Deuteronomium
4 “Israel, afei montie ahyɛdeɛ ne atemmusɛm a merekyerɛkyerɛ mo yi na monni so na moanya nkwa,+ na moakɔfa asase a Yehowa mo agyanom Nyankopɔn de ama mo no. 2 Mommfa biribiara nnka asɛm a merehyɛ mo yi ho, na monnyi bi nso mmfiri mu.+ Monhwɛ nni Yehowa mo Nyankopɔn mmara a mede rema mo yi so.
3 “Mo ara mode mo ani hunuu deɛ Yehowa yɛeɛ berɛ a ebinom kɔsom Baal-Peor no.+ Yehowa mo Nyankopɔn sɛee obiara a ɔkɔdii Baal-Peor akyi firii mo mu.+ 4 Na mo a mode mo ho fam+ Yehowa mo Nyankopɔn ho no nyinaa te ase nnɛ. 5 Hwɛ, mama moahunu ahyɛdeɛ+ ne atemmusɛm+ yi sɛdeɛ Yehowa me Nyankopɔn hyɛɛ me no na moayɛ no saa ara wɔ asase a morekɔfa no so. 6 Monni so ɛfiri sɛ ɛno na ɛbɛma moahunu nyansa+ na moanya nhunumu+ wɔ aman a wɔbɛte ahyɛdeɛ yi nyinaa anim, na wɔbɛka sɛ, ‘Ɔman kɛseɛ yi nim nyansa na wɔwɔ nhunumu ampa.’+ 7 Ɔman kɛseɛ+ bɛn na wɔwɔ anyame a wɔbɛn wɔn sɛdeɛ Yehowa yɛn Nyankopɔn bɛn yɛn na yɛtumi kɔ n’anim yi?+ 8 Na ɔman kɛseɛ bɛn na wɔwɔ ahyɛdeɛ ne atemmusɛm a ɛtene sɛ mmara a mede rema mo nnɛ yi?+
9 “Ɛno ara ne sɛ monhwɛ mo ho yie na mo ani mmra mo kra+ so na mo werɛ amfiri deɛ moahunu no,+ na amfiri mo akomam mo nkwa nna nyinaa;+ na momfa nkyerɛkyerɛ mo mma ne mo mmanana.+ 10 Momma wɔnhunu deɛ ɛsii da a mobɛgyinaa Yehowa mo Nyankopɔn anim wɔ Horeb+ no. Saa da no Yehowa ka kyerɛɛ me sɛ, ‘Boaboa nkurɔfoɔ no ano m’anim na wɔntie me nsɛm+ na wɔnsua sɛ wɔbɛsuro+ me, nna dodoɔ a wɔbɛdi no asase no soɔ nyinaa, na wɔmfa nkyerɛkyerɛ wɔn mma.’+
11 “Enti mobɛgyinaa bepɔ no ase, na egya dɛree bepɔ no so kɔɔ soro, na esum ne mununkum kumɔnn baeɛ, na ewiem yɛɛ kusuu.+ 12 Na Yehowa firi gya no mu kasa kyerɛɛ mo.+ Motee kasa bi, nanso moanhunu nipasu+ biara; ɛnne kɛkɛ na moteeɛ.+ 13 Na ɔde n’apam+ a ɛne Nsɛm Du+ no too mo anim, na ɔkaa sɛ monni so. Afei ɔtwerɛ guu aboɔpono mmienu so.+ 14 Na me na Yehowa hyɛɛ me saa berɛ no sɛ menkyerɛ mo ahyɛdeɛ ne atemmusɛm no na moadi so asase a morekɔfa no so.+
15 “Enti monhwɛ mo kra so yie,+ ɛfiri sɛ da a Yehowa firi gya mu ne mo kasaa Horeb no, moanhunu nipasu+ biara. 16 Monhwɛ na moanyɛ asobrakyeɛ+ ankɔyɛ honi* anaa adeɛ biara nsɛsoɔ, ɔbarima anaa ɔbaa+ biara nsɛsoɔ, 17 asase so aboa+ anaa anomaa a ɔtu fa soro+ biara nsɛsoɔ, 18 adeɛ biara a ɛwea asase soɔ anaa apataa+ a ɔwɔ nsuo mu wɔ asase ase biara nsɛsoɔ. 19 Anyɛ saa a, mobɛma mo ani so ahwɛ soro ahunu awia ne bosome ne nsoromma, ɔsoro asafo nyinaa, na ɛbɛgyegye mo ama moasom wɔn.+ Yeinom na Yehowa wo Nyankopɔn de ama aman a wɔwɔ ɔsoro ase nyinaa.+ 20 Nanso mo deɛ, Yehowa ayi mo afiri Egypt dadeɛ fononoo+ mu de mo abɛyɛ ɔno ara n’agyapadeɛ+ sɛdeɛ ɛteɛ nnɛ yi.
21 “Na mo nti Yehowa bo fuu me,+ na ɔkaa ntam sɛ merentwa Yordan na merenkɔ asase pa a Yehowa mo Nyankopɔn de ama mo sɛ agyapadeɛ no so.+ 22 Me deɛ, merebɛwu wɔ asase yi so.+ Merentwa Yordan, na mo deɛ, mobɛtwa akɔfa asase pa no. 23 Monhwɛ yie na mo werɛ amfiri apam a Yehowa mo Nyankopɔn ne mo ayɛ+ no na moankɔyɛ honi biara anaa biribiara a Yehowa mo Nyankopɔn abara mo no nsɛsoɔ.+ 24 Na Yehowa mo Nyankopɔn te sɛ egya a ɛhye adeɛ;+ ɔyɛ Onyankopɔn a ɔne obiara nkyɛ ne som.+
25 “Na sɛ motena asase no so kyɛ na monya mma ne mmanana, na moyɛ asobrakyeɛ+ kɔyɛ honi+ anaa biribi nsɛsoɔ anaa abusudeɛ biara wɔ Yehowa mo Nyankopɔn ani so+ de hyɛ no abufuo a, 26 ɛnneɛ ɛnnɛ mefrɛ ɔsoro ne asase sɛ adansefoɔ+ sɛ wɔbɛsɛe mo ntɛm afiri asase a moretwa Yordan akɔfa no so. Na morentena so nkyɛ, ɛfiri sɛ wɔbɛtwa mo afiri so.+ 27 Yehowa bɛbɔ mo ahwete amanaman mu,+ na aman a Yehowa bɛpamo mo akɔ soɔ no, mo mu kakraa bi na ɛbɛka wɔ soɔ.+ 28 Ɛhɔ na mobɛsom anyame+ a onipa de ne nsa ayɛ, nnua ne aboɔ+ a ɛnhunu adeɛ na ɛnte asɛm na ɛntumi nnidie na ɛnte hwa biara.+
29 “Afei sɛ mode mo akoma ne mo kra nyinaa+ hwehwɛ Yehowa mo Nyankopɔn wɔ hɔ a,+ mobɛhu no. 30 Sɛ nsɛm yi nyinaa to wo daakye na wo ho kyere wo a, wobɛsan aba Yehowa wo Nyankopɔn+ nkyɛn abɛtie no.+ 31 Na Yehowa wo Nyankopɔn yɛ mmɔborɔhunu Nyankopɔn.+ Ɔrennya wo na ɔrensɛe wo, na ne werɛ remfiri apam+ a ɔkaa ho ntam kyerɛɛ w’agyanom no.
32 “Afei hwɛ berɛ a atwam,+ ɛfiri berɛ a Onyankopɔn bɔɔ onipa too asase soɔ,+ ɛfiri ɔsoro ano kɔsi ɔsoro ano, na bisa sɛ, Obi ahunu adekɛseɛ a ɛte saa anaa wate ho asɛm pɛn?+ 33 Nnipa bi ate Onyankopɔn nne egya mu, sɛdeɛ woteeɛ no, a wɔda so te aseɛ anaa?+ 34 Anaa woate pɛn sɛ Onyankopɔn nam sɔhwɛ,+ ne nsɛnkyerɛnne,+ ne anwanwadeɛ,+ ne ɛko,+ ne nsa a ɛyɛ den,+ ne basa a wɔatene mu+ ne ahudeɛ+ so ayi ɔman bi afiri ɔman foforɔ mu de ne din ato wɔn so sɛdeɛ Yehowa mo Nyankopɔn yɛ maa mo Egypt wɔ mo anim no? 35 Nanso wo deɛ, wama woahunu sɛ ɔno ne nokorɛ Nyankopɔn Yehowa no,+ na obiara nni hɔ sɛ ɔno.+ 36 Ɔmaa wotee ne nne firii soro na ɔtenee wo so. Asase so nso ɔmaa wohunuu ne gya kɛseɛ no, na wotee n’anom asɛm firii egya no mfimfini.+
37 “Woda so te ase, ɛfiri sɛ ɔdɔ w’agyanom, na ɔde ne tumi kɛseɛ no yii wɔn asefoɔ,+ na ɔyii wo firii Egypt+ a n’ani di mo akyi 38 sɛ ɔbɛpamo aman a ɛsosõ na ɛyɛ den sene woɔ afiri w’anim, na ɔde wɔn nsase ama wo sɛ agyapadeɛ sɛdeɛ wafiri aseɛ reyɛ nnɛ no.+ 39 Wonim, na ma no ntena w’akomam nnɛ sɛ Yehowa ne nokorɛ Nyankopɔn wɔ soro a ɛwɔ soro ne asase a ɛwɔ fam yi so.+ Obiara nni hɔ te sɛ ɔno.+ 40 Enti di n’ahyɛdeɛ+ ne ne mmara nsɛm a mede rema wo nnɛ yi so na asi wo ne wo nkyirimma yie+ daa, na wo nna aware asase a Yehowa mo Nyankopɔn de rema woɔ+ no so.”
41 Saa berɛ no Mose yii nkuro mmiɛnsa wɔ Yordan agya apueeɛ fam+ 42 na ama obi a ne nsa bɛpa akum ne yɔnko a ɔntan no dada no adwane akɔ hɔ.+ Ɔnnwane nkɔ nkuro yi baako mu na wanya nkwa.+ 43 Ɔde Beser+ a ɛwɔ serɛ so asase tratra soɔ no maa Rubenfoɔ, na ɔde Ramot+ a ɛwɔ Gilead no maa Gadfoɔ, na ɔde Golan+ a ɛwɔ Basan no maa Manasefoɔ.+
44 Yei ne mmara+ a Mose de too Israelfoɔ no anim. 45 Yei ne nkaesɛm+ ne ahyɛdeɛ+ ne atemmusɛm+ a Mose de maa Israelfoɔ berɛ a wɔfirii Egypt no. 46 Saa berɛ no na wɔwɔ Yordan mpɔtamu wɔ bɔn no ho wɔ Bet-Peor+ anim. Ná ɛhɔ yɛ Amorifoɔ hene Sihon a ɔte Hesbon+ no asase. Ɔno na Mose ne Israelfoɔ kuu no berɛ a wɔfiri Egypt reba no.+ 47 Wɔfaa ɔne Basan hene Og+ nsase. Yeinom ne Amorifoɔ ahemfo mmienu a na wɔwɔ Yordan apueeɛ fam no. 48 Asase no firi Aroer+ a ɛda Arnon bɔn no ano kɔsi Bepɔ Siyon a ɛne Hermon+ no ho, 49 ne Araba+ mantam nyinaa wɔ Yordan apueeɛ fam kɔsi po a ɛwɔ Araba+ no ano wɔ Pisga+ ase.