Hlayisa lungelo ga wena ga ku tira na Jehova!

1. Jehova i ti zwisa kuyini hi ntiro, niku lezo zi mu kuca ku maha yini?

JEHOVA mutiri a xalalako hi ntiro wakwe. (Tis. 135:6; Joh. 5:17) Kasi a zivangwa zakwe zo tlhariha zi kuma litsako lelo na zonawu, Jehova i zi nyika mitiro yo tsakisa. Hi xikombiso, i lo teka N’wana wakwe wa matewula a maha naye ntiro wa kuvanga. (Gonza Va Le Kolosi 1:15, 16.) A Biblia gi hi byela lezaku na a nga seta misaveni kota munhu wa nyama, Jesu i wa hi zinwe na Nungungulu kota “xigogo xa mitiro.” — Mav. 8:30.

2. Xini xi kombako lezaku a zivangwa za moya za nyikwa mitiro ya lisima ni yo tsakisa xontlhe xikhati?

² Kusukela kusanguleni kala magumo, a Biblia gi na ni zikombiso zi kombako lezaku Jehova xontlhe xikhati wa nyika mitiro a vana vakwe va moya. A xikhati lexi Adamu na Eva va nga onha va hlongolwa mutini wabye wa Paradise, Nungungulu “i lo yimisa a makerubima hi le Mutsuwuka-gambo wa simu ga Edeni, ni supado yi karihako matlhelo wontlhe, kasi ku rinzela a ndlela ya sinya ya wutomi.” (Gen. 3:24) Niku a bhuku ga Kuvululelwa 22:6 gi komba lezaku Jehova “i rumele a ngelosi yakwe a ku komba malanza yakwe lezi zi yimelweko hi ku maheka lokuloku.”

A VANHU KE?

3. Jesu i lanzelisile kuyini xikombiso xa Dadani wakwe a xikhati a nga hi laha misaveni?

³ A xikhati lexi a nga hi laha misaveni kota munhu wo mbhelela, Jesu i lo maha na a xalele a ntiro lowu Jehova a nga mu nyikile. Hi ku lanzela xikombiso xa Dadani wakwe, Jesu yenawu i lo va nyika mitiro ya lisima a vapizani vakwe. Kasi ku va maha vava ni manyawunyawu hi ntiro lowo, i lo wula lezi: “Hizinene nziku ka nwina: Loyi a kholwako ka mina, yenawu i ta maha mitiro leyi nzi yi mahako; ni mitiro ya hombe yo hunza leyi i ta yi maha, hakuva nziya ka Dadani.” (Joh. 14:12) Kasi ku komba lezaku a ntiro lowu wa xihatla, Jesu i te ngalo: “Hi fanele a ku tira a mitiro ya loyi a nzi rumileko, na ka ha hi mumu; a wusiku gata, laha munhu a nga zi kotiko ku tira.” — Joh. 9:4.

4-6. a) Hikuyini hi nga bongako a kuva Noa na Mosi va mahile mitiro leyi Jehova a va nyikileko? b) Zini zi fanako ka mitiro yontlhe leyi Nungungulu a nyikako vanhu?

⁴ Hambu mahlweni ka kuta ka Jesu, a vanhu va wa nyikwa mitiro yo xalalisa. Hambu lezi Adamu na Eva va nga tsanzeka ku tatisa a ntiro lowu va nga nyikilwe, a vanwani va mahile lezi Nungungulu a va rumileko. (Gen. 1:28) Noa i wa nyikilwe zileletelo zo kongoma za maakela ya taru legi gi nga wa ta ponisa wutomi xikhatini xa Ntalo. I lo maha khwatsi zontlhe lezi Jehova a nga mu rumile. Hontlheni hi kona nyamutlha hi lezi a mahileko ntiro wakwe hi mbilu! — Gen. 6:14-16, 22; 2 Ped. 2:5.

⁵ Mosi i nyikilwe zileletelo zo kongoma za maakela ya tabernakeli ni ku longisela a vapristi, niku i lo zi lanzela khwatsi. (Ekso. 39:32; 40:12-16) Hambu nyamutlha, ha vuneka hi kuva a tatisile a xiavelo xakwe hi kutsumbeka. Hi ndlela muni? Mupostoli Paule i tlhamusele lezaku a zilo lezo za Nayo zi wa hi nzhuti wa “zilo zo saseka lezi zi tako.” — Maheb. 9:1-5, 9; 10:1.

⁶ A ntiro lowu Nungungulu a nyikako malanza yakwe wa hambana hi kuya hi zikhati za kona mayelano ni lezi zi lavekako ka xikhati lexo malulamiselweni ya ku tatisa kungo gakwe. Hambulezo, xontlhe xikhati a ntiro lowu va wu mahako wu dumisa Jehova wu tlhela wu vuna vanhu lava va kholwako. Handle ko kanakana a ntiro lowu Jesu a wu mahileko na a nga seta misaveni ni xikhati a nga hi laha misaveni wu wa hi nawo mabhinzu lawo. (Joh. 4:34; 17:4) A ntiro wa hina nyamutlha wonawu wa mu dumisa Jehova. (Mat. 5:16; gonza 1 Va Le Korinte 15:58.) Hikuyini?

HLAYISA MAWONELA MA NENE HI NTIRO WA WENA

7, 8. a) Tlhamusela a ntiro lowu a maKristu ma nga ni lungelo ga ku wu maha inyamutlha. b) Hi fanele ku hlamulisa kuyini ka wurangeli ga Jehova?

⁷ Handle ko kanakana i lungelo ga hombe a kuva Jehova a ramba vanhu lezaku va tira naye kota zitiri-kulobye. (1 Kor. 3:9) Lava va patsekako kuakeni ka tiSalawu ta Mitlhangano ya Hombe, tiSalawu ta Mufumo, ni tihofisa ta ravi va kari va maha a ntiro wa kuaka wa xiviri, a ku fana na Noa na Mosi. Kani u kari u aketa Salawu ya Mufumo ya lomu xipanzeni xa wena, kani u le kuakeni ka tsinza wa hina wa misava yontlhe le Warwick, Nova York, hlayisa lungelo ga wena ga ku tira hi ndlela leyo. (Wona mufota wo tsaliwa kusanguleni ka nzima.) I ntiro wo basa. Hambulezo, a kutala ka zikhati, a maKristu ma rambiwa ka ntiro wa ku aka hi tlhelo ga moya — ku nga ntiro wa kuxumayela. Wonawu wu mahelwe ku dumisa Jehova ni ku vuna vanhu va ingisako. (Miti. 13:47-49) A hlengeletano ya Nungungulu yi nyika zileletelo zi faneleko xungetano hi ndlela ya chukwana ya ku maha ntiro lowu. Ka zikhati zinwani lezo zi nga ha wula ku nyikwa ziavelo ziswa za ntiro.

⁸ A malanza yo tsumbeka ya Jehova xontlhe xikhati ma ti veka hasi ka wurangeli gakwe hi kutsaka. (Gonza Maheberu 13:7, 17.) Kusanguleni hi nga tshuka hi nga zi zwisisi a ku hikuyini hi faneleko ku tatisa a ntiro wa hina hi mahela go kari. Hambulezo, ha ma tiva khwatsi a mabhinzu ya ku lanzela ni kwihi kucica loku Jehova a ku wonako na ku laveka.

9. Xikombiso muni lexi a madota ma vekelako bandla xungetano hi ntiro?

⁹ A ndlela leyi a madota ma rangelako hi yona bandla yi komba kuxuva ko tiya ka ku lava ku maha kuranza ka Jehova. (2 Kor. 1:24; 1 Tes. 5:12, 13) Ma vumela ku tira hi kutikarata ma tlhela ma longoloka ni kucicacica ka ziyimo. Ma ti zwananisa hi kutsaka ni tindlela tiswa ta ku xumayela a Mufumo wu yimisilweko wa Nungungulu. Hambu lezi a vokari va nga ranga hi ku kanakanela a lulamiselo ga ku xumayela hi telefone, ku xumayela fungwini, kutani ku xumayela maruweni ni mabazarini, zalezo va lo sangula ku wona mabhinzu ya kona. Hi xikombiso, a mune wa maphayona le Alemanya ma lo boha ku ya tira ka xipanze xa mabhinzu lexi va nga tolovela ku xi tlulatlula. Michael i bika lawa: “Ku wa hunza malembe na hi nga se xumayela ka xipanze xo kota lexo, hikwalaho hi wa chava. Nza tsumba ku Jehova i zi wonile lezo hakuva i hi vunile kuva ni ntiro wo tsakisa nguvu ka mixo leyo. A hi no ku tsaka hi kuva hi lanzele a wurangeli hi gi kumileko ka Wutireli ga hina ga Mufumo hi tlhela hi tsumba a xivuno xa Jehova!” Xana u na ni manyawunyawu ya ku ringisa tindlela tiswa ta ku xumayela xipanzeni xa nwina?

10. Kucica muni ku mahilweko nzeni ka hlengeletano ka malembana lawa?

¹⁰ A hlengeletano yonawu ya tshuka yi cica zokari. Ka malembana lawa, ku na ni tihofisa to tala ta ravi ti patsilweko ni tinwani. Hambu lezi a kucica loko ku lavako lezaku a vamakabye va tirako ka tihofisa leto va cica zokari, na zi nga seya kule a vamakabye vontlhe va wona wuyelo ga kucica loko. (Mutsh. 7:8) Litsako la hombe ka vatiri lavo va kuziranza a ku maha xipanze xa matimu ya vanhu va Jehova!

11-13. Zikarato muni lezi a vokari va kumanako nazo hi kota ya kucica ka zilo hlengeletanweni?

¹¹ Hi nga kuma zigonzo za lisima ka lava va khumbilweko hi kupatsiwa ka maravi. A vokari va wa hi ni makume ya malembe na va tira ka mingango yabye ya Beteli. A patswa wo kari wu nga tira ka ngango wa wutsongwani wa Beteli le Amerika Central wu lo rambiwa ku ya tira ka ngango wa Beteli le Mexiko wu nga hi wa hombe nguvu ku khwatsi ku patsa 30 wa mingango yo fana ni lowu va ngata hi ka wona. Rogelio i ngalo: “Zi bayisile nguvu a ku siya maxaka ni vanghana.” Juan, a nga makabye munwani a kombelilweko ku rura aya Mexiko, i ngalo: “Zi fana nguvu ni ku pswaliwa luswa; u fanele ku maha vanghana va vaswa. Zi lava ku u ti zwananisa ni mikhuwo yiswa ni mapimisela maswa.”

¹² A vatiri va Beteli lava va nga kombeliwa ku rura vaya ka hofisa ya ravi ya Alemanya na va suka ka matiko manwani ya Europa vonawu zi va karatele. Ni wihi loyi a ranzako zitsunga wa zi zwisisa ku zi va karatele lava va nga rura le Suíça a ku siya wutshamu ga zitsunga zo saseka legi va nga hi ka gona. Niku lava va tako hi Áustria, a kusanguleni va wa vilela a wutomi go rula legi va nga gi hanya leyo.

¹³ Ka lava va rurileko vaya ka tiko ginwani, lezo zi wa wula ku ti toloveta ku hanya ka tiyindlu tiswa, ku tira ni vamakabye va nga kala va nga va tivi, hambu ku gonza ntiro wunwani. Zi wa wula ku cica bandla ni xipanze xo xumayela ka xona, kuzilava ni lirimi la kona. A kucica loko ku nga ha karata. Hambulezo, a vatiri vo tala va Beteli va vumela kucica loko. Hikuyini va mahako lezo?

14, 15. a) A votala va kombisa kuyini lezaku va hlayisa lungelo gabye ga ku tira na Jehova ni ka xihi xiavelo ke? b) A vamakabye lavo xikombiso xi nene ka hina hontlheni hi ndlela muni?

¹⁴ Grethel i ngalo: “Nzi lo vumela xirambo lexi hakuva yi wa hi ndlela ya ku komba Jehova lezaku a liranzo la mina hi yena a li laha ka tiko, yindlu, kutani lungelo go kari.” Dayska i ngalo: “A xikhati nzi nga alakanya lezaku a xirambo lexo xita hi ka Jehova, nzi lo xi amukela na nzi tsakile.” André na Gabriela va seketela magezu lawo vaku: “Lezi zi hi kombile ndlela yinwani ya ku tirela Jehova hi ku veka kuxuva ka hina hi tlhelo. Hi lo ti byela lezi: ‘Loku a moya wa kucica wa Jehova wuba, i chukwana ku lulamisa malona ya wena wutshanwini ga ku wu valela.’”

¹⁵ Hi kota ya kupatsiwa ka maravi, a vatiri vo kari va Beteli va kuma ziavelo ziswa za kuva maphayona. Hi zalezo zi nga humelela vatiri vo kari va Beteli a xikhati lexi a maravi ya Dinamarca, Noruega, ni Suécia ma nga patsiwa ma wumba a ravi ga Escandinávia. Florian na Anja vanwe va kona; ve ngalo: “Hi wona xiavelo xa hina xa xiswa kota kulwa ko tsakisa. Litsako ka hina a ku tirisiwa hi Jehova ni kwihi laha hi nga kona. Hi nga wula hi mbilu yontlhe lezaku hi ti wona na hi hi ni makatekwa ya hombe!” Hambu lezi a vokari xikari ka hina va to kala va nga tshuki va kumana ni kucica loko, xana a hi nge pimanyisi a kutiyimisela ka vamakabye lavo ka ku lava ku rangisa zilaveko za Mufumo ke? (Isa. 6:8) Jehova xontlhe xikhati wa va katekisa lava hlayisako a lungelo gabye ga ku tira naye ni kwihi laha va avelwako kona.

SIMAMA KU TSAKELA LUNGELO GA WENA GA KU TIRA NA JEHOVA!

16. a) A bhuku ga Va Le Galatia 6:4 gi hi kuca ku maha yini? b) Hi gihi a lungelo ga hombe legi a munhu a nga vako nago?

¹⁶ A vanhu va nga mbhelelangiko va ranza ku ti fananisa ni vanwani, kanilezi a Mhaka ya Nungungulu yi hi kuca ku veka kupima ka lezi hina wutsumbu hi zi kotako ku maha. (Gonza Va Le Galatia 6:4.) A ku tala ka hina a hi na xikhundla xa wurangeli lomu bandleni. A hi hina hontlhe kambe hi zi kotako kuva maphayona, varumiwa kutani vatiri va Beteli. Kunene lawo malungelo ya ma nene! Kanilezi hi nga tshuki hi rivala lezaku a lungelo ga hombe legi munhu a nga vako nago hi legi hontlheni hi nga nago  —  ku nga kuva mutiri-kulori na Jehova wutirelini ga wuKristu. Lego i lungelo hi faneleko ku gi hlayisa!

17. Xini xi to simama ku humelela tikweni legi ga Satani, niku hikuyini lezo zi nga faneliko ku hi mbheta ntamu?

¹⁷ Loku a tiko ga Satani ga ha hi kona, hi nga tshuka hi nga zi koti ku maha zontlhe hi zi lavako ntirweni wa Jehova. Hi nga tshuka hi nga zi koti ku cica nchumu ka wutihlamuleli ga hina ga ngango, lihanyo, hambu ziyimo. Kanilezi lexo a hi xigelo xa kuva hi mbhela ntamu. U nga tshuki u kanyisa a wuzikoti ga wena ga ku tira zinwe na Nungungulu hi ku nyika wukustumunyu xungetano hi vito gakwe ni Mufumo wakwe ni kwihi laha zi kotekako. A xa lisima hi lezaku u tira naye hi laha wena wutsumbu u zi kotako hi kona u tlhela u khongelela lezaku a katekisa vamakabye lava va zi kotako ku maha zotala. Alakanya lezaku ni wihi loyi a dumisako vito ga Jehova wa lisima mahlweni kakwe!

18. Zini hi faneleko ku ti yimisela ku thinda niku hikuyini?

¹⁸ Hambu lezi hi kavanyetelwako hi gome ga hina ni kungambheleli, Jehova wa xalala hi ku hi tirisa kota zitiri-kulobye. A ho ku tsaka hi lungelo ga hina ga ku tira na Nungungulu masikwini lawa yo gumesa! Hikwalaho, hi fanele ku ti yimisela ku thinda zilo zo tala lezi zi nga kuxuva ka hina wutsumbu, na hi tiva lezaku misaveni yakwe ya yiswa, Jehova i ta hi tsika hi ti buza hi “wutomi legi gi nga wutomi hizinene” — gi nga wutomi ga pinzukelwa ka ziyimo zo tsakisa ni zo rula. — 1 Tim. 6:18, 19.

19. Zini lezi Jehova a hi vekeleko?

¹⁹ Zalezi hi nga mbhirini ya misava yiswa, ehleketa hi lezi Mosi a nga byela vaIsraeli xikhatanyana mahlweni ka ku nghena Tikweni ga Xitsumbiso: “Jehova Nungungulu wa wena i ta anzisa makatekwa ya wena ka yontlhe mitiro ya mandla ya wena.” (Deut. 30:9) Neti yi hunza a yimpi ya Har–Magedoni, lava va ti karatako va tira na Nungungulu va ta nghena tikweni giswa legi a va tsumbisako. Ka xikhati lexo, hi ta yisa kupima ka hina ka xiavelo xiswa — ku nga kucica misava yiva paradise go saseka!