Vhidiyo Leyi Nga Ta Ku Voningela Ni Ku Ku Khutaza!
A ku ri April 1951. Etikweni leri khale a ri vuriwa Soviet Union ku hlengeletiwe Timbhoni ta Yehovha ta magidi—mindyangu leyi heleleke—ti fumbiwa eswitimeleni swo rhwala nhundzu, ti yisiwa eSiberia. Ha yini mfumo wa Soviet a wu tiyimisele ku heta hi tona? Xana vamakwerhu va ponise ku yini, hambi ku ri ku tswala mihandzu hi makume ya malembe lama heleke va ri karhi va xanisiwa? U ta kuma tinhlamulo eka vhidiyo leyi nge Faithful Under Trials—Jehovah’s Witnesses in the Soviet Union. Yi hlalele, u pfumelela rungula ra yona leri voningelaka ri ku khutaza leswaku u tshama u tshembekile eka Yehovha, ku nga khathariseki leswaku ku endleka yini!
Xana u nga swi hlamula swivutiso leswi? (1) Timbhoni ta Yehovha ti sungule rini ku tsarisiwa ximfumo eRhaxiya? (2) Swi tise ku yini leswaku eSoviet Union ku va ni mindyangu yo tala ya Timbhoni emahlweni ni le ndzhaku ka Nyimpi ya Vumbirhi ya Misava? (3) Vupfumeri bya tona a byi kanetana njhani na filosofi ya Lenin? (4) Operation North a ku ri yini, naswona Stalin a a ri ni ntshembo wa leswaku yi ta n’wi pfuna ku hetisisa yini? (5) Ku yisiwa evuchavela-hwahwa a swi vula yini eka Timbhoni, naswona ti byeriwe leswaku ti endla yini loko ti nga lavi ku yisiwa kona? (6) Eka riendzo ro leha ro ya eSiberia hi xitimela, vamakwerhu va khutazane njhani, leswi nga hlamarisa lava va va khomeke? (7) I maxangu wahi lawa Timbhoni ti ma tiyiseleke le Siberia? (8) Hi wahi malunghiselelo ya moya lawa vanhu va Yehovha va ma tlangeleke swinene, naswona ha yini? (9) Ha yini vamakwerhu a va nga ri na mhaka ni ku nghenisa vutomi bya vona ekhombyeni leswaku va kuma minkandziyiso, naswona va hlurise ku yini loko valawuri va ya ehenhla ni le hansi va ringeta ku va sivela ku yi kuma? (10) Khrushchev u hambetise ku yini a hlasela vanhu va Xikwembu? (11) Valawuri va ringetise ku yini ku herisa ripfumelo ra vana va Timbhoni? (12) Vamakwerhu va kume xi ri xihi xivangelo xa ku xanisiwa ka vona? (Buku Ya Lembe Ya 2002, matluka 203-4) (13) Hi byihi vuyelo lebyi vaxanisi va nhlengeletano ya Xikwembu a va nga byi langutelanga loko va yi hlasela hi matimba? (Buku Ya Lembe Ya 2002, matluka 220-1) (14) Hi swihi swilo leswi endlekeke leswi Timbhoni a ti nga ehleketi leswaku swi nga endleka etikweni leri khale a ri vuriwa Soviet Union? (15) I yini leswi pfuneke vamakwerhu leswaku va tiyisela miringo ya vona, naswona xivono xo hetelela xa vhidiyo xi ku kombisa njhani ku hetiseka ka Yeremiya 1:19? (16) Hlamusela wun’wana wa mintokoto ya xiviri ya ku tshembeka ehansi ka nxaniso, leyi yi ku khumbaka ngopfu.