Agusto

Wetegereze ensonga ibiri enkuru eziri omu kyahandiikirwe kinu: (1) Abantu abahikiriire bahikwaho ebizibu. (2) Yahwe atujuna omu bizibu byaitu. Eki akikora ata? Omulingo gumu ogw’akikoramu nugwo ogw’okutukonyera kuba n’entekereza ey’ehikire ha bwomeezi omu nsi enu. N’obukiraaba ngu Yahwe n’aturaganiza ngu nitwija kutunga okusemererwa omu kumuheereza, taturaganiize obwomeezi obutarumu bizibu hati. (Is. 66:14) Natutererra kuteeka omutima h’akasumi ak’omu maiso nambere tuliba n’obwomeezi oburungi obwarukugonza twegondezeemu ebiro n’ebiro. (2 Kol. 4:​16-18) Baitu kasumi kanu atukonyera kugumira ebizibu byaitu. (Emp. 3:​22-24) Kiki ekitusobora kwegera ha byokurorraho by’abaheereza ba Yahwe abesigwa ab’omu Baibuli n’ab’omu kasumi kanu? Nitusobora kuhikwaho ebizibu ebitubaire tutarukunihira. Baitu obutwesiga Yahwe kutukonyera, taliremwa kuturolerra.—Zab. 55:22. w23.04 14-15 ¶3-4

Nitusobora kwegera ha kyokurorraho kya Yusufu na Malyamu, abaali betekaniize kworobera ab’obusobozi n’obukiraaba ngu kyali kigumire kukikora. (Luk. 2:​1-6) Enda ya Malyamu obw’ekaba ehikize nk’ameezi mwenda, ab’obusobozi bakateekaho ekiragiro ekyali kitanguhire. Augusito, ow’akaba n’alema Rooma akateekaho ekiragiro eky’okubara abantu. Kyali nikyetaagisa Yusufu na Malyamu kugenda Beterehemu, orugendo orukwingana kilomita 150 kandi orurumu obusozi. Orugendo oru rukaba rutanguhire kukira muno hali Malyamu. Nibasobora kuba baayeralikiriire habw’omwana ow’akaba atakazairwe, na nyina. Baakukozere ki kakuba Malyamu akwatwa kuzaara bali omu rugendo? Akaba aine enda y’ogu ayakufookere Masiya omu kasumi ak’omumaiso. Eki kyakubaletiire kutorobera ekiragiro ekitairweho ab’obusobozi? N’obukiraaba ngu Yusufu na Malyamu baali beralikiriire, bakorobera ekiragiro eki. Yahwe akabaha emigisa habwokuba bahulizi. Malyamu akahika kurungi Beterehemu, yazaara kurungi, kandi kyahikiiriza n’obunabbi bwa Baibuli.—Mik. 5:2. w23.10 8 ¶9; 9 ¶11-12

Kiki eky’osobora kukora obworaaba n’otiina kugarukamu omu nsorokano? Nikisobora kukugasira kakuba oteekaniza kurungi. (Nfu. 21:5) Obworayeyongera kumanya ebiri omu kicweka eki, nikiija kukwanguhira kugarukamu. Ekindi, eby’okugarukamu byawe bibe bigufu. (Nfu. 15:23; 17:27) Eky’okugarukamu ekigufu tikirukweraliikiriza muno. Obwohayo eky’okugarukamu ekigufu omu bigambo byawe, kyoleka ngu otekaniize kurungi kandi oyetegeriize kurungi ebirukubazibwaho omu kicweka eki. Kiki eky’osemeriire kukora kakuba olengaho kuteeka amagezi ganu omu nkora, baitu okaikara n’otiina emirundi erukuhingura omu gumu? Kigumye ngu Yahwe naija kusiima amaani ag’orateekamu kukora kyona eky’orukusobora kugarukamu. (Luk. 21:​1-4) Yahwe tatusaba kukora ekitutarukusobora. (Baf. 4:5) Manya eky’osobora kukora, wetereho ekigendererwa kukikora, kandi hanyuma osabe Yahwe akuhe omutima ogutekaine. Ha kubanza n’osobora kweteraho ekigendererwa eky’okuhayo eky’okugarukamu kimu ekigufu. w23.04 21 ¶6-8

Omukwenda Paulo akatulengesaniza n’abaserikale abajwaire ebyokujwara byabo betekaniize kurwana. Omuserikale aikara ayetekaniize kurwana kakuba habaho obulemu. Nikyo kimu naitwe. Twikara twetekaniriize ekiro kya Yahwe obutujwara ekya ha kifuba eky’okwikiriza n’okugonza hamu n’enkofiira ey’okunihira. Ekya ha kifuba, kyalindaga omutima gw’omuserikale. Okwikiriza n’okugonza birinda omutima gwaitu. Bitukonyera kwikara nituheereza Yahwe n’okuhondera Yesu. Okwikiriza kutukonyera kukigumiza kimu ngu Yahwe naija kutuha empeera obuturaikara nitumuheereza n’omutima gwaitu gwona. (Baheb. 11:6) Nikwija kutwekambisa kwikara tuli besigwa hali Omwebembezi waitu Yesu, n’obuturatunga ebizibu. Nitusobora kugumya okwikiriza kwaitu kuraba omu kwekebiija ebyokurorraho eby’abaheereza ba Yahwe ab’omu kasumi kanu abaikaire bali besigwa n’obukiraaba ngu nibahiiganizibwa rundi baine ebizibu omu byentahya. Kandi nitusobora kwetantara kugwa omu mutego gw’okugonza itungo kuraba omu kuhondera ekyokurorraho kyabo aborobyamu obwomeezi bwabo nukwo bebembeze Obukama. w23.06 10 ¶8-9

Okwetanga kutukonyera kulema enyehurra n’ebikorwa byaitu. Nitukwetaaga kusobora kuhika ha bigendererwa byaitu, kukira muno obukiba kigumire, rundi tutarukugonza kukikora. Ijuka ngu okwetanga guli gumu ha miringo ey’eretwa omwoyo ogurukwera. Nahabweki saba Yahwe omwoyo ogurukwera gukukonyere kweyongera kukurakuraniza okwetanga. (Luk. 11:13; Bag. 5:​22, 23) Otalinda obwire obuhikire. Omu nsi enu, tikyanguhire kutunga obwire obuhikire obwokukora ebintu ebiturukugonza. Kakuba tulinda obwire obu, nitusobora kutahika ha kigendererwa kyaitu. Nitusobora kuhwa amaani obututekereza ngu ekigendererwa kyaitu kigumire kukihikaho. Obworaaba nukwo orukwehurra, n’osobora kutandika n’ohikiiriza ebigendererwa ebyanguhire. Obworaaba n’ogonza kukurakuraniza omulingo ogw’Ekikristaayo, n’osobora kutandika nogwoleka mporampora. Ekigendererwa kyawe obukiraaba ky’okusoma Baibuli yoona, n’osobora kutandika n’osomaho kake. w23.05 29 ¶11-13

Omu biro binu ebya ha mpero, Yahwe nakozesa ekitebe kye kutuha ebyokulya eby’omwoyo ebitukonyera kwikara nitugendera omu ‘Muhanda Ogurukwera.’ (Is. 35:8; 48:17; 60:17) Nitusobora kugamba ngu buli murundi omuntu aikiriza kwegesebwa Baibuli aba atungire omugisa ogwokutandika kurubatira omu ‘Muhanda Ogurukwera.’ Abamu bagugenderamu habw’akacu kake kandi hanyuma bagurugamu. Kandi abandi bacweramu kimu kwikara nibagugenderamu kuhikira kimu nambere barukugenda. Omuhanda gunu, nigugenda nkaha? Abo abaine okunihira okwokugenda omu iguru, “Omuhanda Ogurukwera” nigubatwara omu rugonjo rwa Ruhanga omu iguru. (Kus. 2:​7, NWT) Abo abaine okunihira kw’okwikara omu nsi omuhanda gunu nigubahikya hakumalirra kw’emyaka 1,000 ey’obulemi bwa Yesu nambere buli omu alifooka ahikiriire. Nahabweki, obworaaba n’orubatira omu muhanda gunu hati, otarora enyuma kandi otagurugamu kuhikya ohikire nambere orukugenda. Nitukugondeza “orugendo orurungi.” w23.05 17 ¶15; 19 ¶16-18

Kakuba otekerezaaho ebintu byona Yahwe ebi akukoliire, nikiija kukwekambisa kugonza kuhayo obwomeezi bwawe hali uwe. (Zab. 116:​12-14) Baibuli egamba ngu Yahwe Ruhanga nuwe atuha “ekisembo kyona ekirungi nekisembo kyona ekihikiriire.” (Yak. 1:17) Omu bisembo byona, ekisembo ekirukukirayo Yahwe eki yatuhaire nikyo eky’Omwana we Yesu Kristo. Kitekerezeeho! Ekicunguro kikusobozeseze kuba n’enkoragana enungi na Yahwe. Kandi oine okunihira kw’okwomeera ebiro n’ebiro. (1 Yoh. 4:​9, 10) Obu oyehayo hali Yahwe, oba noyoleka ngu n’osiima habw’ebisembo binu n’emigisa endi ey’akuhaire.—Bir. 16:17; 2 Kol. 5:15. w24.03 5 ¶8

Obuturora engeso embi eziijwire omu nsi, naitwe twehurra nka Loti. Akaba “natuntura obwengeso ezobusihani ezababi,” habwokuba akaba akimanyire ngu Isiitwe ow’omu iguru azinoba. (2 Pet. 2:​7, 8) Habwokuba Loti akaba n’agonza muno Yahwe kandi namutiina, akangira kimu engeso ez’abantu abaali bamwetoroire. Naitwe twetoroirwe abantu abatarukworobera endengo za Yahwe ezirukukwata ha ngeso. Baitu nabwo nitusobora kwikara tuli becumi omu ngeso kakuba twikara nitugonza Ruhanga kandi nitumutiina. Yahwe atukonyera kwega kumutiina n’akozesa ekitabu ky’Enfumo. Abakristaayo itwena, abasaija n’abakazi, abato n’abakuru, obuhabuzi obuli omu kitabu kinu nibusobora kutugasira. Obuturaaba nitutiina Yahwe nitwija kwetantara kunywana abantu abarukukora ebintu ebyanoba. w23.06 20 ¶1-2; 21 ¶5

Obundi abanyabuzaale baawe nibakuhiiganiza, rundi oine eki oyefeeriize kusobora kwebembeza Obukama. (Mat. 6:33) Obu kiraaba nukwo kiri, kigumye ngu Yahwe naarora byona ebi orukumukorra. (Baheb. 6:10) Kandi n’osobora kuba orozere ebigambo bya Yesu binu nibihikirra: “Busaho muntu asigire enju, rundi bene babu, rundi banyanya, rundi nyina, rundi ise, rundi abana, rundi obutaka, habwange na habwenjiri, baitu alihebwa emirundi kikumi omu biro binu ebya hati, enju, na bene babu, na banyanya, nabanyina, nabana, nobutaka, hamu nokuhigwa; kandi omubusinge oburukugenda kuija, obwomezi obutahwaho.” (Mar. 10:​29, 30) Emigisa ei oratunga n’ekirra hara ebintu byona ebi oyeferiize.—Zab. 37:4. w24.03 9 ¶5

Abakristaayo omu Buyudaaya obubaahikirweho enjara ey’amaani, ab’oruganda omu kitebe kya Antyokiya bakakora “nkokubasoboire omuomu, bakacwa amagezi okutwekera ebyokugaba bene babu abakaba baikaire Buyudaya.” (Ebik. 11:​27-30) N’obukiraaba ngu Abakristaayo abaahikirweho enjara baali nibaikara hara, Abakristaayo omu Antyokiya bakabakonyera. (1 Yoh. 3:​17, 18) Naitwe nitusobora kwoleka embabazi obutukimanya ngu Abakristaayo bagenzi baitu bahikirweho ekigwererezi. Twanguha kubakonyera kuraba omu kukaguza abagurusi emiringo tusobora kukonyeramu, kuhayo kusagika omulimo ogw’ensi yoona, rundi kusabira abahikirweho ebigwererezi. Ab’oruganda n’abanyaanya itwe nibasobora kwetaaga obukonyezi kutunga ebintu ebibarukwetaaga. Omukama waitu Yesu Kristo obwaraija kucwera abantu omusango, nitugonza atusange nitwoleka embabazi kandi aturaalize ‘kugwetwa Obukama.’—Mat. 25:​34-40. w23.07 4 ¶9-10; 6 ¶12

Yesu akegera ha kyokurorraho kya Yahwe eky’okwetegereza. Akasindikwa omu nsi kutebeza “entama ezabuzire ezomu nju ya Isareri.” Baitu omu buheereza bwe akooleka okwetegereza. Ekyokurorraho, omukazi ow’akaba atali Omunyaisaleri akamwesengereza kukiza muhara we ow’akaba “akwasirwe muno [daimoni].” Yesu akamwoleka embabazi yakiza muhara we. (Mat. 15:​21-28) Tekerezaaho ekyokurorraho ekindi. Yesu obw’akaba akyatandikire obuheereza bwe, akagamba ati: “Wena alinyehakana . . . , ndimwehakana.” (Mat. 10:33) Baitu akehakana Petero ayamwehakaine emirundi esatu? Nangwa. Yesu akakimanya ngu Petero ayegarukiremu kandi ngu mwesigwa. Hanyuma ya Yesu kuhumbuuka, akabonekera Petero kandi aine kuba yamugumize ngu amuganyiire kandi namugonza. (Luk. 24:​33, 34) Yahwe na Yesu booleka okwetegereza. Naitwe, Yahwe natunihirramu kuba bantu abarukwoleka okwetegereza. w23.07 21 ¶6-7

Nitusobora tuta kukonyera abandi abarukugurukyagurukya ngu omurago gwa Yahwe ogw’ensi empyaka gulihikirra? Ensonga ey’okubanza, Yahwe wenyini nuwe aturaganiize. Omu kitabu eky’Okusuku’rwa nihagamba hati: “Nogu akaba aikaliire ha kitebe kyobukama yagamba ati Dora, ninfora byona ebihyaka.” Yahwe aine amagezi n’amaani kandi nagonza kuhikiiriza omurago gunu. Eyakabiri, Yahwe akigumiza kimu ngu omurago gunu nigwija kuhikirra kandi niyo ensonga habwaki agubazaaho nk’ogumazire kuhikirra. N’agamba ati: “Ebigambo binu byokwesiga, byamazima. . . . [bihikiriziibwe].” Eyakasatu, ebigambo: “Ninyowe Alufa na Omega,” byoleka ngu Yahwe obwatandikaho ekintu akimaliiriza. (Kus. 21:6) Yahwe alyoleka ngu Sitaani mubiihi w’ebisuba kandi ngu tasobora kumulemesa kuhikiiriza ekigendererwa kye. Nahabweki, kakuba omuntu agamba ngu “ omurago gwa Yahwe tigusobora kuhikirra,” n’osobora kumusomera orukarra orwa 5 na 6 kandi ozisoborre. N’osobora kumwoleka omulingo Yahwe akigumize ngu omurago gunu nigwija kuhikirra nasisana nk’owataire ekinkumu ha ndagaano.—Is. 65:16. w23.11 7 ¶18-19

Iburahimu obwaka aine emyaka 75 kandi ataine mwana, Yahwe nubwo yamugambiire ebigambo ebi. Iburahimu akarora omurago gunu niguhikirra omu bwijwire? Nangwa. Hanyuma y’okwambuka ekyambu Furati n’okulinda kumara emyaka 25, akarora ekyamahano obuyazaire Isaka kandi hanyuma y’emyaka 60, abaijukuru be babiri Esau na Yakobo bakazaarwa. (Baheb. 6:15) Baitu Iburahimu atarole abaijukuru be nibafooka ihanga erikooto kandi nibagwetwa Ensi ey’Ekaba Eraganiziibwe. Omusaija onu omwesigwa akaba aine enkoragana enungi na Ruhanga we. (Yak. 2:23) Kandi Iburahimu obwalihumbuuka, naija kusemererwa kukimanya ngu okwikiriza n’okugumiisiriza kwe bikarugirramu abantu abandi emigisa! (Kub. 22:18) Kiki ekiturukwega? Naitwe nitusobora kutarora byona Yahwe ebyaturaganiize nibihikirra kasumi kanu. Baitu kakuba tugumiisiriza nka Iburahimu, nitusobora kukigumya ngu Yahwe naija kutuha emigisa kasumi kanu n’omu nsi empyaka.—Mar. 10:​29, 30. w23.08 24 ¶14

Omukama Uziya akaba ali mwebundaazi obwakaba akyali muto. “Akekamba okuserra Ruhanga.” Omu myaka 68 eyiyamazire, emyaka erukukira obwingi Yahwe akamuha emigisa. (2 Byom. 26:​1-4) Uziya akasingura amahanga maingi ag’abanyanzigwa kandi yagumya eby’okwerinda bya Yerusalemu. (2 Byom. 26:​6-15) Ebi byona Ruhanga ebiyamukoliire bikamuleetera kusemererwa. (Mug. 3:​12, 13) Omukama Uziya akaba amanyiriire kugambira abandi eby’okukora. Obundi kinu kikamuleetera kutekereza ngu akaba n’asobora kukora kyona ekyarukugonza. Kiro kimu, Uziya akataaha omu yekaru ya Yahwe yayetumiisiriza kwoterra emyamirro, ekintu abakama bakaba batarukwikirizibwa kukora. (2 Byom. 26:​16-18) Nyakatagara Omukuru Azaliya akalengaho kumuhabura baitu Uziya akabiihirwa muno. Eky’obusaasi, Uziya ataikale ali mwesigwa hali Yahwe, kandi akamufubira yateerwa ebigenge. (2 Byom. 26:​19-21) Mali obwomeezi bwe bwakubaire bwembaganiza kakuba yaikaire ali mwebundaazi! w23.09 10 ¶9-10

Na hanyuma y’okufooka Omukristaayo ow’aseserweho amagita, Petero akagumizaamu narwanisa obuceke bwe. Omu mwaka 36 Y.A.K., Petero akaba aroho Koruneryo ow’akaba atali Muyudaaya obuyaseserweho omwoyo ogurukwera, ekyayolekere ngu “Ruhanga tasorora” kandi ngu abantu abakaba batali Bayudaaya baali nibasobora kuba omu kitebe Ekikristaayo. (Ebik. 10:​34, 44, 45) Hanyuma, Petero akatandika kulya n’abanyamahanga ekintu ekyakaba atasobora kukora omu bwire bw’enyuma. Bamu h’Abakristaayo Abayudaaya baatekerezaaga ngu tibasemeriire kulya n’Abakristaayo abanyamahanga. Bamu h’Abakristaayo abaali baine entekereza enu obubaizire omu Antyokiya, Petero akaleka kulya n’Abakristaayo abanyamahanga. Kinu n’asobora kuba yakikozere kutabiihiza Abakristaayo Abayudaaya. Omukwenda Paulo akarora obugobya bunu kandi akamuhana omu maiso g’abantu baingi. (Bag. 2:​13, 14) N’obukiraaba ngu akagarukirra, Petero atahwemu amaani. w23.09 22 ¶8

N’osobora kuba nokirora ngu haroho nambere osemeriire kusemezaamu. Obukiraaba nukwo kiri, otahwamu amaani. “Mukama waitu okwali wembabazi,” naija kukukonyera kusemezaamu. Omukwenda Petero naturaganiza ati: “Ruhanga . . . nuwe alibahikiriza, alibagumya.” (1 Pet. 5:10) Haroho Petero obuyayehuliire ngu tasemeriire kuba omu maiso g’Omwana wa Ruhanga. (Luk. 5:8) Baitu habw’obukonyezi bwa Yahwe na Yesu, akaikara ali muhondezi wa Kristo. Ekyarugiremu, Petero akaikiri zibwa “okutaha omu Bukama obwebiro nebiro obwa Mukama waitu kandi Omujuni waitu Yesu Kristo.” (2 Pet. 1:11) Mali eki kisembo kirungi! Nka Petero, obworagumizaamu n’oheereza Yahwe n’obwesigwa, kandi okaikara n’oyorobera ebiragiro bye, noija kutunga ekisembo ky’obwomeezi obutahwaho. Kandi oliheebwa “empero eyokuikiriza [kwawe], nukwo kujunwa.”—1 Pet. 1:9. w23.09 31 ¶16-17

Eheema eyokutangatanganiramu ekaba ine ezigati enkooto ey’ekaba eyetoroire orugo nambere banyakatagara baakorraga emirimo yabo. Omu zigati enu hakaba harumu ekyoto ekikooto eky’omulinga nambere baayokezaaga ebihongwa, hamu n’orwoho rundi ebbeeseni enkooto ey’omulinga, ey’ekaba erumu amaizi nambere banyakatagara banaabiraga batakatandikire kukora emirimo erukwera. (Kurug. 30:​17-20; 40:​6-8) Kasumi kanu abaseserweho amagita obubaba batakagenzere omu iguru kuheereza nk’abanyakatagara hamu na Yesu, n’obwesigwa baheereza omu zigati ey’omunda eya yekaru ey’eby’omwoyo hanu omu nsi. Ebbeeseni enkooto ey’erumu amaizi ey’ekaba eri ha heema na ha yekaru ebaijukya ngu, kusisanaho n’Abakristaayo abandi boona, nabo basemeriire kwikara bali becumi omu ngeso n’omu by’omwoyo. Hati, ab’ekitebe ekingi ubo baramiza nkaha? Omukwenda Yohana akabarora bemeriire “omu maiso gekitebe kyobukama” kandi kinu nikimanyisa ngu, hanu omu nsi bali omu zigati ey’aheeru, ‘nibakorra Ruhanga omu yekaru ye nyamusana n’ekiro.’ (Kus. 7:​9, 13-15) Mali nitusiima muno Yahwe habw’okutuha omugisa ogw’okumuramya omu yekaru ye ey’eby’omwoyo! w23.10 28-29 ¶15-16

Omulingo ogundi Yahwe ogw’atuha amaani nukwo kuraba omu bagurusi b’ekitebe. (Is. 32:​1, 2) Nahabweki, obworukuba oyetuntwire, bagambire ebirukukweraliikiriza. Obubaragonza kukukonyera, ikiriza obukonyezi bwabo. Yahwe n’asobora kukuha amaani kuraba omu bagurusi. Emirago ey’omu Baibuli ey’etuha okunihira okw’okwomeera omu nsi ebiro n’ebiro rundi kugenda omu iguru, n’esobora kutugarramu amaani. (Bar. 4:​3, 18, 19) Okunihira kutukonyera kugumira ebizibu, kutebeza amakuru amarungi, n’okuhikiiriza obujunanizibwa obutwine omu kitebe. (1 Bas. 1:3) Omukwenda Paulo akagarurwamu amaani habw’okunihira. Akaba “agosirwe embaju zona,” ‘ayetuntwire,’ ‘nahiigwa,’ kandi ‘anagirwe hansi.’ Obwire obumu obwomeezi bwe bwabaga omu kabi. (2 Kol. 4:​8-10) Paulo akatunga amaani ag’okugumira ebizibu binu habwokuba akateeka omutima ha kunihira kwe. (2 Kol. 4:​16-18) Paulo akateeka omutima ha busumi bwe obw’omumaiso. Okunihira okwakaba aine okw’okutunga obwomeezi obutahwaho omu iguru kukaba ‘kw’ekitiinisa kingi,’ kukira emihito yoona ey’akaba narabamu. Obuyayecumiitirizaahoga okunihira oku akeyongera ‘kugarurwa buhyaka bukyabukya.’ w23.10 15-16 ¶14-17

Obwosaba, tekerezaaho obukaraaba nuko kasumi akahikire Yahwe kugarukamu esaara yaawe. Nitusobora kugonza esaara zaitu zigarukwemu ahonaaho. Baitu Yahwe amanyire akasumi akahikire ak’okugarukamu esaara zaitu. (Baheb. 4:16) Obututatunga ekitusabire ahonaaho, nitusobora kutekereza ngu Yahwe ayangire kutuha ‘ekitumusabire.’ Baitu obwire obumu nikisobora kuba ngu obwire obw’okukituha ‘tubukahikire.’ Ekyokurorraho, tekerezaaho ow’oruganda ayasabire kukizibwa oburwaire. Baitu eki kitabeho. Kakuba Yahwe yamukirize omu mulingo ogw’ekyamahano, Sitaani yakugambire ngu ow’oruganda onu agumizeemu naheereza Yahwe habwokuba amukirize. (Yob. 1:​9-11; 2:4) Ekindi, Yahwe ataireho akasumi nambere alimarraho kimu endwaire zoona. (Is. 33:24; Kus. 21:​3, 4) Kuhikya akasumi ako obukalihika, titurukunihira Yahwe kutukiza omu mulingo ogw’ekyamahano. Nahabweki ow’oruganda onu yakusabire Yahwe kumuha amaani n’obusinge omu bitekerezo kusobora kugumira oburwaire bwe, n’okugumizaamu namuheereza n’obwesigwa. w23.11 23-24 ¶13

N’obukiraaba ngu Samusoni akaba akozere ensobi y’amaani, ataleke kuheereza Yahwe. Akaserra omugisa kusobora kuhikiiriza obujunanizibwa Ruhanga obwakaba amuhaire. (Bac. 16:​28-30) Samusoni akasaba Yahwe ati: “Nkwesengeriize, ompe amani . . . nukwo mpole enzigu ahonaho ha Bafirisiti.” Ruhanga akagarukamu okusaba kwe kandi yamugarurra amaani ge. Ekyarugiremu, Samusoni akaita Abafirisiti baingi ha kiro eki kukira abaakaba aisire obwomeezi bwe bwona. N’obukiraaba ngu Samusoni akatunga ebizibu habw’encwamu eiyakozere, ataleke kuheereza Yahwe. Naitwe titusemeriire kuleka kuheereza Yahwe n’obutukora ensobi ekaturugirramu kwihwaho obujunanizibwa rundi kuhanwa. Ijuka ngu, Yahwe aikara ayetekaniize kutuganyira. (Zab. 103:​8, 9) Nk’oku Yahwe yaikaire nakozesa Samusoni, naitwe n’asobora kwikara natukozesa n’obutukora ensobi. w23.09 6 ¶15-16

Obutugumiisiriza tusemeza Yahwe. Baitu eki tikirukumanyisa ngu Yahwe asemererwa obwarora noraba omu bizibu. Oihireho nasiima amaani orukutamu iwe nk’omuntu. Nahabweki obw’ogumiisiriza kimuleetera okusemererwa. Mali ogu mugisa gw’amaani! (Zab. 5:12) Ijuka ngu Iburahimu akagumiisiriza obuyatungire ebizibu kandi akasiimwa Yahwe. Yahwe akamurora nka munywani we kandi nk’omuntu ow’ahikiriire. (Kub. 15:6; Bar. 4:​13, 22) Naitwe nukwo n’asobora kuturora ati. Ruhanga tatusiima nasigikirra ha mirimo eitukora omu kumuheereza n’obujunanizibwa obutwine, baitu asigikirra ha kugumiisiriza n’obwesigwa bwaitu. Itwena nitusobora kugumiisiriza katube tuli bato rundi bakuru, twine busobozi bwa mulingo ki, rundi nituraba omu nyikara ya mulingo ki. Oine ekizibu eky’oliyo n’ogumiisiriza? Obukiraaba nukwo kiri, ijuka ngu nosiimwa Ruhanga. Eki nikiija kukukonyera kweyongera kugumya okunihira kwawe. w23.12 11 ¶13-14

Omusaija Omukristaayo asemeriire kwega kubaza kurungi n’abantu abandi. Omusaija ow’abaza kurungi n’abandi ahuliiriza kandi afaaho ebitekerezo n’enyehurra zaabo. (Nfu. 20:5) Ayega kumanya omulingo abantu abandi barukwehurra kuraba omu kwetegereza omulingo barukubaza, n’omulingo barukuzooka h’amaiso. Eki noija kusobora kukikora kakuba omara obwire n’abantu. Kakuba oikara nokozesa ebyoma bya kalimagezi kubaza n’okusindika obutumwa, nikisobora kutakwanguhira kwega kubaza n’abantu maiso h’amaiso. Nahabweki lengaho kutunga omugisa gw’okubaza n’abantu maiso h’amaiso. (2 Yoh. 12) Ow’oruganda ow’akuzire omu by’omwoyo asemeriire kwerolerra kandi ahikyeho ab’omu ka ye ebyetaago. (1 Tim. 5:8) Kirungi kwega ekintu ekirakukonyera kutunga omulimo. (Ebik. 18:​2, 3; 20:34; Bef. 4:28) Ba muntu omwekambi, ow’akora emirimo omu bwire kandi akagimaliiriza. Eki nikiija kukukonyera kutunga omulimo kandi okagumizaamu n’ogukora. w23.12 27 ¶12-13

Baibuli obwebazaaho “ekiro kya Yahwe” eba n’emanyisa akasumi Yahwe obw’alicwera abanyanzigwa be omusango kandi ajune abantu be. Omu busumi obwakara Yahwe akacwera abantu omusango. (Is. 13:​1, 6; Ez. 13:5; Zef. 1:8) Omu kasumi kanu, “ekiro kya Yahwe” kiritandika n’okutahirra Baburoni Orukuru kandi kimalirre n’obulemu bwa Haramagedoni. Kusobora kukiraho ha kiro eki, tusemeriire kwetekaniza hati. Yesu atagarukire ha kugamba ngu tusemeriire kwetekaniriza “omuhito omwingi” baitu akagamba ngu ‘twikale twetekaniize. (Mat. 24:21; Luk. 12:40) Omu bbaruha ye ey’okubanza hali Abasesalonika, omukwenda Paulo akakozesa ebyokurorraho ebyakukonyiire Abakristaayo kwikara betekaniriize ekiro kya Yahwe ekikuru eky’omusango. Paulo akaba akimanyire ngu ekiro eki kikaba kitali ky’okwija omu kasumi ako. (2 Bas. 2:​1-3) Baitu nabwo akatererra Abakristaayo kwikara bakyetekaniriize nk’ekiraija nyenkya. Kandi naitwe nikyo tusemeriire kukora. w23.06 8 ¶1-2

Omu mwaka ogwa 1978 ekyombeko ekiraihire muno kikombekwa omu Tokyo, Japan. Abaakiroraga bakekaguza omulingo kyakwikaire kigumire kandi kunu orubuga oru rukira kuteerwa emisisa. Abombeki bakakora ki kurora ekyombeko kinu kyagumira emisisa? Bakakyombeka kisigikire baitu nikisobora n’okwegema kakuba haija omusisa. Abakristaayo bali nk’ekyombeko eki ekiraihire muno. Omu mulingo ki? Omukristaayo asemeriire kwikara agumire baitu ha murundi nugwo gumu ayetekaniize kuhinduramu. Asemeriire kwikara acweriiremu kimu kworobera ebiragiro bya Yahwe n’endengo ze. Asemeriire kwikara ‘ayetekaniize kworobera’ Yahwe, kandi ‘ahindahinduramu,’ nambere kirukwetaagisa. (Yak. 3:​17, NWT) Omukristaayo ayegere kwetwaza omu mulingo gunu tarukwija kulemera ha nsonga rundi kuba muntu atarukufaayo. w23.07 14 ¶1-2

Yesu akaba aine kwangirra ebyohyo kuruga hali Sitaani, ayamwoheze nukwo aleke kuba mwesigwa hali Ruhanga. (Mat. 4:​1-11) Sitaani akaba n’agonza kuleetera Yesu kujeemera Yahwe nukwo amulemese kuhayo ekicunguro. Omu buheereza bwe omu nsi, Yesu akagumira ebirengo ebindi bingi. Abanyanzigwa be bakamuhiiganiza kandi baalengaho n’okumwita. (Luk. 4:​28, 29; 13:31) Akagumiisiriza n’obutahikirra bw’abahondezi be. (Mar. 9:​33, 34) Obubaamucweriire omusango, bakamubonabonesa kandi baamusekereza. Hanyuma, bakamwita omu mulingo gw’obusaasi kandi ogurukuswaza muno. (Baheb. 12:​1-3) Ekirengo kye eky’okumalirra akakigumiisiriza habwe wenka ataine bulinzi bwa Yahwe. (Mat. 27:46) Amananu gali, ekicunguro kiketaagisa Yesu kwefeereza muno. Obutwecumiitirizaaho okubonabona kwona Yesu okuyarabiremu habwaitu, tweyongera kumugonza. w24.01 10-11 ¶7-9

Okugumiisiriza kutukonyera obutuba nitukoragana n’abandi. Kutuleetera kuhuliiriza kurungi abandi obubaba nibabaza. (Yak. 1:19) Ekindi, kutukonyera kukurakuraniza obusinge. Kutusobozesa kwetantara kubaza rundi kukora ekintu ekitali ky’embabazi obutuba twetuntwire. Ekindi, nikwija kutukonyera kutabiihirwa bwangu abandi obubatukora kubi. Omu kiikaro ky’okuhoora enzigu, nitwija kugumizaamu ‘nituganyirangana. (Bak. 3:​12, 13) Okugumiisiriza nikusobora kutukonyera kukora encwamu enungi. Omu kiikaro ky’okwanguhiriza rundi kucwamu nk’okutwakugondeze, nitwija kutunga obwire tuseruliirize nukwo tumanye encwamu erukukirayo oburungi. Ekyokurorraho, kakuba tuba nituserra omulimo nikisobora kutwanguhira kwikiriza gwona oguturatunga. Baitu obuturaaba tuli bantu abarukugumiisiriza, nitwija kutwara obwire kutekerezaaho omulingo omulimo ogu gurakwataho eka yaitu n’enkoragana yaitu na Yahwe. Kugumiisiriza nikusobora kutukonyera kwetantara kukora encwamu embi. w23.08 22 ¶8-9

Obu oraaba noyehurra ngu ohoirwemu amaani habw’okwikara n’orwanisa okwegomba okubi, kutekerezaaho okweraga oku wakozere hali Yahwe, nikiija kukwekambisa kugumizaamu n’orwanisa okwegomba okubi. Omu mulingo ki? Obu oyehayo hali Yahwe oyeyangisa wenka. Eki nikimanyisa ngu ocwamu kwangira kimu okwegomba okubi n’ebigendererwa ebitarukusemeza Yahwe. (Mat. 16:24) Nahabweki obu orayohebwa torukwija kumara obwire notekerezaaho eki orakora. Noija kuba omanyire eky’okukora, kandi eki nikiija kukukonyera kwikara oli mwesigwa hali Yahwe. Noija kwikara ocweriiremu kimu kusemeza Yahwe. Kandi noija kuba nka Yobu. Obu yatungire ebizibu eby’amaani akagamba ati: “Okuhikya okufa kwange tindyeyihaho okuhikirra kwange.”—Yob. 27:5. w24.03 9 ¶6-7

Yahwe, “Ruhanga owokugonza,” ali naitwe. (2 Kol. 13:11) Afaaho buli omu haliitwe. Kandi nitukigumya ngu okugonza kwe okutalekera kutwehinguliriza. (Zab. 32:10) Obutwecumiitirizaaho omulingo atwolekere okugonza, tweyongera kurora ngu natufaaho kandi tweyongera kumwirra haihi. Nitusobora kumusaba tutarukutiina, nitumugambira ngu nitwetaaga okugonza kwe. Nitusobora kumugambira byona ebirukutweralikiriza nitukigumya ngu naija kutwetegereza kandi ngu ayetekaniize kutukonyera. (Zab. 145:19) Nk’oku tugonza kwirra haihi n’omurro omu bwire obw’obufuki, tugonza kwirra haihi na Yahwe habw’okugonza okwingi okwatwoleka. Okugonza kwa Yahwe kw’amaani muno. Nahabweki, ikiriza Yahwe akukonyere. Leka itwena twoleke ngu nitumugonza obu nitugamba ngu ‘ningonza Yahwe’!—Zab. 116:1. w24.01 31 ¶19-20

Yesu atagarukire ha kugambira abantu ngu ibara lya Ruhanga nuwe Yahwe. Abayudaaya Yesu abaakaba nayegesa bakaba bamanyire ibara lya Ruhanga. Yesu akakonyera abantu kwetegereza Ise muntu wa mulingo ki. (Yoh. 1:​17, 18) Ekyokurorraho, Ebyahandiikirwe eby’Oruheburaniya byoleka ngu Yahwe w’embabazi, kandi asaalirirwa abandi. (Kurug. 34:​5-7) Eki Yesu akakyoleka kurungi omu ruganikyo orw’omwana ayazaahire. Omu ruganikyo oru, ise omwana onu “akaba akiri hara muno,” obuyarozere ngu mutabani we ayegarukiremu kwo, yairuka kumutangaana yamugwa omunda kandi yamuganyira kuruga ha mutima. Oruganikyo oru nirutukonyera kwetegereza ngu mali Yahwe w’embabazi kandi aganyira. (Luk. 15:​11-32) Yesu akakonyera abantu abandi kwetegereza Yahwe muntu wa mulingo ki. w24.02 10 ¶8-9

Yahwe aleetera abetuntwire kwehurra kurungi kandi bahuumwire. Nitusobora tuta kwegera ha kyokurorraho kya Yahwe eky’okusaliirirwa abandi n’okubahuumuza? Nitusobora kwekamba kuba bantu abarukuhuumuza abandi. Eki nitusobora kukikora tuta? (1 Bas. 4:18) Tusemeriire kubafaaho, tubagonze nk’ab’omu ka yaitu, kandi tubooleke embabazi. (Bak. 3:12; 1 Pet. 3:8) Habwaki eki kikuru? Obutusaliirirwa ab’oruganda, kandi tukabafaaho, nikiija kutwekambisa kubakonyera n’okubahuumuza obubarukuba nibaraba omu bizibu. Yesu akagamba ati: “Ebiijura omu mutima akanwa nibyo kagamba. Omuntu asemiire, aiha ebisemiire omu lyahurrolye erisemiire.” (Mat. 12:​34, 35) Kuhuumuza ab’oruganda n’abanyaanya itwe guli mulingo omukuru ogutuboolekamu ngu nitubagonza. w23.11 10 ¶10-11

Tusemeriire kusaba obukonyezi obuturaaba nitugonza kwetegereza obunabbi bwa Baibuli. Tekerezaaho ekyokurorraho kinu. Katugambe ngu ogenzere omu kicweka eky’otamanyire, baitu munywani waawe owoli nauwe akimanyire kurungi. Amanyire kurungi nambere muli kandi nambere buli muhanda gurukugenda. Hataroho kugurukyagurukya, kikusemeza muno habwokuba munywani waawe aikiriize kugenda naiwe! Omu mulingo nugwo gumu, Yahwe amanyire kurungi akasumi akaturumu n’ekiraabaho omu kasumi ak’omumaiso. Nahabweki kusobora kwetegereza obunabbi bwa Baibuli, tusemeriire kusaba Yahwe obukonyezi. (Dan. 2:28; 2 Pet. 1:​19, 20) Nk’omuzaire wena omurungi, Yahwe n’agonza abaana be babe n’obusumi obw’omumaiso oburungi. (Yer. 29:11) Baitu kwahukanaho n’omuzaire, Yahwe n’asobora kutugambira ebiraabaho omu kasumi ak’omumaiso kandi ebyatugambira bihikire. Akahandiikisa obunabbi obuli omu Baibuli nukwo tusobole kumanya ebintu ebikuru bitakabaireho.—Is. 46:10. w23.08 8-9 ¶3-4