Kasi Mphawuli Apo Ufumu wa Ciuta Wizirenge?
“FUMU, kasi yeneiyi ndiyo nyengo muti muwezgere ufumu ku Israyeli?” (Milimo 1:6) Ŵapositole ŵakaŵa ŵakukhumbisiska kumanya apo Yesu wazamukhazikiska Ufumu wake. Vilimika 2,000 kufuma pa nyengo iyo, ŵanthu mbakukhumbisiska kumanya zgoro la fumbo ili: Kasi mphawuli apo Ufumu wa Ciuta wizirenge?
Pakuti fundo yikuru ya upharazgi wa Yesu yikaŵa Ufumu, tingasimikizga kuti wakazgora fumbo ili. Ndimo wakacitira nadi. Kanandi waka Yesu wakayowoya nyengo ya kuŵapo kwake. (Mateyu 24:37) Kuŵapo kwake kukukolerana comene na kukhazikiskika kwa Ufumu wa Ciuta, uwo uzamuwusika na Mesiya. Kasi kuŵapo kwake kukung’anamuraci? Tiyeni tidumbiskane fundo zinayi za mu Baibolo izo zikuvumbura kuŵapo kwa Khristu.
1. Kuŵapo kwa Khristu kukeneranga kuzakamba munthazi pamanyuma pa nyifwa yake. Mu ntharika iyo Yesu wakayowoya, wakajiyelezgera na munthu uyo “wakaluta ku caru ca kutali kuya kajipokera Ufumu.” (Luka 19:12) Kasi ucimi wa mu ntharika iyi ukafiskika wuli? Nga ni umo vikaŵira, Yesu wakafwa ndipo pamanyuma pake wakawuskika. Iyo wakaluta “kucaru ca kutali,” kung’anamura kucanya. Nga ni umo wakayowoyera mu ntharika iyi, iyo wakaweraso mu nkhongono ya Ufumu yikati “yalutapo nyengo yitali.”—Mateyu 25:19.
Yesu wakati wakwera kucanya, mpositole Paulosi wakalemba kuti: “Mweneuyo, [Yesu] wakati wapeleka sembe yimoza pera ya zakwananga, wakakhala pasi muyirayira ku malyero gha Ciuta; kwamba penepapo wakulindilira mpaka ŵalwani ŵake ŵaŵikike citambaliro ca malundi ghake.” (Ŵahebere 10:12, 13) Yesu wakati wakwera kucanya wakalindizga kwa nyengo yitali. Pamanyuma pake, Yehova Ciuta wakimika Mwana wake kuŵa Fumu ya Ufumu wake. Kuŵapo kwa Khristu kukamba pa nyengo iyi. Kasi ŵanthu ŵakawona cakucitika cakukondweska ici?
2. Kuŵapo kwa Yesu nkhwambura kuwoneka ku ŵanthu. Mu Baibolo, Yesu wakalongosora cimanyikwiro ca kuŵapo kwake. (Mateyu 24:3) Usange kuŵapo kwake kuŵenge kwakuwoneka, kasi nthena cimanyikwiro cikakhumbikwiranga? Tiyelezgere kuti mukuluta kukawona nyanja. Mu msewu mukuwona vikhwangwani ivyo vikumulongozgerani uko kuli nyanja. Mwati mwafika ku nyanja, mukuwona maji ghanandi comene agho ghakuwoneka nga ghagota kucanya. Kasi mungakhumbikwira cimanyikwiro cakulembeka pa nyanja ca mazgu ghakuti: “nyanja ni iyi”? Ndimo vingaŵira yayi. Pangakhumbikwira cimanyikwiro cakumulongorani yayi, cifukwa cakuti nyanja mukuyiwona.
Yesu wakalongosora cimanyikwiro ca kuŵapo kwake. Wakayowoya cimanyikwiro ico ŵanthu ŵangacita kuciwona yayi, kweni wakazunura ivyo vingaŵawovwira kumanya ivyo vikeneranga kucitika kucanya. Ntheura Yesu wakati: “Ufumu wa Ciuta kuti ukwiza na vimanyikwiro vyakuti viwoneke na maso cara.” (Luka 17:20, Phangano Liphya) Kasi ni mwawuli umo cimanyikwiro ici nthena cikawovwilira ŵanthu pa caru capasi kumanya kuti kuŵapo kwa Khristu kwayamba?
3. Kuŵapo kwa Yesu kukumanyikwa na masuzgo ghanandi agho ghakucitika pa caru capasi. Yesu wakati kuŵapo kwake nga ni Fumu kucanya kukenera kuzakamanyikwa na nkhondo, njara, vindindindi, vilengo na ucikanamalango. (Mateyu 24:7-12; Luka 21:10, 11) Kasi nchivici ico cikeneranga kupangiska masuzgo ghose agha? Baibolo likulongosora kuti Satana, uyo ni “fumu ya caru cino,” ni mukali comene cifukwa wakumanya kuti nyengo yake njicoko, comenecomene kufuma apo kuŵapo kwa Khristu nga ni Fumu kukambira. (Yohane 12:31; Civumbuzi 12:9, 12) Mu nyengo yithu yino, pali ukaboni unandi comene uwo ukulongora kuti Satana ni mukali comene, ndiposo ukaboni wa kuŵapo kwa Khristu. Comenecomene kwambira mu 1914, cilimika ico ŵanthu ŵakumanya mdauko ŵakusimikizga kuti ndipo vinthu vinandi vikasinthira, pali ukaboni wakuti pa caru capasi pacitika vinthu ivyo vindacitikepo nakale.
Nkhani iyi yingawoneka nga njiheni pa kuyipulika, kweni ndimo viliri yayi. Nkhani iyi yikulongora kuti Ufumu wa Ciuta, uwo muwusi wake ni Mesiya, ukuwusa sono kucanya. Sonosono apa boma ili lizamwamba kuwusa pa caru cose capasi. Kasi ŵanthu ŵangamanya wuli Ufumu wa Ciuta mwakuti ŵazomerezge kuti ukuwusa, ndiposo kuti ŵazakawusike na Ufumu uwu?
4. Kuŵapo kwa Yesu kukumanyikwa na mulimo wa kupharazga uwo ukucita pa caru cose. Yesu wakayowoya kuti kuŵapo kwake kuzamuyana na “mazuŵa gha Nowa.”a (Mateyu 24:37-39) Nowa wakazenga waka cingalaŵa yayi, kweni wakaŵaso “mupharazgi wa urunji.” (2 Petros 2:5) Nowa wakacenjezganga ŵanthu za ceruzgo ca Ciuta ico cikaŵa pafupi kucitika. Yesu wakayowoya kuti pa nyengo ya kuŵapo kwake, ŵalondezgi ŵake pa caru capasi ŵazamucenjezganga ŵanthu. Iyo wakacima kuti: “Makani ghawemi gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umaliro uti wizenge.”—Mateyu 24:14.
Nga ni umo tanguwonera mu nkhani yakumanyuma, Ufumu wa Ciuta uzamuparanya maboma ghose agho ghali pa caru capasi. Mulimo wa kupharazga ukovwira ŵanthu kumanya kuti boma lakucanya ili, liri pafupi kucitapo kanthu. Kweniso ukuŵapa mwaŵi wakuti ŵacimbire pharanyiko ilo likwiza, ndiposo kuti ŵasankhe kuzakawusika na Ufumu uwu. Fumbo lakuzirwa comene ndakuti, Kasi imwe muzamucita wuli?
Kasi vinthu vizamumuŵirani wuli para Ufumu wa Ciuta wayamba kuwusa pa caru capasi?
Uthenga uwo Yesu wakapharazganga ndiwo wekha ukupeleka cilindizga ciwemi. Cigaruka cikati cacitika mu Edeni, Yehova Ciuta wakanozga kuti paŵe boma lakuti linozge vinthu kuti viŵe nga ni umo Iyo wakakhumbiranga pakwambilira. Ciuta wakakhumbanga kuti ŵanthu ŵakugomezgeka ŵakhale kwamuyirayira mu paradiso pa caru capasi. Kasi paliso nkhani yakukondweska kuluska kumanya kuti Ufumu wa Ciuta ukuwusa sono kucanya? Ufumu uwu kuti ni maloto waka yayi, kweni uliko nadi.
Sono nthena, Fumu yakwimikika na Ciuta yikuwusa mukati mwa ŵalwani ŵake. (Salmo 110:2) Mu caru cakuzura na uheni ici, Mesiya wakucita ivyo Ŵawiske ŵakukhumba. Iyo wakupenjerezga wose awo ŵakukhumba kumumanya makora Ciuta na kumusopa “mu mzimu na mu unenesko.” (Yohane 4:24) Mwaŵi wa kuzakakhala na umoyo wamuyirayira mu Ufumu wa Ciuta ngwakujulikira mafuko ghose, misinkhu yose, ndiposo ŵanthu ŵa mikhaliro yose. (Milimo 10:34, 35) Tikumuciskani kuti musankhe makora mwaŵi uwo muli nawo. Sambirani za Ufumu wa Ciuta mwakuti muzakasangwe na umoyo munthazi.—1 Yohane 2:17.
[Mazgu ghamusi]
a Ivyo Yesu wakayowoya vikutovwira kuti tileke kutimbanizgika na umo Mabaibolo ghanyake ghali kung’anamulikira. Mu Mabaibolo agha, ŵali kubudiska pakung’anamura lizgu lakuti “kuŵapo.” Mu mabaibolo agha lizgu ili likulembeka kuti “kwiza,” kung’anamura cakucitika ca nyengo yicoko. Kweni Yesu wakayaniska kuŵapo kwake na cigumula ca mu nyengo ya Nowa yayi, ico cikacitika kwa nyengo yitali comene yayi. M’malo mwake wakayaniska na “mazuŵa gha Nowa” agho ghakaŵa gha nyengo yitali. Nga ni umo ghakaŵira mazuŵa gha Nowa, kuŵapo kwa Khristu nkhwa nyengo yitali. Nga ni umo vikaŵira kale, lero napo ŵanthu ŵakutangwanikanga comene na vinthu vya zuŵa na zuŵa, ndipo ŵakuzerezga nchenjezgo izo zikupelekeka.
[Vithuzithuzi pa peji 8, 9]
Nkhani ziheni izo tikuzipulika zuŵa lililose zikupeleka ukaboni wakuti vinthu viwemi vili pafupi kwiza
[Kulongosora Cithuzithuzi]
Antiaircraft gun: U.S. Army photo