MIHLAMULO YA BIBLIA
Xana a wubihi gita hi kwihi?
Himani a nga kucetela Jesu lezaku a maha zilo za kubiha? — Mateu 4:8-10
Hi tolovelo, a vanhu va lava kuva vo rula, vo tsumbeka ni va va nene. Makunu hikuyini hi tshamako hi ku wona wugevenga, kubiha ni tihanyi ta tshisela ga cima? Inyamutlha zi tolovelekile a kuzwa mibiko yo tshisa lomu ka zihaxa-mahungu. Xana ku na ni wokari a kucetelako vanhu lezaku va maha zilo za kubiha? — Gonza 1 Johani 5:19.
Xana Nungungulu i mahile vanhu na va hi ni kubyekelela ku maha zilo za kubiha? Ahihi, Jehova Nungungulu i mahile vanhu hi mufananiso wakwe, na va hi ni kubyekelela ku pimanyisa a liranzo lakwe. (Genesisi 1:27; Joba 34:10) Kanilezi, Nungungulu i tlhelile a vanga vanhu hi ndlela yo hlawuleka hi ku va nyika ntamu wa kutihlawulela. A xikhati lexi a vapswali va hina vo sangula va nga hlawula ku maha zilo za kubiha, va lo ala xikombiso xa Nungungulu zonake va maha vanhu vo kala kumbhelela. Hi kumile kubyekelela ka ku onha ka vona. — Gonza Deuteronome 32:4, 5.
Hi ta simama hi hi ni wubihi kala kupinzuka?
Nungungulu i lava lezaku hi hlula kubyekelela ka hina ka ku maha zilo za kubiha. (Mavingu 27:11) Hikwalaho, i hi gonzisa lezi hi nga potsisako zona a ku maha zilo za kubiha ni lezi hi nga li kumisako zona a litsako la lisine. Hambulezo, zezi a hi nge zi koti ku pimanyisa liranzo la Nungungulu hi kumbhelela. — Gonza Tisimu 32:8.
Hambu lezi a wubihi gi teleko nguvu inyamutlha, Nungungulu i gi tsika giva kona hi xikhati xo kari xi pimilweko, kasi vontlhe vava ni lungelo ga ku wona a wuyelo ga kona go bayisa. (2 Pedro 3:7-9) Kanilezi, lokuloku a misava yi ta tala hi vanhu vo tsaka va ingisako Nungungulu. — Gonza Tisimu 37:9-11.