MAHANYELO YA VAKRESTE
Seketela Milawu Ya Yehovha Ya Mahanyelo
Yehovha Xikwembu hi yena a vekeleke vanhu milawu ya mahanyelo. Hi xikombiso, u vula leswaku vukati i xiboho xa hilaha ku nga heriki eka wanuna ni wansati. (Mt 19:4-6, 9) U venga mixaka hinkwayo ya ku tikhoma loko biha ka timhaka ta masangu. (1Ko 6:9, 10) U tlhele a hi nyika milawu malunghana ni ndlela leyi hi faneleke hi ambala ni ku tisasekisa ha yona, leyi endlaka leswaku vanhu vakwe va va lava hambaneke.—Dt 22:5; 1Tm 2:9, 10.
Eka misava ya namuntlha, vanhu vo tala a va yi rhandzi milawu ya Yehovha. (Rhm 1:18-32) Va pfumelela leswi vanhu va swi vulaka leswaku swi kucetela maambalelo, ku tisasekisa ni mahanyelo ya vona. Vo tala va tibuma hi swidyoho swa vona leswikulu kutani va xopaxopa lava hanyaka hi milawu leyi hambaneke ni ya vona.—1Pe 4:3, 4.
Tanihi Timbhoni ta Yehovha, hi fanele hi seketela milawu yakwe ya mahanyelo. (Rhm 12:9) Njhani? Hi vutlhari hi fanele hi tivisa vanhu leswi a swi amukelaka. Kambe hi fanele hi hanya hi milawu leyi tlakuke evuton’wini bya hina. Hi xikombiso, loko hi hlawula swiambalo ni ku tisasekisa hi nga tivutisa: ‘Xana leswi ndzi swi hlawulaka swi kombisa leswaku ndzi kongomisiwa hi milawu ya Yehovha kumbe ya misava? Xana ndlela leyi ndzi ambalaka ni ku tisasekisa ha yona ya swi kombisa leswaku ndzi Mukreste loyi a chavaka Xikwembu?’ Kumbe loko hi hlawula nongonoko kumbe filimi leyi hi faneleke hi yi hlalela, hi nga ha tivutisa: ‘Xana Yehovha wa wu tsakela nongonoko lowu? Xana i milawu yihi ya mahanyelo leyi nongonoko lowu wu nga na yona? Xana ndlela leyi ndzi hlawulaka vuhungasi yi nga tsanisa mahanyelo ya mina? (Ps 101:3) Xana yi nga khunguvanyisa swirho swa ndyangu kumbe van’wana?’—1Ko 10:31-33.
Ha yini swi ri swa nkoka leswaku hi seketela milawu ya Yehovha ya mahanyelo? Ku nga ri khale Kreste Yesu u ta herisa matiko ni vuhomboloki hinkwabyo. (Ezk 9:4-7) Ku ta sala ntsena lava endlaka ku rhandza ka Xikwembu. (1Yh 2:15-17) Kutani, a hi seketeleni milawu ya Yehovha ya mahanyelo, leswaku lava vonaka ndlela leyinene leyi hi tikhomaka ha yona va ta dzunisa Xikwembu.—1Pe 2:11, 12.
Xana ndlela leyi ndzi ambalaka ni ku tisasekisa ha yona yi paluxa yini hi mahanyelo ya mina?
HLALELA VHIDIYO LEYI NGE, VANA MUNGHANA WA YEHOVHA—WANUNA UN’WE, WANSATI UN’WE, KUTANI U HLAMULA SWIVUTISO LESWI LANDZELAKA:
Ha yini ku ri vutlhari ku hanya hi milawu ya Yehovha?
Ha yini vatswari va fanele va sungula ku dyondzisa vana vona va ha ri vatsongo milawu ya Yehovha ya mahanyelo?
Vantshwa ni vanhu lavakulu va nga va pfuna njhani vanhu leswaku va vuyeriwa hi vunene bya Xikwembu?