2 Berɛsosɛm

20 Ɛno akyi no, Moabfoɔ+ ne Ammonfoɔ+ ne nnipa bi a wɔfiri Amonimfoɔ+ mu baa sɛ wɔne Yehosafat rebɛko.+ 2 Na nkurɔfoɔ bɛka kyerɛɛ Yehosafat sɛ: “Dɔm kɛseɛ bi firi po no afam wɔ Edom+ reba wo so, na wɔabɛduru Hasason-Tama a ɛne En-Gedi.”+ 3 Yei maa ehu kaa Yehosafat,+ na ɔde sii n’ani so sɛ ɔbɛhwehwɛ Yehowa.+ Enti ɔkaa sɛ Yuda nyinaa nni mmuada.+ 4 Afei ɔboaboaa Yudafoɔ ano, na wɔkɔbisaa Yehowa deɛ wɔnyɛ.+ Yuda nkuro nyinaa mu na wɔfiri baa sɛ wɔrebɛbisa Yehowa.+

5 Ɛnna Yehosafat sɔre gyinaa Yuda ne Yerusalem asafo no anim wɔ Yehowa fie+ adihɔ foforɔ+ no anim, 6 na ɔkaa sɛ:+

“O Yehowa, yɛn agyanom Nyankopɔn,+ ɛnyɛ wone ɔsoro Nyankopɔn,+ na ɛnyɛ wo na wodi amanaman ahennie nyinaa soɔ?+ Ɛnyɛ wo nsam na tumi ne kɛseyɛ wɔ a obiara ntumi nnyina w’anim?+ 7 O yɛn Nyankopɔn,+ ɛnyɛ wo na wopamoo asase yi sofoɔ firii wo man Israel anim+ na wode asase no maa+ wo dɔfo+ Abraham asefoɔ sɛ wɔntena so daa? 8 Wɔbɛtenaa so, na wɔsii kronkronbea wɔ hɔ maa wo din,+ na wɔkaa sɛ, 9 ‘Sɛ mmusuo+ bi anaa nkrantɛ anaa atemmuo bɔne anaa yaredɔm+ anaa ɛkɔm+ ba yɛn so a, ma yɛnnyina fie yi anim+ ne w’anim (ɛfiri sɛ wo din+ wɔ fie yi so), na yɛnsũ mfrɛ wo yɛn ahohia mu, na tie yɛn na gye yɛn.’+ 10 Ammonfoɔ+ ne Moabfoɔ+ ne Seir+ bepɔ sofoɔ a Israel firi Egypt asase so reba no, woamma wɔanto anhyɛ wɔn asase so na mmom wɔdane firii wɔn ho a wɔansɛe wɔn+ no, 11 hwɛ, deɛ wɔde retua yɛn ka+ ne sɛ wɔreba ha abɛpamo yɛn afiri agyapadeɛ a wode ama yɛn no so.+ 12 O yɛn Nyankopɔn, enti woremmu wɔn atɛn?+ Yɛn deɛ, yɛnni ahoɔden biara a yɛde bɛgyina dɔm kɛseɛ a wɔaba yɛn soɔ yi anim,+ na yɛnhunu deɛ yɛnyɛ mpo;+ wo na yɛn ani da wo soɔ.”+

13 Saa berɛ no na Yudafoɔ nyinaa gyinagyina Yehowa anim;+ wɔne wɔn mmɔfra,+ wɔn yerenom ne wɔn mma nyinaa.

14 Na Yahasiel a ɔyɛ Sakaria ba, Benaia ba, Yeiel ba, Matania ba, Lewini a ɔfiri Asaf+ mma mu no, Yehowa honhom+ kaa no asafo no mu. 15 Na ɔkaa sɛ: “Yuda ne Yerusalemfoɔ nyinaa ne Ɔhene Yehosafat, monyɛ asõ! Deɛ Yehowa reka akyerɛ mo nie, ‘Monnsuro,+ na mommmɔ hu dɔm kɛseɛ yi nti; ɛfiri sɛ ɛko no nyɛ mo ko, na ɛyɛ Onyankopɔn dea.+ 16 Ɔkyena monsiane nkɔ wɔn so. Wɔnam Sis aforoeɛ hɔ reforo ba; na mobɛkɔ akɔto wɔn wɔ subɔn no awieeɛ wɔ Yeruel serɛ no anim. 17 Ɛnyɛ mo na mobɛko.+ Monkɔgyinagyina hɔ, monyɛ komm+ na monhwɛ sɛdeɛ Yehowa bɛgye mo nkwa.+ O Yuda ne Yerusalem, monnsuro, na mommmɔ hu.+ Ɔkyena momfiri adi nkɔ wɔn so, na Yehowa bɛdi mo akyi.’”+

18 Ɛhɔ ara na Yehosafat bɔɔ ne mu ase de n’anim butuu fam,+ na Yudafoɔ ne Yerusalemfoɔ nyinaa nso bɔɔ wɔn mu ase Yehowa anim, na wɔkotoo Yehowa.+ 19 Ɛnna Lewifoɔ+ a wɔyɛ Kohat+ ne Kora+ asefoɔ no sɔreeɛ, na wɔde nne kɛseɛ paa yii Yehowa, Israel Nyankopɔn no ayɛ.+

20 Na wɔsɔree anɔpahema siim kɔɔ Tekoa+ serɛ so.+ Berɛ a wɔrekorɔ no, Yehosafat sɔre gyinaa hɔ kaa sɛ: “O Yuda ne Yerusalemfoɔ nyinaa, montie me!+ Monnya Yehowa mo Nyankopɔn mu gyidie+ na mo ase atim. Monnya n’adiyifoɔ mu gyidie+ na asi mo yie.”

21 Bio nso, ɔne ɔman no tuu agyina+ yiyii nnwontofoɔ+ maa Yehowa na ɔyiyii wɔn a wɔhyehyɛ ntade kronkron+ de yi no ayɛ,+ na wɔdii akofoɔ+ no anim kaa sɛ: “Monyi Yehowa ayɛ,+ na n’adɔeɛ wɔ hɔ daa.”+

22 Berɛ a wɔfirii ahurisi dwom ne ayeyie no aseɛ no, Yehowa maa mmarima kɔtɛɛ+ Ammonfoɔ, Moabfoɔ, ne Seir bepɔ sofoɔ a wɔreba Yuda soɔ no, na wɔbobɔɔ wɔn ho.+ 23 Enti Ammonfoɔ ne Moabfoɔ no to hyɛɛ Seir+ bepɔ sofoɔ no so, na wɔsɛee wɔn maa wɔn ase tɔreeɛ; wɔsɛee Seirfoɔ wieeɛ no, obiara boaa ne nua maa wɔkunkum wɔn ho wɔn ho.+

24 Na Yuda deɛ, wɔkɔɔ ɔwɛn aban a ɛwɔ serɛ soɔ no so.+ Berɛ a wɔdanee wɔn ani hwɛɛ dɔm no, hwɛ, na wɔn afunu gugu fam+ a obiara amfiri mu amfire. 25 Enti Yehosafat ne ne nkurɔfoɔ no bɛfom wɔn ho asadeɛ+ no, na wɔhunuu nneɛma ne ntadeɛ ne anwenneɛ a ɛsom bo pii wɔ wɔn ho; wɔyiyi faeɛ kɔsii sɛ wɔantumi ansoa bio.+ Nnansa na wɔde fom nneɛma no, ɛfiri sɛ na ɛdɔɔso. 26 Da a ɛtɔ so nnan no, wɔboaboaa wɔn ano wɔ Beraka asasetamaa so, na ɛhɔ na wɔhyiraa Yehowa.+ Ɛno nti na wɔfrɛɛ hɔ+ Beraka Asasetamaa de bɛsi nnɛ.

27 Afei Yehosafat dii Yuda ne Yerusalem mmarima no nyinaa anim, na wɔsiim de ahurisie baa Yerusalem ɛfiri sɛ Yehowa maa wɔdii wɔn atamfo ho ahurisie.+ 28 Enti wɔde asankuo+ ne asankuten+ ne ntotorobɛnto+ baa Yehowa fie+ wɔ Yerusalem. 29 Berɛ a asase no so ahennie nyinaa tee sɛ Yehowa ako atia Israel atamfo no, Onyankopɔn ho hu+ tɔɔ wɔn so.+ 30 Enti asomdwoeɛ baa Yehosafat ahennie mu, na ne Nyankopɔn maa no nyaa home afã nyinaa hyiaeɛ.+

31 Na Yehosafat+ toaa so dii Yuda so hene. Ɔbɛdii adeɛ no, na wadi mfeɛ aduasa nnum, na ɔdii hene mfeɛ aduonu nnum wɔ Yerusalem. Ne maame din de Asuba+ a ɔyɛ Silhi babaa. 32 Na ɔhene no nantee ne papa Asa akwan so,+ na wammane amfiri ho, na ɔyɛɛ deɛ ɛtene Yehowa ani so.+ 33 Sorɔnsorɔmmea+ no nko na amfiri hɔ; ná ɔman no nso nsiesiee wɔn akoma mmaa wɔn agyanom Nyankopɔn.+

34 Yehosafat ho nsɛm a aka, ne mfitiaseɛ kɔsi n’awieeɛ, wɔatwerɛ ne nyinaa wɔ Hanani+ ba Yehu+ nsɛm mu wɔ Israel Ahemfo Nwoma+ no mu. 35 Yeinom akyiri no, Yuda hene Yehosafat de ne ho kɔbɔɔ Israel hene Ahasia+ a ɔyɛɛ amumuyɔdeɛ+ no. 36 Ɔne no ka boom yeyɛɛ ahyɛn a wɔde bɛkɔ Tarsis,+ na wɔyeyɛɛ ahyɛn wɔ Esion-Geber.+ 37 Nanso Maresani Dodawahu ba Elieser hyɛɛ nkɔm tiaa Yehosafat sɛ: “Sɛ́ wode wo ho akɔbɔ Ahasia+ nti, Yehowa nso bɛsɛe wo nnwuma.”+ Enti ahyɛn no sɛesɛee,+ na antumi ankɔ Tarsis.+