I Yini Leswi Ndzi Faneleke Ndzi Swi Tiva Hi Mintlango Ya Elektroniki?

Swivutiso swa ntlango wa elektroniki

Mintlango ya elektroniki le United States, i bindzu lerikulu swinene. . .

1. Hi xiringaniso, i vanhu va malembe mangani lava tlangaka mintlango ya elektroniki?

   1. 18

   2. 30

2. I vanhu va rimbewu rihi lava tshikaka ku tlanga mintlango ya elektroniki?

   1. Va xinuna va 55 wa tiphesente; Va xisati va 45 wa tiphesente

   2. Va xinuna va 15 wa tiphesente; Va xisati va 85 wa tiphesente

3. Eka mintlawa leyimbirhi, hi wihi lowu tlangaka ngopfu?

   1. Va xisati lava nga ni malembe ya 18 kumbe ku tlula

   2. Va xinuna lava nga ni malembe ya 17 kumbe ya le hansi

Tinhlayo leti ti nga ha ku nyika xivono xa leswaku i vamani lava tlangaka. Kambe a ti ku byeli vuyelo bya kona—lebyinene kumbe lebyi nga riki byinene—lebyi mintlango ya elektroniki yi nga vaka na byona eka wena.

I yinene

Hi wahi eka marito lama landzelaka malunghana ni mintlango ya elektroniki lawa u pfumelelanaka na wona?

• “I ndlela yo tsakisa yo aka vuxaka ni swirho swa ndyangu ni vanghana.”—Irene.

• “Yi kahle hikuva yi ku endla u nga anakanyisisi hi swilo swa xiviri.”—Annette.

• “Yi ku endla u antswisa ndlela leyi u anakanyaka ha yona.”—Christopher.

• “Yi ku endla u va ni vutshila byo ntlhantlha swiphiqo.”—Amy.

• “Yi endla leswaku byongo bya wena byi tirha kahle; yi ku endla u anakanya ni ku hlela.”—Anthony.

• “Mintlango yin’wana yi khutaza ku tirha swin’we tanihi ntlawa ni vanghana.”—Thomas.

• “Mintlango yin’wana yi ku pfuna leswaku u endla vutiolori ni leswaku u tshama u ri ni rihanyo lerinene.”—Jael.

Xana u pfumelelana na wona marito lawa—kumbexana hinkwawo ka wona? Mintlango ya vhidiyo yi nga ha ku vuyerisa enyameni ni le mianakanyweni. Hambiloko mintlango yin’wana ku ri ya ku fambisa nkarhi naswona yi ri hilaha Annette a yi hlamuselaka hakona—“yi ku endla u nga anakanyisisi hi swilo swa xiviri” naswona sweswo a swi hoxanga minkarhi yin’wana.

● Bibele yi vula leswaku ku ni “nkarhi wa mhaka yin’wana ni yin’wana ehansi ka matilo,” ku katsa ni vuhungasi.—Eklesiasta 3:1-4.

Yi bihile

Xana mintlango ya elektroniki yi ku dyela nkarhi?

“Loko ndzo kala ndzi sungula ku yi tlanga, swa ndzi tikela ku yi tshika. Ndzi hambeta ndzi tibyela leswaku, ‘ndzi ta tlanga kan’we ntsena!’ Kambe swi nga si ya kwihi, ndzi kuma ku hundze tiawara to hlaya naswona ndzi hete nkarhi wo tala ndzi hlalele xikirini!”—Annette.

“Mintlango ya vhidiyo yi nga ku dyela nkarhi wo tala swinene. U tshama kwalaho kutani u titwa onge u hetisise swo karhi hileswi u hluleke eka mintlango ya ntlhanu, kambe entiyisweni a wu hetisisanga nchumu nikatsongo.”—Serena.

Leswi u faneleke u swi tsundzuka: Loko u lahlekeriwa hi mali u nga ha swi kota ku tlhela u yi kuma. Kambe sweswo swi hambanile ni ku lahlekeriwa hi nkarhi. Hi marito man’wana, nkarhi i wa nkoka ku tlula mali. Kutani u nga pfumeli ku lahlekeriwa hi nkarhi!

● Bibele yi ri: “Hambetani mi famba hi vutlhari . . . , mi tixavela nkarhi lowunene.”—Vakolosa 4:5.

Xana mintlango ya elektroniki yi khumba ndlela leyi u anakanyaka ha yona?

“Swiendlo swa vugevenga leswi loko munhu a swi endlile swi endlaka leswaku a pfaleriwa kumbe ku dlayiwa hikwalaho ka swona swi ‘endliwa’ eka ntlango wa vhidiyo handle ko va munhu a anakanyisisa hi swona.”—Seth.

“Mintlango yo tala yi katsa ku hlula valala leswaku u fikelela pakani ya wena. Leswi hakanyingi swi lavaka leswaku u va dlaya hi ndlela ya tihanyi swinene.”​—Annette.

“Minkarhi yin’wana u nge swi kholwi leswi u swi vulaka eka vanghana va wena loko u ri karhi u tlanga—u nga ha vula marito yo fana ni lawa ‘Fana!’ kumbe ‘Ndzi ta ku dlaya!’ ”—Nathan.

Leswi u faneleke u swi tsundzuka: Papalata mintlango leyi hlohlotelaka swilo leswi Xikwembu xi swi vengaka, ku katsa madzolonga, ku tikhoma loko biha hi tlhelo ra rimbewu ni vungoma.—Vagalatiya 5:19-21; Vaefesa 5:10; 1 Yohane 2:15, 16.

● Bibele yi vula leswaku Yehovha u “venga un’wana ni un’wana la rhandzaka madzolonga”—ku nga ri ku endla madzolonga ntsena. (Pisalema 11:5) Hambileswi ku hlawula ka wena mintlango ya elektroniki ku nga vuliki swo tala hi muxaka wa munhu loyi u nga ta va yena, ku nga ha kombisa muxaka wa munhu loyi se u nga yena.

Leswi u nga anakanyisisaka ha swona: Hi ku ya hi buku leyi nge, Getting to Calm, “mintlango ya vhidiyo leyi nga ni madzolonga hakanyingi yi ma khumba swinene mahanyelo ya munhu ku tlula thelevhixini, hikuva vana a vo languta ntsena nhenha leyi nga ni tihanyi leyi dlayaka—vona hi voxe i nhenha yoleyo. Hikuva mintlango yi ku dyondzisa ku fana ni loko mudyondzisi a ku dyondzisa etlilasini, yi ku dyondzisa ku va ni madzolonga.”—Ringanisa Esaya 2:4.

Mhaka ya xiviri

Vantshwa vo tala va dyondze ku ringanisela eka ndlela leyi va tlangaka mintlango ya elektroniki. Xiya swikombiso swimbirhi.

“A ndzi hamba ndzi tlanga mintlango ya vhidiyo kukondza ku va vusiku swinene, ndzi tibyela leswi: ‘Ndzi ta etlela tiawara ta ntlhanu ntsena. Ndzi ta tlanga ro hetelela.’ Kambe, sweswi ndzi dyondze leswaku mintlango ya vhidiyo yi ni nkarhi wa yona. Ndzi teka ku yi tlanga tanihi ndlela leyinene leyi ndzi nga tihungasaka ha yona nkarhi na nkarhi. Kambe swilo hinkwaswo swi fanele swi ringaniseriwa.”—Joseph.

“Ndzi tshike ku tlanga, leswi endleke leswaku ndzi va ni nkarhi wo tala wo endla swilo swa nkoka! Ndzi swi kotile ku antswisa vutirheli bya mina, ndzi pfuna van’wana evandlheni leri ndzi hlanganyelaka eka rona naswona ndzi dyondze ku tlanga xichayachayana. Ku ni swo tala leswi u nga swi endlaka handle ko tlanga mintlango ya elektroniki ntsena!”—David.

● Bibele yi vula leswaku vavanuna ni vavasati lava wupfeke “va ringanisela emikhuveni.” (1 Timotiya 3:2, 11) Va tsakela ku tihungasa kambe va ringanisela naswona va ti dyondzise ku tilawula.—Vaefesa 5:10.

Leswi u faneleke u swi tsundzuka: Ku tlanga mintlango ya elektroniki swi nga va vuhungasi lebyinene loko swi ringaniseriwa. Kambe u nga yi pfumeleli leswaku yi lawula nkarhi wa wena kumbe yi ku endla u nga vi na mhaka ni swilo swa nkoka evuton’wini. Ematshan’weni yo dzika ngopfu eka ku ringeta ku fikelela pakani yo karhi eka ntlango, xana a swi ta va swi nga antswi ku engetela matshalatshala yo tala leswaku u fikelela tipakani ta wena evuton’wini bya xiviri leswaku u va muhluri?