‘Ndzingo Wa Ku Tiya Ka Rirhandzu Ra Wena’

XANA marito lama nga laha henhla ma tisa yini emianakanyweni ya wena? Ku xanisiwa ni ku nonon’hwa ke? Ku dlawela ku pfumela ke? Marito wolawo eku sunguleni ma tsariwe hi muapostola Pawulo epapileni leri yaka eka Vakriste va le Korinto wa khale. I ya nkoka lowukulu eka vanhu va Yehova namuntlha hikuva ‘ku tiya ka rirhandzu ra vona’ ku ringiwa hi ndlela leyi fanaka. Kambe hi ndlela yihi? Ku kuma nhlamulo, a hi kambisiseni mbango wa marito ya Pawulo.

Xisekelo Xa Ndzingo

Kwalomu ka makume mambirhi ya malembe endzhaku ka ku simekiwa ka Vukriste, bandlha ra le Yerusalema a ri ri exiphiqweni lexikulu xa swa timali. Loko va tshame ekhokholweni rolero ra ku kaneta ni ku ya hi nghohe ka Vayuda, Vakriste hi malembe layo tala va boheke ku “tiyisela eku lweni lokukulu ne ku vavisekeni,” hambi ku ri ku tokota ‘ku phanghiwa ka swilo swa vona.’ (Vaheveru 10:32-34) Ehandle mpfuno wu ve lowu lavekaka.

Hakunene, vamakwavo va Vamatiko a va fanele va susumeteriwe ku pfuna eka khombo ra vona. Phela, a va kolota “xikweleti” lexi hlawulekeke eka Vakriste va le Yerusalema. Xana mahungu lamanene a ma nga hangalasiwanga ku ya fika eka Vamatiko ma suka eYerusalema ke? Pawulo u anakanyisisile a ku: “Loko Vakriste va Vayuda va avelane rifuwo ra vona ra moya ni Vamatiko, Vamatiko va ni ntirho lowu nga erivaleni wo pfuneta eka swilaveko swa vona swa leswi vonakaka.”—Varhoma 15:27, The New English Bible.

Ku Hlengeleta Nhlengo

Pawulo u kongomisiwe hi huvo leyi fumaka ku “anakanya [Vakriste va] swisiwana.” (Vagalatiya 2:10) Kutani u rhumele mahungu eka Vakriste va le Yuropa na Asia Minor malunghana ni xiyimo xa le Yerusalema. Hi leswi swiletelo swa Pawulo: “Loko wu ri nhlengo lowu humeseriwaka vahlawuriwa va Xikwembu, na n’wina mi ta endla hi laha ndzi leriseke tikereke ta Galatiya ha kona. Hi siku ro sungula ra vhiki, un’wana ni un’wana wa n’wina a a veke swin’wana hi tlhelo, eka leswi a swi bindzuriseke, leswaku nhlengo wu nga ha endliwi siku ndzi taka.”—1 Vakorinto 16:1, 2.

Hi ku veka mali ya vona etlhelo hi ndlela leyi, ku hava ni un’we loyi a a ta titwa a boheka kumbe a sindzisiwa loko nhlengo wu tekiwa hi xiviri. Vamakwerhu a va vanga ni ku chava kwihi kumbe kwihi ka leswaku mali ya vona yi ta tirhisiwa hi ndlela leyi hoxeke kumbe yi tlangisiwa. I ‘vavanuna lava amukelekaka’ ntsena lava a va ta pfumeleriwa ku fambisa mali leyi hlengeletiweke, Pawulo hi byakwe a va heleketa loko swi vonaka swi fanerile.—1 Vakorinto 16:3-5.

Nhlamulo ya Vakorinto ku ve yihi ke? Hambi leswi vamakwerhu entiyisweni va amukeleke xitsundzuxo xa Pawulo hi ndlela leyinene, nhlengo a wu rhumeriwanga. (2 Vakorinto 8:6, 10, 11) Kumbexana vakulu va ve lava khomekeke hi ku basisa bandlha eka timholovo, vunghwavava ni swiphiqo swin’wana leswi Pawulo a va tsaleleke ha swona.

‘Humesani Swinene Nyiko Ya Tintswalo’

Hi mpimo wo karhi, Pawulo u va tsalele papila rin’wana a ku: “Vamakwerhu, hi lava leswaku mi tiva leswi tintswalo ta Xikwembu ti swi endleke [emabandlheni ya] Makedoniya. Va ringiwile ngopfu hi maxangu, kambe exikarhi ka swona hinkwaswo, ku tsaka ka vona ku yile ku engeteleka. Kutani hambi leswi a va ri evusiwaneni lebyikulu, va humesile tinyiko ta vona hi ku hanana loku tlurisaka mpimo. Ndzi nga mi byela leswaku va hlengile hi ku ya hi hinkwaswo leswi a va ri na swona, ni ku hundzisa kwalaho; hi ku rhandza ka vona, va komberile hi matimba swinene leswaku hi va katekisa hi ku va pfumelela ku hoxa xandla xa vona entirhweni lowu wo pfuna vahlawuriwa va Xikwembu. I mhaka leyi hina a hi nga yi langutelanga, hikuva va rhangile hi ku tinyiketa eka Hosi, kutani hi ku rhandza ka Xikwembu va tlhele va tinyiketa eka hina. Hikokwalaho hi khongoterile Tito, la sunguleke ntirho wolowo, ku ya emahlweni na wona, a mi pfuna ku hetisa nyiko leyi ya tintswalo. Mi vafumi eka hinkwaswo leswi mi nga na swona, eku pfumeleni, eku vulavuleni, evutivini, ni le ku hisekeni hinkwako, ni le rirhandzwini leri hi ri pfuxeke eka n’wina; hi mukhuva wolowo, kombani leswaku mi vafumi eku humeseni ka nyiko yoleyo ya tintswalo.”—2 Vakorinto 8:1-7.

Xikombiso xa Vamakedoniya lava tinyikelaka xi nyike Vakorinto swilo swo tala swo ehleketa ha swona. Korinto a ri tiveriwa ngopfu rifuwo, swilo swa manyunyu ni mabindzu ya rona. Van’wana va vamakwerhu kwalaho kumbexana a va ri swisiwana, kambe bandlha hinkwaro handle ko kanakana a ri antswa ku tlula Vakriste va le Makedoniya lava a va ri “evusiwaneni lebyikulu.” Hambi swi ri tano, Vamakedoniya va nyikele “hi ku hanana loku tlurisaka mpimo.” A va lavanga ku khutaziwa hi Pawulo leswaku va nyikela. Entiyisweni va “komberile” Pawulo “hi matimba swinene” leswaku va hoxa xandla eku nyikeleni loku! Lebyi a ku ri vumbhoni bya leswaku Vakriste va le Makedoniya hakunene ‘va tinyiketile eka Hosi eku tinyikeleni loku nga tlheleriki endzhaku ni le ka Pawulo ni vanakulobye vakwe,’ va titsongahatela vukongomisi bya vona bya le tilweni.

Va Ringiwile Malunghana Ni Rirhandzu Ni Ku Hanana Ka Vona

Xana Vakorinto hi ku fanana a va ta susumeteriwa ku ‘humesa swinene nyiko ya tintswalo’? Loko a endzela eKorinto ro sungula, Pawulo u boheke ku tiwundla tanihi murhungi wa matende. (Mintirho 18:1-3) U ye emahlweni ni endlelo leri ra ku tiwundla hambi loko bandlha ri simekiwile kwalaho, a papalata ku tirhisa ‘xikhundla’ xa yena tanihi muevangeli wa nkarhi hinkwawo ku kuma nseketelo wa swa timali.—1 Vakorinto 9:3-12.

Thomas Scott, muhlamuseri wa Bibele u ri: “Kumbexana u vone swilo swin’wana eku paluxeni ka Vakriste va le Korinto, leswi eku sunguleni swi n’wi boheke ku ala ku amukela nseketelo wihi na wihi wa vona.” Kumbexana hi ku hlohloteriwa hi swilo leswi vonakaka swa vutianakanyi leswi va rhendzeleke, Vakorinto lava fumeke kumbexana va ve ni mboyamelo lowu hambanaka ni ku hanana. Pawulo a nga va nakambe a chave leswaku Vakorinto lava nga ni mianakanyo ya swa mabindzu a va ta kanakana nsusumeto wa yena loko a amukele nseketelo wa swa timali. Nakambe ku nga ha va ku ve ni lava, ku fana ni van’wana eTesalonika, a va loloha ni ku lava tindlela to ala ku pfuna Vakriste-kulobye.—2 Vatesalonika 3:7-12.

Hambi ku nga va mhaka yihi kumbe yihi, Pawulo ni vanakulobye vakwe va hlawule ku tiwundla, “leswaku hi nga ti tshuka hi hingakanya ndlela ya Mahungu Lamanene ya Kriste.” (1 Vakorinto 9:12) Kambe ke, hi ku famba ka nkarhi Pawulo u wele exiphiqweni xa swa timali, ku nga mhaka leyi fikeleleke vamakwavo va swisiwana lava tshamaka eFilipiya. Pawulo u byele Vakorinto a ku: “Ndzi tekile swa mphamo wa mina wo huma eka [mabandlha man’wana], ndzi mi tirhela ha swona; xana a ku ri ku va dyelela ke? Na swona, loko ndzi ri le ka n’wina, hambi leswi a ndzi ri eku pfumaleni, a ndzi tikelanga munhu ni un’we; hikuva loko vamakwerhu lava humaka eMakedoniya [handle ko kanakana ku nga eFilipiya] va fikile, va ndzi pfunile hi leswo tala leswi a ndzi swi pfumala. Ndzi ringetile hi matimba ku vona leswaku ndzi nga mi tikiseli, kutani ndza ha ya emahlweni ndzi endlisa sweswo.”—2 Vakorinto 11:8, 9; ringanisa Vafilipiya 4:15, 16.

I ntiyiso, Pawulo hi byakwe u pfumerile leswaku a nge ma ‘amukeli malunghiselelo’ ya Vakorinto. Kambe loko Pawulo a ringete ku ala malwandla ya Lidiya wansati wa le Filipiya,’ ‘u va rhambile.’ (Mintirho 16:15) Xana Vakorinto va kombise ku khathalela loku fanaka loku phikelelaka eka vuhlayiseki bya Pawulo bya leswi vonakaka? Munhu a nga ha tivutisa. Hi mpimo wo karhi, Pawulo u twisise leswaku xiyimo lexi katsaka bandlha ra le Yerusalema xi nyikele nkarhi wo ringa loko Vakorinto va ri ni mboyamelo wa tsonana kumbe loko va kurile eku hananeni. Xisweswo u khongoterile a ku:

“A ndzi mi lerisi, kambe . . . ndzi ta tiva ku tiya ka rirhandzu ra n’wina. Leswi a swi vuli leswaku van’wana va fanele ku vevukeriwa, kutani n’wina mi tikeriwa [hi leswaku, hayi leswaku van’wana va ta ntshunxeka ivi n’wina mi xaniseka], e-e! Kambe a swi endliwe ku ri hava ku dyelelana. Ndzalo ya n’wina sweswi yi pfuna vusiwana bya vona; siku rin’wana ndzalo ya vona yi ta mi pfuna evusiwaneni bya n’wina. Kutani sweswo swi ta endla leswaku ku nga vi na ku dyelelana, kukotisa leswi Tsalwa ri vulaka swona, leri nge: ‘Loyi a a hlengeletile ngopfu a nga vanga ni leswo tala, ni loyi a a hlengeletile switsongo a nga kayivelanga.’”—2 Vakorinto 8:8, 13-15.

Handle ko kanakana, Vakorinto va hlule ndzingo wa vona. Nkarhi wun’wana endzhakunyana, Pawulo u vikile a ku: “Va le Makedoniya ni va le Akaya [laha Korinto a ri ri kona] va tibohile hi ku tsaka ku hlenga swo pfuna swisiwana leswi nga kona exikarhi ka vahlawuriwa va le Yerusalema.”—Varhoma 15:26.

Ku Hlangavetana Ni Ndzingo Namuntlha

Hambi swi ri tano, xana ha yi hlula mindzingo ya rirhandzu ni ku hanana leyi vaka kona namuntlha? Hi hanya ‘eminkarhini leyi nonon’hwaka ku hlangavetana na yona.’ (2 Timotiya 3:1-5) Mintshikilelo ya swa timali yi tshikilela vo tala va hina namuntlha. Naswona minkarhi yin’wana “ku navela ka miri, ni ku navela ka mahlo, ni ku tikurisa hi swa vutomi lebyi” swi vumba mintshikilelo ya swona. (1 Yohane 2:16) Swi olova swonghasi ku va la titshembaka, u nga khathaleli swilaveko swa van’wana!

Timbhoni ta Yehova hinkwato namuntlha ti hlangavetane ni mindzingo ya rirhandzu ra tona ra vumakwerhu hi ndlela leyi xiyekaka. Hi xikombiso, hi March 3, 1985, ku tsekatseka ka misava ku tlhekekile eSantiago, Chile. Madzana ya vamakwerhu ma lahlekeriwe hi makaya ni tinhundzu ta vona. Hi ku hatlisa, mabandlha ma endle matshalatshala yo pfuna. “Hi tiawara ti nga ri tingani,” ku vika vamakwerhu, “van’wana va sungule ku fika ni swakudya, swiambalo, minkumba ni swilo swin’wana leswi pfunaka.” Minyikelo na yona yi tile yi huma emisaveni hinkwayo. Swiendlakalo leswi fanaka swi humelerile minkarhi yo tala hi malembe layo tala.

Kambe a hi fanelanga hi yimela mhangu leswaku hi kombisa rirhandzu ra hina ra vumakwerhu. Loko Mukriste-kulorhi a tokota ku nonon’hwa ka swa timali, hi nga va lava khathalelaka swilaveko swa yena, hi endla leswi tlulaka ku, “Mi kufumela, mi xurha.” (Yakobo 2:15, 16) Naswona ku vuriwa yini hi lava nga entirhweni wa nkarhi hinkwawo lava ‘hanyaka hi mahungu lamanene.’ Ku fana na Pawulo, vanhu vo tano a va lavi kumbe ku langutela mpfuno wa swa timali eka lava va va tirhelaka. Hambi swi ri tano, vo tala va susumeteriwe ku kombisa ku hanana eka lava va tirhelaka ku ‘byala swilo swa moya’ ematshan’wini ya vona.—1 Vakorinto 9:11, 14.

Naswona ku vuriwa yini hi swilaveko swa nhlengeletano ya misava hinkwayo ya Timbhoni ta Yehova? 1989 Yearbook of Jehovah’s Witnesses yi vika leswaku “hi lembe ra ntirho ra 1988 Sosayiti ya Watch Tower yi tirhise R74 586 692, 43 ku khathalela maphayona lama hlawulekeke, varhumiwa ni valanguteri lava famba-fambaka eswiavelweni swa vona swa ntirho wa nsimu.” Timali leto tala nakambe ti tirhisiwe ku khathalela ni ku xava miako, switirho, michini, maphepha ya rhavi—ku nga vuriwi timali ta xisekelo ta vutomi bya ndyangu wa misava hinkwayo wa Bethele, lowu sweswi wu nga ni nhlayo leyi tlulaka 9 000! Tlhandla-kambirhi miako ya kwalomu ka 18 ya karhi ya akiwa ni ku pfuxetiwa emarhavini yo hambana-hambana, na 19 eyindlu-nkulu ya hina eBrooklyn, New York. Xana u hoxa xandla eku sekeleni ka ntirho lowu wa misava hinkwayo hi swa timali?

Ku fana ni le ka lembe xidzana ro sungula, namuntlha hinkwavo va hoxa xandla eku khathaleleni ka vutihlamuleri lebyi, ku katsa ni lava va pfumalaka, lava, hi minyikelo ya vona leyintsongo, va kombiseke ku va lava hoxeke xandla eka nseketelo wa Sosayiti wa swa timali. Van’wana va swi kuma swi pfuna ku landzela xikombiso lexi andlariweke eka 1 Vakorinto 16:2 kutani va veka mali ya vona ya munhu hi xiyexe etlhelo nkarhi na nkarhi leswaku yi nyikeriwa eHolweni ya kwalaho ya Mfumo. Van’wana va nga ha tlhela va endla xiboho xo nyikela mali hi ku kongoma eka Watch Tower Society eka 25 Columbia Heights, Brooklyn, New York 11201, kumbe rin’wana ra tihofisi ta yona ta marhavi.

Tiyiseka leswaku Yehova wa va xiya lava, hikwalaho ka ku hanana ka vona, va kombisaka ku tiya ka rirhandzu ra vona. U nga tisiveli ku kuma mikateko! Pawulo u tshembisile a ku: “Xikwembu xi ni matimba ya ku mi nyika hinkwaswo leswi mi swi pfumalaka, ni ku tlula kwalaho, mi ta kota ku pfuna entirhweni wihi ni wihi lowunene.”—2 Vakorinto 9:8.

[Bokisi leri nga eka tluka 26]

NDLELA LEYI VAN’WANA VA NYIKELAKA EKA NTIRHO WA MFUMO HA YONA

◻ TINYIKO: Minyikelo ya ku tirhandzela ya mali yi nga ha rhumeriwa hi ku kongoma eka Watch Tower Bible and Tract Society of Pennsylvania, 25 Columbia Heights, Brooklyn, New York 11201, kumbe eka hofisi ya kwalaho ya rhavi ra Sosayiti. Nhundzu yo tanihi ndhawu ya xiviri, kun’we ni swin’wetsin’wetsi kumbe swin’wana swa nkoka, na swona swi nga ha nyikeriwa. Papila ro koma leri hlamuselaka leswaku sweswo i munyikelo lowu heleleke ri fanele ku fambisana ni minyikelo leyi.

◻ LUNGHISELELO RA MINYIKELO YA KU YA HI SWIYIMO: Mali yi nga ha nyikiwa Watch Tower Society ku yi hlayisa, ku ri ni lunghiselelo ra leswaku loko ku ri ni xilaveko xa munhu hi xiyexe yi ta tlheriseriwa eka loyi a yi nyikeleke.

◻ NDZINDZA-KHOMBO: Watch Tower Society yi nga ha tsariwa tanihi leyi nga ta vuyeriwa eka fambiselo ra ndzindza-khombo wa vutomi kumbe eku kunguhateni ka ku wisa/phenceni. Sosayiti yi fanele ku tivisiwa hi malunghiselelo wahi ni wahi yo tano.

◻ KU KHOMELANA MALI: Tiakhawunti to hlayisa mali ebankini ti nga ha vekiwa hi vito ra Sosayiti. Loko leswi swi endliwile, tivisani Sosayiti. Nhundzu, swiboho ni leswi u nga na swona swi nga nyikeriwa ehansi ka lunghiselelo leri nga ta pfuna la nyikelaka loko a ha hanya. Endlelo leri ri hunguta ku durha ni ku nga tiyiseki ka ku tivisa xiboho, u ri karhi u tiyiseka leswaku Sosayiti yi amukela nhundzu leyi exiendlakalweni xa rifu.

◻ SWIBOHO: Nhundzu kumbe mali swi nga ha hundziseriwa eka Watch Tower Society hi ku tirhisa xiboho xa le nawini lexi humesiweke. Kopi yi fanele ku rhumeriwa eka Sosayiti. (Laha Afrika Dzonga swiboho swi nga endliwa eka Jehovah’s Witnesses of South Africa.)

Ku kuma rungula ni switsundzuxo leswi engetelekeke malunghana ni timhaka to tano, tsalela Treasurer’s Office, Watch Tower Bible and Tract Society of Pennsylvania, Private Bag 2067, Krugersdorp, 1740, kumbe eka hofisi ya ka n’wina ya rhavi ra Sosayiti.