Xikolo Lexi Hi Pfunaka Leswaku Hi Tirhisa Leswi Hi Swi Dyondzeke
1 Loko hi ri karhi hi tirhisa rungula leri xaxametiweke eka Xiyimiso Xa Xikolo Xa Vutirheli Bya Le Tilweni Xa 2006, hi fanele hi tikarhatela ku vuyeriwa eka tidyondzo ta le Matsalweni hi ku va hi ti tirhisa entirhweni wa hina wo kwetsima ni le vuton’wini bya hina bya siku ni siku. Hi tiyimisele ku tirhisa leswi hi swi dyondzaka.—Yoh. 13:17; Filp. 4:9.
2 Ku Hlamusela Leswi Hi Swi Dyondzeke: Xiyimiso xa lembe leri xi nyika vayingiseri timinete leti engetelekeke to hlanganyela eka tinhla-nkulu ta ku hlaya ka Bibele. Leswi swi vula leswaku makwerhu la averiweke ku nyikela tinhla-nkulu u fanele a heta tinhla takwe hi ntlhanu wa timinete ematshan’weni ya tsevu. Vayingiseri na vona va fanele va xiya nkarhi loko va hlamusela leswi va swi dyondzeke. Loko loyi a hlamulaka a rhange hi ku anakanyisisa kahle a nga vula rungula leri pfunaka hi tisekoni leti nga tluliki 30. Vanhu va kwalomu ka khume va fanele va kota ku hlamusela tinhla leti akaka leti va ti dyondzeke, hi ntlhanu wa timinete leti vekeriweke leswaku vayingiseri va hlanganyela ha tona.
3 Tinkulumo Leti Dyondzisaka: Tinhla-nkulu ta ku hlaya ka Bibele ni nkulumo yo laya swi fanele swi va ni ntikelo tanihi leswi swi tirhaka ensin’wini ya hina ni le ka xin’wana ni xin’wana lexi hi xi endlaka evuton’wini bya hina. Xivulavuri a xi fanelanga xi endla ntsena leswaku vayingiseri va navela ku teka goza. Xi fanele xi kombisa leswaku hi rihi goza leri faneleke ri tekiwa, xi kombisa ni ndlela leyi ri nga tekiwaka ha yona xi tlhela xi kombisa vuyelo byo teka goza ro tano. Xi nga ha ku, “Leyi i ndlela leyi tindzimana ti hi nyikaka nkongomiso ha yona,” kumbe xi ku, “Leyi i ndlela leyi hi nga ti tirhisaka ha yona tindzimana leti ensin’wini.” Vakulu ni malandza ya vutirheli lava xalamukelaka swiyimo swa ndhawu leyi va tshamaka eka yona va fanele va tikarhatela ku tirhisa leswi va swi dyondzeke hilaha va nga kotaka hakona.
4 Ku tshaha swikombiso swa le Bibeleni swi nga va swa nkoka swinene loko hi lava ku kombisa ndlela leyi hi nga swi tirhisaka ha yona leswi hi swi dyondzeke. Endzhaku ko vulavula hi xikombiso xa Matsalwa, xivulavuri xi nga ha ku, “Kumbexana na wena u nga ha tikuma u ri eka xiyimo lexi fanaka ni lexi.” Xi fanele xi tiyiseka leswaku ndlela leyi xi hlamuselaka xikombiso xin’wana ni xin’wana xa Matsalwa ha yona yi fambisana ni mhaka leyi ku buriwaka ha yona etsalweni rero, swin’we ni leswi kandziyisiweke hi “hlonga ro tshembeka ni ro tlhariha.”—Mat. 24:45.
5 Vutlhari i vuswikoti byo tirhisa vutivi ni ku twisisa hi ndlela leyi humelelaka. “Vutlhari i nchumu wa risima.” (Swiv. 4:7) Loko hi hambeta hi kuma vutlhari lebyi twisisekaka eka tidyondzo ta hina ta Xikolo xa Vutirheli bya le Tilweni, onge hi nga tlhela hi antswisa vuswikoti bya hina bya ndlela leyi hi ti byelaka van’wana ha yona.