MIHLAMULO YA BIBLIA
Xana a vanhu va ta hanya wutomi muni xikhatini xi tako?
Xana a kufa ka Jesu ku mahisa kuyini lezaku zi koteka a ku kuva ni misava leyi a vanhu va kona va khatalako hi vanwani?
Handle ko kanakana a vanhu va ta simama va chukwatisa zilo zo tala hi tlhelo ga siensia. Kanilezi, xana vona ha voce va nga zi kota a ku wumba a hlengeletano ya vanhu va khatalako hi munwe ni munwani wabye? Ahihi. Inyamutlha, a tiko gi tele hi moya waku a munhu a khatalela zakwe ntsena ni makangwa. Hambulezo, Nungungulu i tsumbisa zilo za zi nene ka ngango wa vanhu. — Gonza 2 Pedro 3:13.
Xungetano hi xikhati xa ha tako, a Mhaka ya Nungungulu yi wulawula hi vanhu va misava yontlhe lava va to khatala hi munwe ni munwani wabye. A vanhu va ta hanya kuruleni, niku ku nga tava ni munhu a to va mahela kubiha. — Gonza Mika 4:3, 4.
Xana a moya waku a munhu a khatalela zakwe ntsena wu ta fuvisiswa kuyini?
Nungungulu i mahile munhu na a nga hi na moya wa ku khatalela zakwe ntsena. Kanilezi, hi ku hlawula ku nga ingisi Nungungulu, a vanhu vo sangula va lo luza a kumbhelela kabye. Hi vona va hi thapelisileko a moya wa ku khatalela za hina ntsena. Hambulezo, Nungungulu i ta tirisa Jesu kasi ku maha vanhu va tlhela va maha vo mbhelela. — Gonza Va Le Roma 7: 21, 24, 25.
Hi ku yelana ni kuranza ka Nungungulu, Jesu i file kota muphahlo zonake a susa a wuyelo ga kungaingisi ka munhu wo sangula. (Va Le Roma 5:19) Hi ndlela leyo Jesu i vulula ndlela ya lezaku kuva ni wumanziko ga gi nene, laha a vanhu va to tlhatlhiswa ka moya wa kuva a munhu a khatalela zakwe ntsena lowu wu kucetelako ku maha za kubiha. — Gonza Tisimu 37:9-11.