuyelo lebyinene hikwalaho ka “rito leri vuriweke hi nkarhi wa kona”!—Swiv. 25:11.
3 Na wena u nga tirhisa ndlela leyi fanaka evutirhelini bya wena. Njhani? Hi ku va ni vuxiyaxiya ni ku hlawula marito lama fanelaka swiyimo. Vutisa xivutiso, kutani u yimela nhlamulo.
4 Swin’wana Swa Swivutiso Swa Xisekelo: Leswaku u sungula bulo, u nga ha ringeta xin’wana xa swivutiso leswi:
◼ “Xana wa xi tirhisa Xikhongelo xa Hosi (kumbe, lexi nge Tata wa Hina) evugandzerini bya wena?” (Mat. 6:9, 10) Vula marito ma nga ri mangani ya xona kutani u ku: “Vanhu van’wana va vutisa, ‘Hi rihi vito ra Xikwembu leri Yesu a vuleke leswaku ri fanele ku kwetsimisiwa?’ Van’wanyana va nga ha ku, ‘Hi wihi Mfumo lowu Yesu a vuleke leswaku hi fanele ku wu khongelela?’ Xana se u ti kumile tinhlamulo leti enerisaka eka swivutiso leswi?”
◼ “Xana u tshama u tivutisa: ‘Hi xihi xikongomelo xa vutomi?’” Kombisa leswaku xikongomelo xa vutomi xa fambisana ni ku tiva Xikwembu.—Ekl. 12:13; Yoh. 17:3.
◼ “Xana u ehleketa leswaku rifu ri ta kala ri herisiwa?” Nyikela nhlamulo leyi tshembekaka hi ku tirhisa Esaya 25:8 na Nhlavutelo 21:4.
◼ “Xana wu kona ntlhantlho wo olova wa mpfilumpfilu lowu nga kona emisaveni?” Kombisa leswaku Xikwembu xi dyondzisa ku “rhandza warikwenu.”—Mat. 22:39.
◼ “Xana misava ya hina yi ta hetelela yi lovisiwe hi mhangu leyikulu?” N’wi byele xitshembiso xa Bibele xa leswaku misava yi ta tshama hi masiku.—Ps. 104:5.
5 Vula mahungu lamanene hi ndlela yo olova, leyi kongomeke ni ya musa. Yehovha u ta katekisa matshalatshala ya wena ya ku avelana “rito” ra ntiyiso ni van’wana.