Ta Rivala

Le London, tikhampani to dlaya switsotswana ti hlamarile loko ti vitaniwa leswaku ti ta khoma nhlati leyi a yi ri exithezini xa vu-72 xa muako lowu a wa ha ri eku akiweni. Xihadyana lexi “a xi tshama eka swingolongondzwana leswi siyiweke hi vaaki” xi ponisiwile.—THE TELEGRAPH, LONDON.

Ndzavisiso lowu endliweke eJarimani wu kombisa leswaku vanhu lavakulu lava endlaka 76,3 wa tiphesente va swi teka swi nga “bihanga” ku tlanga hi rirhandzu naswona “leswi a swi vuli swona leswaku vanhu volavo va va va rhandzana hakunene.” Kwalomu ka hafu ya vona va vule leswaku a swi bihanga ku va munhu la ngheneleke vukati a tlanga hi rirhandzu ni munhu loyi a nga n’wi tiviki.—APOTHEKEN UMSCHAU, GERMANY.

Ndzavisiso lowu endliweke etikweni ra Rhaxiya wu kombisa leswaku 48 wa tiphesente ta vanhu va tshemba leswaku ku hlaseriwa hi matherorisi se va “tshama va swi languterile” naswona “i tshamelo maxelo.”—KOMMERSANT, RUSSIA.

“Eka kungu ro fana ni leri a ri tirhisiwa emalembeni ya le xikarhi,” makhamba ya le Mexico lama ngungumerisaka swilo ma ringete ku kanganyisa varindzi va le ndzilakaneni leswaku va ta hundza naswona “matlhari yo tala” lawa a ma ri eka xigolonyana lexi kokiwaka swin’we ni swilo swin’wana leswi tsanyukaka “a swi pfale swidzidziharisi leswi a swi yisiwa en’walungwini,” leswi a swi tsemakanyisiwa hi le ndzilakaneni wa le U.S.A.—REUTERS NEWS SERVICE, U.S.A.

“Vavasati vambirhi eka va ntlhanu lava nga biha emirini” va le Dorobeni ra New York va hetelela va humese makhwiri. Nhlayo ya vona yi “cince hi ndlela yo hlamarisa eka malembe yo tlula khume lama hundzeke.”—THE NEW YORK TIMES, U.S.A.

Vaprista Va Kereke Ya Orthodox Ya Le Rhaxiya Va Lava Ku Hlawuriwa Eka Swikhundlha Swa Tipolitiki

Xiviko xa mahungu lexi vuriwaka RIA Novosti xi vule leswaku “Huvo ya Kereke ya Orthodox ya le Rhaxiya yi pfumelele vafundhisi va yona leswaku va nghenelela eka swa tipolitiki leswaku ku nga vi ni ku avana ekerekeni naswona kereke yi nga xungetiwi hi swilo swin’wana.” Hi ku ya hileswi vuriweke hi vabixopo, swiyimo swo tano swi va kona loko ku ri ni “ku avana exikarhi ka vafundhisi ni vanhu van’wana lava nga ni ripfumelo ro hambana ni ra vona, lava lavaka ku hlawuriwa eka swa tipolitiki leswaku va ta lwisana ni Kereke ya Orthodox naswona leswi swi endla leswaku ku vitaniwa masocha ma ta lamula.”

Swiphiqo Swa Nawu Lowuntshwa

Maendlelo lamantshwa yo pfuna mimpatswa leswaku yi va ni n’wana, lawa eku sunguleni a ma tekiwa tanihi lama nga ta ka ma nga tirhi ma vanga swiphiqo swa nawu leswintshwa. Phepha-hungu ra The Wall Street Journal ri vula leswaku “lembe ni lembe ku velekiwa vana vo tala lava mbewu ya vununa kumbe xitumbulukwa xa kona xi hlayisiweke ku ringana tin’hweti kumbe malembe. Minkarhi yin’wana mutswari un’we u va se a file, hakanyingi ku va ku ri tatana.” Le United States, van’wana va vana lava va kuma mali leyi humaka eka Minhlangano yo Pfuna Swisiwana. Kambe milawu ya matiko ya hambana malunghana ni loko mali yoleyo yi fanele yi nyikiwa n’wana la velekiwaka endzhaku ka loko mutswari un’we a file. Sonny Miller, gqweta ra le Minnesota u te: “Thekinoloji se yi andze ngopfu ku tlula ni ndlela leyi a ku ehleketiwa leswaku yi ta va xiswona.”