Ku Kala Ka Vululami Swi Twisa Ku Vava!

HI 2010, Michael u ntshunxiwe ejele ra Texas le U.S.A, endzhaku ko pfaleriwa malembe ya 27 hikwalaho ka nandzu lowu a nga wu endlangiki wo pfinya. U ntshunxiwe endzhaku ka loko swikambelo swa DNA—leswi a swi nga ri kona loko a pfaleriwa—swi kombise leswaku a nga na nandzu. Eku heteleleni, valawuri va va kumile lava nga endla nandzu wolowo, kambe a va va xupulanga hikuva va vule leswaku nandzu wa vona wu heleriwe hi nkarhi.

Swigevenga swo tala a swi na mhaka ni vululami. Hi xikombiso, phepha-hungu ra le Britain ra The Telegraph ri te: “Eka malembe ya khume lama hundzeke, milandzu ya ku dlaya leyi nga tengiwangiki yi engeteleke kambirhi naswona vanhu va ya va chava hikuva maphorisa ni tihuvo ta vuavanyisi swa tsandzeka ku yi tamela kahle milandzu leyi khumbaka madzolonga.”

Hi August 2011, maphorisa ya le Britain ma tsandzeke ku lawula muxaka wun’wana wa vugevenga—ku nga mintshungu leyi a yi onha nhundzu le Birmingham, Liverpool, London ni le tindhawini tin’wana. Yi hise swilo, yi faya mafasitere ya switolo, yi yiva, yi onha mabindzu, makaya, timovha ni swilo leswi vanhu a va tihanyisa ha swona. Ha yini yi endle sweswo? Van’wana eka yona a va susumetiwa hi makwanga kambe eka van’wana a swi vangiwa hi ku kala vululami loku a va ku vona. Vateki van’wana va mahungu va vule leswaku swi nga ha endleka leswaku mintshungu yoleyo a yi nga ha lavi ku twa nchumu hi hulumendhe leyi nga riki na mhaka ni vantshwa lava nga swisiwana lava vumundzuku bya vona byi nga tiviwiki.

Yobo, wanuna wa le Bibeleni u te: “Ndzi hambeta ndzi kombela ku pfuniwa, kambe vululami a byi kona.” (Yobo 19:7) Hilaha ku fanaka ninamuntlha, vanhu vo tala va lava vululami, kambe ko fana ni kwala! Kambe, xana munhu un’wana ni un’wana u na wona matimba yo herisa ku kala ka vululami? Xana i norho ku ehleketa leswaku siku rin’wana ku ta va ni vululami laha misaveni? Leswaku hi kuma tinhlamulo leti enerisaka ta swivutiso leswi, hi fanele hi kambisisa leswi endlaka leswaku vululami byi nga vi kona.