Khathalela Vanhu Lava Tsakelaka
1 Ku tlula van’wana hinkwavo, Yehovha wa hanana hi ku khathalela vanhu. A nga hi nyikanga swilo swo tala, leswi vonakaka ntsena kambe u hi nyike ni swilo swa moya leswi hi swi lavaka ni ku swi tsakela. U hi rhandza ngopfu lerova u kamba ni timbilu ta hina.—Ps. 139:23.
2 Loko Yesu a ha ri la misaveni, u landze ntila wa Tata wakwe hi ku hetiseka eku khathaleleni ka vanhu van’wana. Xana wa n’wi tsundzuka munhu loyi a nga byela Yesu a ku: “Hosi, loko u swi rhandza, u nga ndzi basisa”? Yesu u hlamule a ku: “Ndza swi rhandza.” (Mt. 8:1-3) Loko Yesu a vona noni yi rila, u endle yini? U yimile a yi pfuna. (Lk. 7:11-15) Xana u nga xalamuka hi laha ku engetelekeke leswaku u pfuna lava tsakelaka?
3 Hi ku tekelela Tata wa hina, Yehovha ni N’wana wakwe, Kreste Yesu, na hina hi fanele hi tsakela van’wana. Hi endla leswi hi ku tsala rhekhodo leyi kongomeke ya yindlu na yindlu. Leswi swi katsa ni ku tsala vito ni adirese leyinene ya munhu la tsakelaka kun’we ni mhaka leyi mi nga bula ha yona eka riendzo ro sungula. Kutani, u nga si endla riendzo ro vuyela, lunghiselela kahle. Loko hi siye timagazini eka riendzo ro rhanga, kumbexana riendzo ra hina ro vuyela ri nga sekeriwa eka swin’wana leswi swi vuriweke eka swihloko swa kona. Vona leswaku leswi swi nga endliwa njhani.
4 Loko u siye Xihondzo xo Rindza xa October 1, 1992, naswona u vulavule hi xihloko lexi nge “Xana Vanhu Va N’wi Lava Mesiya Hakunene?,” u nga ha lunghiselela ku kandziyisa Nhlavutelo 21:4 na Yohane 17:3 eka riendzo ra wena ro vuyela.
Hi xikombiso, endzhaku ko hlaya Nhlavutelo 21:4, u nga ha vutisa u ku:
◼ “Hi nga swi kotisa ku yini ku va eka misava yoleyo? [Yimela nhlamulo.] Yingisela leswi Mesiya a vuleke leswaku hi swona leswi lavekaka leswaku hi kota ku hanya emisaveni yo fana ni leyi.” Kutani u hlaya Yohane 17:3, u kandziyisa leswaku vutomi lebyi nga heriki emisaveni ya ku rhula byi nga kumiwa hi ku tiva Xikwembu na Kreste. Loko ku ri ni ku tsakela ko karhi, ringeta ku sungula dyondzo hi xiphephana lexi nge Vutomi eMisaveni Leyintshwa Ya Ku Rhula.
5 U nga ha amukeriwa kahle loko u bula hi yinhla leyi u yi hlawuleke eka Awake! ya October 8, 1992 eka xihloko lexi nge “You Can Overcome Negative Emotions.” Loko u endla riendzo ro vuyela, u nga ha seketela bulo ra wena eka Vafilipiya 4:6, 7.
U nga ha vutisa u ku:
◼ “Xana u vona onge hi wihi nchumu wa ku hlula mintlhaveko leyi nga riki yinene?” Yingisela nhlamulo ivi u ku: “Lexi tsakisaka, Bibele yi xaxameta milawu leyi loko yi tirhisiwa yi tisaka ku rhula ka mianakanyo ni mbilu. [N’wi kombe tinhla leti faneleke ta Vafilipiya 4:6, 7.] Bibele yi vulavula hi nkarhi lowu hinkwerhu hi nga ta hanya hi milawu ya Bibele naswona a ku nge he vi na swiyimo leswi vangaka mintlhaveko leyi nga riki yinene.” Kutani kombisa mikateko yin’wana ya nkarhi lowu taka hi ku kamba xiphephana lexi nge Vutomi eMisaveni Leyintshwa Ya Ku Rhula ivi u nghena edyondzweni.
6 Ku vuriwa yini loko n’wini wa muti se a kume tin’wana ta tibuku ta hina? Hikwalaho ka yini u nga tirhisi yona leswaku u sungula dyondzo? Loko ku ri buku leyi nge Hanya Hi Masiku, pfula tluka leri kombisaka leswi nga endzeni kutani u kombela n’wini wa muti leswaku a hlawula nhloko-mhaka leyi a rhandzaka ku bula ha yona. Kutani u nga ha sungula dyondzo hi ku hlaya ndzimana yin’we kumbe timbirhi.
7 Ku khathalela vanhu lava tsakelaka hi ku lunghiselela kahle ni ku endla maendzo yo vuyela lama humelelaka swi komba leswaku hi tekelela Xikwembu na Kreste, naswona hi lava leswaku ku ponisiwa vo tala hi laha swi kotekaka ha kona.—2 Pet. 3:9.