Nongonoko Lowuntshwa Wa Nhlengeletano Ya Xifundzha

Misava yi lava hi tshemba leswaku mafambiselo lawa ya sweswi ya swilo ma ta tshama hilaha ku nga heriki. Hambiswiritano, Rito ra Xikwembu ri hi byela leswi hambaneke ni sweswo. (1 Yoh. 2:15-17) Ri hi pfuna ku twisisa leswaku “ku tihlayisela xuma emisaveni” i ku hlongorisa swilo swa hava. Leswaku vanhu va Xikwembu va tiyisiwa, nongonoko wa nhlengeletano ya xifundzha ya lembe ra ntirho ra 2007 yi ta vulavula hi nhloko-mhaka leyi nge ‘Hlayisa Xuma eTilweni.’—Mat. 6:19, 20.

Ku hlongorisa rifuwo swi katsa leswi ku vulavuriwaka ha swona eka Vaefesa 2:2 tanihi “vulawuri bya moya, moya lowu sweswi wu tirhaka eka vana lava nga yingisiki.” Tanihi leswi moya lowu hi wu hefemulaka wu kumekaka kun’wana ni kun’wana, “moya wa misava” na wona wu tele emisaveni leyi. (1 Kor. 2:12) Leswi wu nga ni nkucetelo wa matimba, ku vuriwa leswaku wu ni “vulawuri.” Nongonoko lowuntshwa wa nhlengeletano ya xifundzha wu ta hi pfuna ku papalata ku hlongorisa rifuwo kutani hi anakanya kahle hi leswi nga swa nkoka swinene. (Mat. 6:33) Ku engetela kwalaho, nongonoko lowu wu ta hi pfuna leswaku hi titshega hi Yehovha loko hi ri karhi hi endla ntirho wa hina wo chumayela, ku nga khathariseki mintshikilelo ni miringo leyi hi nga langutanaka na yona.

Tiyiseka leswaku u va kona masiku lawa hamambirhi ni leswaku u “nyikela nyingiso lowukulu ku tlula lowu tolovelekeke.” (Hev. 2:1) Tsala tinhla to koma leti u nga ta ti tirhisa evuton’wini bya wena ni le nsin’wini ya ka n’wina. Hi ta tiyisiwa ni ku khutaziwa leswaku hi hambeta hi ‘hlayisa xuma etilweni’ loko hi va kona masiku lawa hamambirhi ya nongonoko lowu fuwisaka wa swilo swa moya!