Ku Wisa Ku Tirha—Xana I Nyangwa Lowu Pfulekeleke Ntirho Wa Le Tilweni?
KU WISA KU TIRHA—eka vo tala ku pfala nyangwa wa ntshikilelo ni maxangu ya nkarhi wo leha. Endzhaku ka ku pfaleriwa hi tirhelo leri phirhwaka kumbe leri karharisaka miehleketo, vo tala va langutele ku wisa ku tirha leswaku va pfulekeriwa hi nyangwa wa malembe yo tiphina kun’we ni ntshunxeko wa munhu hi xiyexe. Hambiswiritano, hakanyingi nyangwa wolowo wu yisa eku phirhwekeni ni gome. Mintlangu ni ku tihungasa a swi endli leswaku munhu a tixixima tanihi laha ntirho wu endlaka hakona.
Eka Timbhoni ta Yehovha, ku wisa ku tirha ku nga pfula “nyangwa ya ntirho lowo saseka.” (1 Vakorinto 16:9) Hambileswi ku dyuhala ku vangaka swiphiqo ni swipimelo, vadyuhari van’wana va xiye leswaku hi mpfuno wa Yehovha va nga swi kota ku andzisa ntirho wa vona eka yena. Anakanya hi mintokoto ya Vakreste van’wana lava dyuhaleke le Netherlands. Hi lembe ra ntirho ra 1995, 269 eka maphayona lama tlulaka 1 223 (vahuweleri va Mfumo va nkarhi hinkwawo) a va ri ni malembe ya 50 hi vukhale kumbe ku tlula. Eka lava, 81 a va ri ni malembe ya 65 kumbe ku tlula.
Van’wana va kota ku phayona ntsena hi leswi va hambetaka ni endlelo ra ku tshama va khomekile leri va ri sunguleke loko va ha tirha. (Ringanisa Vafilipiya 3:16.) Mukreste un’wana la wiseke ku tirha loyi a vitaniwaka Karel wa ha tsundzuka: “Loko ndza ha tirha ntirho wo tihanyisa, a ndzi hamba ndzi sungula ntirho hi 7:30 nimixo. Loko ndzi sungule ku kuma mudende wa mina, ndzi anakanye ku hambeta ni tirhelo leri fanaka. A ndzi sungula siku hi ntirho wo nyikela vumbhoni exitarateni hi timagazini exitichini xa xitimela mixo wun’wana ni wun’wana hi awara ya nkombo.”
Nakambe ku kunguhata hi vukheta i xilotlelo lexi yisaka eku humeleleni. (Swivuriso 21:5) Hi xikombiso, van’wana va swi kotile ku veka mali leyi ringaneke leswaku va kota ku tihlayisa evutirhelini bya vona. Van’wana va hungute matirhiselo ya vona ya mali ivi va kuma ni ntirho wo tihanyisa wa nkarhinyana. Anakanya hi Theodore na Ann. Va nghenele vukati bya vona va ri maphayona ku fikela loko vutihlamuleri bya ndyangu byi lave leswaku va tshika vuphayona. Kambe moya wa vona wa vuphayona a wa ha ri kona! Loko vana va vona va vanhwanyana va ri karhi va kula, va hambete va va khutaza ku phayona. Xa nkoka ngopfu, Theodore na Ann va veke xikombiso lexinene, hakanyingi va tirha tanihi maphayona ya nkarhinyana. Loko vanhwanyana lava se va kurile, Theodore na Ann va sungule ku hunguta ntirho wa vona wo tihanyisa leswaku va ta va ni nkarhi lowu engetelekeke wa ntirho wa nsimu.
Endzhaku ka loko vanhwanyana va vona va nghenele vutirheli bya nkarhi hinkwawo ni loko va suke ekaya, Ann u sungule ku phayona. Siku rin’wana u khutaze Theodore ku tshika ntirho wa yena. Loko a ringanyeta u te: “Hi vumbirhi ka hina hi nga phayona.” Theodore u tivise muthori wa yena makungu ya yena. Lexi n’wi hlamariseke muthori wa yena u n’wi pfune hi ku n’wi nyika ntirho wa nkarhinyana, hi ku vula a ku: “Ndza tshemba leswaku u lava ku tirhela n’wini wa wena la nge henhla [etilweni] nkarhi hinkwawo.” Theodore na Ann sweswi va tiphina hi ku phayona swin’we.
Van’wana va sungule ku phayona hi ku pfumelelana ni swiyimo leswi va humeleleke evuton’wini bya vona. Rifu ro hlomula mbilu ra n’wana wa vona wa nhwanyana ni ntukulu wa vona wa nhwanyana ri endle leswaku mpatswa wun’wana lowu dyuhaleke wu anakanyisisa hi ndlela leyi a wu tirhisa malembe ya wona lama saleke. (Eklesiasta 7:2) Ematshan’weni yo hluriwa hi mbitsi, va nghenele ntirho wa nkarhi hinkwawo, lowu se va tiphineke ha wona ku tlula malembe ya nhungu!
Hakunene, swi lava ku tiyimisela hi xiviri leswaku u hambeta ni vutirheli bya nkarhi hinkwawo. Hi xikombiso, Ernst ni nsati wakwe, Riek, va sungule ku phayona endzhakunyana ka loko vana va vona va suke ekaya. Endzhakunyana ka kwalaho, khale ka munghana wa yena la nga n’wamabindzu u nyike Ernst ntirho lowu hakelaka swinene. Ernst u hlamule a ku: “Hi ni muthori wo hlawuleka ngopfu, naswona a hi swi lavi ku tshika ku n’wi tirhela!” Hikwalaho ka leswi Ernst ni nsati wa yena va hambeteke ni “ntirho” wa Yehovha, malunghelo man’wana ya ntirho ma va pfulekerile. Va tirhe entirhweni wa xifundzha ku tlula malembe ya 20 naswona va hambete va ri maphayona ku fikela namuntlha. Xana va tisola hikwalaho ka ndlela ya vona yo tirhela van’wana? Enkarhini wun’wana lowu hundzeke mpatswa lowu wu tsarile: “Loko Yehovha a swi rhandza, etin’hwetini tinharhu leti taka hi langutele ku tlangela malembe ya 50 ya vukati bya hina, loku hi ntolovelo ku vuriwaka siku ro tlangela xiendlakalo xa nkoka swinene. Kambe handle ko tipfinyinga, hi vula leswaku malembe ya hina ya risima ma sungule loko hi nghenele ntirho wa vuphayona.”
Vo tala va kume leswaku nyangwa lowu yisaka entirhweni lowu engetelekeke nakambe wu tisa ni ntsako lowukulu! Makwerhu un’wana loyi a sunguleke ntirho wa vuphayona endzhaku ka mavhiki mambirhi a hlanganise lembe ra vu-65 u ri: “Ndzi fanele ku vula leswaku a ndzi si tshama ndzi va ni nkarhi lowu fuweke hi mikateko evuton’wini bya mina ku fana ni malembe ya khume lama hundzeke ya ntirho wa vuphayona.” Mpatswa wun’wana lowu tekaneke lowu phayoneke ku tlula malembe ya nkombo wu ri: “Xana i yini xin’wana lexi mpatswa wa malembe yo ringana ni ya hina ni swiyimo swo fana ni swa hina wu nga xi endlaka? Hakanyingi ha va vona lava fanaka na hina ensin’wini—lava tiphinaka hi ku tshama ekaya, vo nyuhela ntsena, va dyuhala ivi va tsana. Ntirho lowu wu endla leswaku hi tshama hi tiyile emianakanyweni ni le mirini. Minkarhi hinkwayo hi swin’we. Ha tiphina hi mafenya ni vutomi.”
Kavula, a hi hinkwavo lava dyuhaleke lava swiyimo swa vona swi va pfumelelaka ku phayona. Vakreste lava va nga tiyisekisiwa leswaku Yehovha wa swi tlangela leswi va kotaka ku swi endla entirhweni wa yena. (Ringanisa Marka 12:41-44.) Hi xikombiso, makwerhu un’wana wa xisati la lamaleke u tshama emutini wa vadyuhari. Hambiswiritano, nyangwa wa ntirho wu tshama wu n’wi pfulekerile! Dokodela u n’wi vutise ndlela leyi a wu tirhisaka ha yona nkarhi wa yena lowo tala. U te: “Ndzi n’wi hlamusele leswaku a ndzi na nkarhi. A nga swi twisisanga. Ndzi n’wi byele leswaku leswi swi vangiwa hi leswi masiku ya mina ma teleke hi mintirho leyi enerisaka. A ndzi na xivundza, kambe ndzi lavisisa lava nga ni xivundza ivi ndzi ringeta ku va byela leswi Xikwembu xi nga ta swi endlela vanhu.” U katsakanye timhaka hi ku vula leswi: “Eka munhu la nga ni malembe ya 80, munhu un’wana a nge languteli swo tala eka yena. Ndzi khongeleleni leswaku ndzi hambeta ndzi kongomisa vo tala eka Yehovha.”
Xana u le malembeni yo wisa ku tirha? Nyangwa wo wisa ku tirha wu nga ha tsakisa swinene, kambe a hi nyangwa lowu yisaka emikatekweni ya moya. Anakanyisisa swiyimo swa wena hi xikhongelo. Swi nga ha endleka u swi kota ku nghena hi nyangwa lowu nga ta ku pfumelela ku endla ntirho lowu engetelekeke wa Yehovha.
[Swifaniso leswi nga eka tluka 25]
Ku wisa ku tirha ku nga ku nyika nkarhi wo endla vutirheli lebyi engetelekeke