Өлкә конгресслар — шатланып гыйбадәт кылу вакыты
1 Йосыф, Мәрьям, аларның балалары һәм башкалар һәрвакыт Иерусалимга ел саен үткәрелгән бәйрәмнәргә йөргән. Шул очракларда алар һәм башка гыйбадәт кылучылар көндәлек мәшәкатьләре турында уйламаска тырышып, тормышларындагы мөһимрәк рухи нәрсәләргә игътибарын туплаган. Бәйрәмнәр вакытында аларның Йәһвәнең игелеге турында уйланырга һәм сөйләшергә, шулай ук Канунны укырга мөмкинлекләре булган. Булачак өлкә конгрессларда да без Йәһвәгә шатланып гыйбадәт кыла алачакбыз.
2 Әзерләнергә кирәк. Насарадан Иерусалимга бару-кайту юлы 200 километр булган, һәм Гайсәнең гаиләсенә шул юлны үтәргә туры килгән. Без Гайсәнең энеләре һәм сеңелләре күпме булганын белмәсәк тә, Йосыф белән Мәрьямгә күпме тырышлыклар куярга һәм планлаштырырга кирәк булганын күз алдына китерә алабыз. Киләчәк өлкә конгрессның ике көнендә дә булыр өчен, син әзерләндеңме? Моның өчен сиңа бәлки отпуск алырга яки эштә планнарың турында әйтергә, шулай ук балаңның укытучысы белән сөйләшергә туры килер. Яшәү урыны кирәк булса, син моның турында кайгырттыңмы? Җыелыштагы махсус ихтыяҗлары булган берәр кардәшкә конгресска барыр өчен ярдәмеңне тәкъдим итә аласыңмы? (1 Яхъя 3:17, 18).
3 Файдалы аралашу. Яһүди бәйрәмнәрендә анда килгән кешеләр белән аралашырга яхшы мөмкинлек булган. Һичшиксез, Гайсәнең гаиләсе күптәнге дуслар белән җыелу вакытын түземсезлек белән көткән. Алар шулай ук Иерусалимнан булган һәм башка җирләрдән килгән яһүдләр яки прозелитлар белән дуслашып китәргә шат булган.
4 Шул ук мәгълүматны бастырып чыгару урынына, ышанычлы һәм акыллы хезмәтче безне бергә җыеп, өлкә конгрессларның нотыкларын тыңларга дәртләндерә, чөнки шулай эшләп без бер-беребезне ныгыта алабыз (Евр. 10:24, 25). Шуңа күрә, башкалар белән аралашыр өчен, конгресска һәр көн иртәрәк килергә тырыш, чөнки программаның рәисе музыка башланачагы турында әйткәч, урыннарга утырырга вакыт киләчәк. Төшке аш вакытында ризыкны сатып алыр өчен башка җиргә бару урынына, безгә үзебез белән бераз ризык алып килеп, конгресс үткән бинада калырга һәм безнең яныбызда булган кешеләр белән аралашырга киңәш бирелә. Бердәм мәсихче кардәшлегебез — Йәһвәнең бүләге һәм без аны һәрвакыт кадерләргә тиеш (Мих. 2:12).
5 Өйрәнергә вакыт. Бала чагыннан ук, Гайсә бәйрәмнәрдә үз күктәге Әтисе турында белергә тырышкан (Лүк 2:41—49). Безгә һәм безнең гаиләләребезгә булачак программаның өлешләреннән күбрәк файда алырга нәрсә ярдәм итәчәк? Программа барганда үз урыныңнан торып китмә һәм кирәксезгә сөйләшмә. Кесә телефоның, пейджер һәм башка приборларың сиңа һәм башкаларга комачауламасын. Докладчыга кара һәм кыскача язып бар. Бөтен гаилә белән бергә утырып, балаларың программаны тыңлаганнарын күзәт. Кич белән бергәләшеп ошаган фикерләр турында сөйләшер өчен вакыт бүлеп куй.
6 Кием һәм тышкы кыяфәт. Юлда очраган чит ил сәүдәгәрләре бәйрәмнәргә юл тоткан һәм аннан кайтып килгән Гайсәнең гаиләсен һәм башка гыйбадәт кылучыларны тиз таный алган, чөнки аларның кием кырыйларында чуклар һәм чукка зәңгәр җеп бәйләнгән булган (Сан. 15:37—41). Мәсихчеләрнең махсус киемнәре булмаса да, без пөхтә һәм чиста булганга һәм тыйнак киенгәнгә күрә, кешеләр безне таныйлар. Конгресска барганда һәм аннан кайтып килгәндә, шулай ук конгресс үткән шәһәрдә булганда, без тышкы кыяфәтебезгә аеруча игътибарлы булырга тиеш. Программадан соң киемнәребезне алыштырсак та, безгә әдәпле кием кияргә һәм плакеткаларны тагарга кирәк. Шул очракта без Шаһитләр булмаган кешеләрдән аерылып торачакбыз һәм тирә-яктагы кешеләрдә яхшы тәэсир калдырачакбыз.
7 Ирекле хезмәтчеләр кирәк. Конгресс яхшы үтсен өчен, күп эшчеләр кирәк. Син үз ярдәмеңне тәкъдим итә аласыңмы? (Мәд. 109:3). Конгресста башкарган эш — изге хезмәтебезнең өлеше һәм яхшы шаһитлек бирү мөмкинлеге. Бер тапкыр, конгресс үткән бинаны җыештырган ирекле хезмәтчеләребез шул бинаның администраторын таң калдырган булган, шуңа күрә ул болай дип язган: «Минем тормышымдагы бу гаҗәеп вакыйга өчен сезгә рәхмәт әйтергә телим. Мин Йәһвә Шаһитләренең безнең эшебездә күптәннән яхшы тәртип белән билгеле булганын һәм аерылып торганын ишетеп торам, чөнки алар кулланган биналарын һәрвакыт элеккегә караганда чистарак калдыра. Сез һәм сезнең оешмагыз бу бинаны матуррак ясап, җәмгыятькә файда китердегез, һәм безнең шундый әдәпле кешеләрне беркайчан да очратканыбыз булмады».
8 Шаһитлек бирү мөмкинлекләре. Конгресс үткән шәһәрдә яшәүчеләр яхшы һәм чиста киенгән, плакеткалар таккан кешеләрне күрәчәк һәм бу аларны кызыксындыра башларга мөмкин, шулай итеп безнең аларга конгресс турында сөйләргә мөмкинлекләребез булачак. Бер дүрт яшьлек бала яңа алган басманы үзе белән ресторанга алып килгән һәм аны официант булып эшләүче хатын-кызга күрсәткән. Бу мөмкинлекне кулланып, малайның әти-әнисе шул хатын-кызны конгресска килергә чакырган.
9 Шундый борынгы бәйрәмнәр рухи карашлы яһүдләр өчен шатлыклы вакыйгалар булган, һәм алар бу вакытны түземсезлек белән көткән (Кан. 16:15). Гайсәнең гаиләсе, анда булыр өчен һәм күбрәк файда алыр өчен, зур тырышлыклар куйган. Өлкә конгрессларга безнең күктәге яратучан Әтиебез биргән бүләк итеп карасак, без дә алар өчен рәхмәтле булачакбыз (Ягък. 1:17). Ел саен өлкә конгресста без Йәһвәгә шатланып гыйбадәт кыла алабыз, һәм моңа хәзер әзерләнә башларга кирәк.
[Өйрәнү өчен сораулар]
1. Исраилнең бәйрәмнәре бүгенге өлкә конгрессларыбызга нәрсә белән охшаган?
2. Булачак өлкә конгресска әзерләнер өчен, безгә нәрсә эшләргә кирәк?
3. Исраилнең бәйрәмнәре файдалы аралашу өчен нинди мөмкинлек биргән?
4. Бердәм мәсихче кардәшлегебез безнең өчен кадерле икәнен ничек күрсәтеп була?
5. Безгә программадан күбрәк файда алырга нәрсә ярдәм итәчәк?
6. Киемебез һәм тышкы кыяфәтебез турында безгә нәрсәне исәпкә алырга кирәк?
7. Конгресста ирекле хезмәтчеләр итеп ярдәм итү турында безгә ни өчен уйланырга кирәк?
8. Конгресс үткән шәһәрдә шаһитлек бирер өчен нинди мөмкинлекләр булачак?
9. Йәһвә биргән бүләк өчен без дә, Гайсәнең гаиләсе кебек, ничек үз рәхмәтләребезне белдерә алабыз?
[6, 7 биттәге рамка]
Өлкә конгресс белән бәйле искә төшерүләр
◼ Конгресс расписаниесе. Ике көнне дә программа 9:20 дә башланачак. Сәгать 8:00 дән кереп булачак. Музыка башланганда, программа үз вакытында башлансын өчен, безгә барыбызга үз урыннарыбызга утырырга кирәк. Шимбә көнне программа 16:55 тә, ә якшәмбе көнне 16:30 да тәмамланачак.
◼ Машиналар куяр өчен урыннар. Конгресс үткәрелә торган урыннарда, мөмкинлек булса, машиналарны куяр өчен түләүсез урыннар әзерләнәчәк. Килү белән машиналарны буш урынга куеп була. Машиналарында махсус знак булган инвалидлар машиналарны инвалидлар өчен урыннарга куя алалар. Машиналар кую урыннары әз булганга, машинада буш урыннар булмаса яхшырак булыр.
◼ Урыннар. Урыннарны машинада бергә килгән яки бергә яшәгән кешеләр өчен, яисә Изге Язмалар өйрәнүчеләрең өчен генә алып була (1 Көр. 13:5).
◼ Төшке аш. Тәнәфес вакытында башка җирдә ашап алыр өчен конгресстан китәр урынына, ризыкны үзең белән алып кил. Кирәк булса, урындык астына сыя торган кечкенә сумка-холодильник алып кил. Табигатьтә ял итү өчен зур сумка-холодильникларны һәм пыяла савытларны конгресска алып килергә ярамый.
◼ Ирекле иганәләр. Оештырылган конгресслар өчен рәхмәтне без бөтендөнья эшенә ирекле иганәләр биреп белдерә алабыз. Моны Патшалык Залларыбызда яки конгресста эшләп була.
◼ Фаҗигаләр һәм көтелмәгән хәлләр. Конгресс булган җирдә берәр фаҗига булса, оештыручы кардәшкә әйт, ул шунда ук беренче ярдәмгә мөрәҗәгать итәчәк. Үз теләге белән хезмәт иткән кардәшләр сыйфатлы беренче ярдәм күрсәтәчәкләр. Кирәк булса, ашыгыч ярдәмне чакыртачаклар. Шулай эшләп, без беренче ярдәмгә кечкенә очраклар буенча шалтыратмаячакбыз.
◼ Аяк киеме. Һәр ел аяк киеме аркасында күп кешеләр җәрәхәтләнә. Баскычтан, рәшәткәле идәннән һәм башка урыннардан йөрерлек пөхтә, таман гына аяк киемен кию яхшырак булыр.
◼ Программаны яздыру. Бернинди яздыру техникасын бинаның электр яки тавыш көчәйтү аппаратурасына тоташтырырга ярамый. Андый техниканы башкаларга комачауламаслык итеп кулланырга кирәк.
◼ Балалар коляскалары һәм җыелмалы урындыклар. Балалар коляскалары һәм җыелмалы урындыкларны конгресска алып килергә ярамый. Әмма ата-аналар үзләренең янындагы урынга балалар урындыгын беркетеп куя ала.
◼ Парфюмерия. Хәзерге вакытта күп конгресслар ясалма вентиляцияле ябык биналарда үткәрелә. Сулыш органнары авыруы яки башка авырулар булган кешеләрнең сәламәтлегенә зыян китерә ала торган каты исле парфюмерияне әзрәк куллансак, без башкаларга ярату күрсәтәчәкбез (1 Көр. 10:24).
◼ «Бу кешегә килеп китче» дигән бланк. Конгресс вакытында очраклы вәгазьләгәндә безгә һәрбер кызыксынган кеше турында S-43 «Бу кешегә килеп китче» дигән бланкны тутырырга кирәк. Конгресска барганда һәрбер вәгазьче үзе белән бер-ике шундый бланк алырга тиеш. Тутырган бланкларны басмалар бүлегенә яки кайткач җыелыш сәркатибенә биреп була. («Безнең патшалык хезмәтебез», 2009 ел, ноябрь ае, 4 нче битне кара.)
◼ Рестораннар. Ресторанда булып үзеңнең яхшы тәртибең белән Йәһвә исемен данла.
◼ Кунакханәләр. 1) Сезгә күпме кирәк, шулкадәр генә бүлмәләрне броньга калдырыгыз, бүлмәдә тукталучы кеше санын кунакханә билгели, шул саннан күбрәк кеше булмасын; 2) Сез броньга калдырган бүлмәне кулланырга кире уйласагыз, моның турында шунда ук хәбәр итегез; 3) Багаж йөртер өчен җайланманы, сезгә кирәк булса гына, кулланыгыз, аннан соң, башкалар куллана алсын өчен, аны тиз арада кире кайтарыгыз. 4) Бүлмәгездә ризык хәзерләргә рөхсәт ителмәсә — хәзерләмәгез; 5) Кунакханәдә ашар өчен бирелгән түләүсез ризыкны, мәсәлән иртәнге аш, кофе яки туңдырылган ризыкларны, тиешеннән күбрәк алмагыз. 6) Кунакханә эшчеләре белән аралашканда һәрвакыт изге рух җимешен күрсәтегез. Алар күп кунаклар турында кайгырта, шуңа күрә безнең игелекле, түземле һәм әдәпле булуыбыз өчен рәхмәтле; 7) «Тәкъдим ителгән тору урыннары исемлеге»ндә бүлмә өчен бер көн бәясе китерелә. Сездән күбрәк алсалар яисә сез сорамаган яки кулланмаган әйберләр өчен түләргә кушсалар, түләмәгез һәм моның турында тизрәк конгрессның фатирлар бүлегенә хәбәр итегез; 8) Бүлмәгез белән берәр проблема туса, моның турында ярдәм сорап конгрессның фатирлар бүлегенә әйтегез.
◼ Ирекле хезмәтчеләр бүлеге. Без ирекле хезмәтчеләр булып кирәкле эшләрне башкарырга ярдәм итсәк, конгресста булу безгә күбрәк бәхет китерәчәк (Рәс. 20:35). Катнашырга теләгән һәрбер кеше конгрессның ирекле хезмәтчеләр бүлегенә язылырга тиеш. 16 яшь тулмаган балалар да әтинең, әнинең яки опекунның яисә алар хуплаган берәр олы кешенең күзәтүе астында шул эштә бик яхшы катнаша ала.