Fambisa Tibroxara Leswaku U Avelana Ni Van’wana Ntshembo Wa Wena Wa Mfumo
1 Loko hi ri karhi hi nyikela vumbhoni bya ku hetiseka ka vuprofeta bya Bibele, ha tsaka eka ntshembo wa hina wa Mfumo naswona hi susumeteleka ku vulavula ha wona eka un’wana ni un’wana la nga ta yingisela. (Luka 6:45; Varhoma 12:12) Ku fambisa ka hina tibroxara evutirhelini hi July i ndlela yin’wana leyi hi nga avelanaka ntshembo wa hina wa Mfumo ni van’wana, hi laha Yesu a hi leriseke ha kona.—Mat. 24:14.
2 Leswi hi nga ni tibroxara to tala ta mivala-vala ni leti dyondzisaka, leti hi nga hlawulaka eka tona, hi tihi exikarhi ka tona leti nga ha swi fikelelaka kahle swilaveko swa lava nga ensin’wini ya hina ni ku pfuxa ku tsakela ka vona? Leswaku hi ta ti tirhisa kahle hi laha swi kotekaka ha kona tibroxara leti, hi fanele hi tiva leswi nga endzeni ka tona. Mpfuxeto lowu landzelaka wo koma wu ta hi pfuna emhakeni leyi.
3 Hulumendhe Leyi Nga Ta Tisa Paradeyisi: Loko Yesu a ha ri emisaveni, Mfumo wa Xikwembu a wu ri nhloko-mhaka ya ku chumayela ka yena. Broxara leyi yi kombisa leswaku Mfumo lowu i hulumendhe ya xiviri ni ndlela leyi wu nga ta tlhantlha swiphiqo leswi endlaka vutomi byi tika ngopfu namuntlha.
4 Tsakela Vutomi eMisaveni Hi Masiku!: Yi hlamusela mhaka leyi ha yona Xikwembu xi endleke munhu ni ndlela leyi hi nga tsakelaka ha yona vutomi emisaveni hi masiku. Swifaniso leswi hlamuselaka ni ndzimana yo koma eka broxara leyi swi tsakisa vana ni lava nga swi kotiki kahle ku hlaya. Yi nga ha tlhela yi tirhiseriwa ku hundzisela tidyondzo ta Bibele ta xisekelo eka lava nga twiki kahle.
5 Vito Ra Xikwembu Leri Nga Ta Tshama Hi Masiku: Broxara leyi yi hlamusela vito ra Xikwembu hi tlhelo ra Matsalwa ni ra matimu, yi komba mhaka leyi swi nga swa nkoka ha yona eka Vakriste ku tiva vito leri ni ku ri tirhisa evugandzerini bya vona.
6 “Vonani, Ndzi Endla Swilo Hikwaswo Swi Va Leswintshwa”!: Broxara leyi yi hlamusela paradeyisi naswona yi aka ku tlangela Bibele ni Muvumbi wa hina. Endzhaku ko hlamusela xivangelo xa ku va Xikwembu xi pfumelela vubihi, yi vulavula hi tidyondzo tinharhu ta xisekelo ta Bibele: nkutsulo, ku pfuxiwa ka vafi ni Mfumo. Broxara leyi yi tlhela yi va ni swivutiso ehansi ka matluka, leswi endlaka leswaku swi hi olovela ku fambisa dyondzo ya Bibele ha yona.
7 Xana U Fanele Ku Pfumela Eka Vunharhu-un’we?: Vanhu va nga ha vula leswaku va pfumela eka Vunharhu-un’we, kambe matwisiselo ya vona ma hambana. Broxara leyi yi hlamula swivutiso swo tanihi leswi: Vunharhu-un’we i yini? Xana Bibele ya byi dyondzisa? Xana Yesu Kriste i Xikwembu xa Matimba Hinkwawo ni xiphemu xa Vunharhu-un’we? Moya lowo kwetsima i yini, naswona wu tirha hi ndlela yihi?
8 Loko se hi ti hlawurile tibroxara leti hi lavaka ku ti tirhisa evutirhelini bya yindlu ni yindlu kumbe loko hi nyikela vumbhoni hi xitshuketa, hi fanele hi pfuxeta swihloko leswi nga eka tluka ra le ndzhaku ka nkandziyiso lowu wa Vutirheli Bya Hina Bya Mfumo. Hi ta kuma swiringanyeto swa ku fambisa tibuku ni ku endla maendzo yo vuyela hi langutelo ro kurisa ku tsakela ni ku sungula dyondzo ya Bibele.
9 Minkarhi yo tala, ku nga khathariseki leswaku hi nyikela vumbhoni hi ndlela leyi hleriweke kumbe hi xitshuketa, broxara yo karhi hi yona leyi lavekaka leswaku hi nyikela vumbhoni lebyinene. Hambi swi ri tano, hi fanele hi lungheka, hi va ni tibroxara leti eneleke, hi tiva leswi ti swi khomeke ni ku va lava twisisaka. Onge mikateko ya Yehova evutirhelini bya hina byo hiseka yi nga endla vo tala va tsaka na hina eka ntshembo wa Mfumo!—Mintirho 13:47, 48.